କଠୋର ନିଷ୍ପତ୍ତି ନେବାକୁ ଆମକୁ ବାଧ୍ୟ କର ନାହିଁ, କଲେଜିୟମ ବିବାଦରେ କେନ୍ଦ୍ରକୁ ତାଗିଦ କଲେ ସୁପ୍ରିମକୋର୍ଟ
ନୂଆଦିଲ୍ଲୀ: ହାଇକୋର୍ଟର ବିଚାରପତିଙ୍କ ପଦୋନ୍ନତି ଏବଂ ବଦଳି ପାଇଁ କଲେଜିୟମର ସୁପାରିଶକୁ କାର୍ଯ୍ୟକାରୀ କରିବା ପାଇଁ ଜାରି ପ୍ରକ୍ରିୟାକୁ ବିଳମ୍ବ ନେଇ ସୁପ୍ରିମକୋର୍ଟ ଅସନ୍ତୋଷ ପ୍ରକାଶ କରିଛନ୍ତି। ଶୁକ୍ରବାର ଦିନ କଠୋର ଆଭିମୁଖ୍ୟ ଗ୍ରହଣ କରି କୋର୍ଟ କହିଛନ୍ତି ଯେ କଲେଜିୟମର ସୁପାରିଶ ଉପରେ ନିଷ୍ପତ୍ତି ନେବାରେ କେନ୍ଦ୍ରର ବିଫଳତା ଅତ୍ୟନ୍ତ ବିବ୍ରତ। ଏଥି ସହ ସରକାରଙ୍କ ପଦକ୍ଷେପ ଯୋଗୁଁ ଏହା କଷ୍ଟସାଧ୍ୟ ତଥା ଅପ୍ରୀତିକର ନିଷ୍ପତ୍ତି ନେବାକୁ ବାଧ୍ୟ ହେବ ବୋଲି ସୁପ୍ରିମକୋର୍ଟ ଚେତାବନୀ ଦେଇଛନ୍ତି।
ଜଷ୍ଟିସ ସଞ୍ଜୟ କିଶନ କୌଲ ଏବଂ ଜଷ୍ଟିସ ଅଭୟ ଏସ ଓକାଙ୍କ ଏକ ଡିଭିଜନ ବେଞ୍ଚ ଆଟର୍ଣ୍ଣି ଜେନେରାଲ ଆର ଭେଙ୍କଟାରାମଣିଙ୍କୁ କହିଛନ୍ତି, ‘ଏହା ଆମକୁ ଅସୁବିଧାରେ ପକାଉଛି। ଏହା ଅନ୍ୟ କୌଣସି ଜିନିଷ ଅପେକ୍ଷା ଗୁରୁତର, ଗୁରୁତର ଅଟେ। ଆମକୁ କଷ୍ଟଦାୟକ ନିଷ୍ପତ୍ତି ନେବାକୁ ପଡ଼ିବ। ଆପଣ ଆମକୁ କଠୋର ନିଷ୍ପତି ନେବାକୁ ବାଧ୍ୟ କରନ୍ତୁ ନାହିଁ। ତେବେ ଆଟର୍ଣ୍ଣି ଜେନେରାଲ ଏହି ମାମଲାରେ ୧୦ ଦିନ ସମୟ ମାଗିଥିଲେ। କୋର୍ଟ କହିଛନ୍ତି ଯେ କୌଣସି ପ୍ରକାରର ବିଳମ୍ବ ‘ପ୍ରଶାସନିକ ଏବଂ ନ୍ୟାୟିକ କାର୍ଯ୍ୟରେ ହେଉ କିମ୍ବା ଉଭୟରେ ହେଉ, ତାହା ଅନୁକୂଳ ହୋଇପାରିବ ନାହିଁ।’
ସେ ଆହୁରି ମଧ୍ୟ କହିଛନ୍ତି ଯେ ଅଧିକ ବିଳମ୍ବ ହେଲେ ହାଇକୋର୍ଟର ବିଚାରପତିମାନଙ୍କୁ ସ୍ଥାନାନ୍ତର କରାଯିବ ନାହିଁ ସେମାନଙ୍କୁ ନ୍ୟାୟିକ କାର୍ଯ୍ୟ ଦିଆଯାଇପାରିବ ନାହିଁ। ଜାନୁୟାରୀ ୬ ରେ ଶେଷ ଶୁଣାଣିରେ ଶୀର୍ଷ ଅଦାଲତ କହିଥିଲେ ଯେ ବିଚାରପତିଙ୍କ ହସ୍ତାନ୍ତରରେ ସରକାରଙ୍କର ସୀମିତ ଭୂମିକା ରହିଛି ଏବଂ ନିଷ୍ପତ୍ତି ନେବାରେ ବିଳମ୍ବ ହେବା ଦ୍ୱାରା ତୃତୀୟ ପକ୍ଷ ଉତ୍ସ ଏଥିରେ ହସ୍ତକ୍ଷେପ କରୁଛି।
