ଏଣିକି ମିନିଟରେ ବାହାରିବ EPFO ଟଙ୍କା, ଜୁନ୍ ଭିତରେ ନୂଆ ସଫ୍ଟଓ୍ୱେୟାର: କେନ୍ଦ୍ର ଶ୍ରମ ମନ୍ତ୍ରୀ
ନୂଆଦିଲ୍ଲୀ: ଚାକିରିଆଙ୍କ ପାଇଁ ବଡ ଖବର । ଯଦି ଆପଣ EPFO ର ଜଣେ ସଦସ୍ୟ, ତେବେ ଏହି ଖବର ଆପଣଙ୍କ ପାଇଁ ଅଟେ । କର୍ମଚାରୀଙ୍କ ସୁବିଧା ପାଇଁ EPFO କ୍ରମାଗତ ଭାବରେ କାର୍ଯ୍ୟ କରୁଛି । ଏହି କ୍ରମରେ କେନ୍ଦ୍ର ଶ୍ରମମନ୍ତ୍ରୀ ମନସୁଖ ମାଣ୍ଡଭ୍ୟ ଘୋଷଣା କରିଛନ୍ତି ଯେ, କର୍ମଚାରୀଙ୍କ ପ୍ରୋଭିଡେଣ୍ଟ ଫଣ୍ଡ ସଂଗଠନ (ଇପିଏଫଏ) ଚଳିତ ବର୍ଷ ଜୁନ୍ ସୁଦ୍ଧା ନୂତନ ସଫ୍ଟୱେୟାର ସିଷ୍ଟମ EPFO 3.0 ଆରମ୍ଭ କରିବ ।
ସେ କହିଛନ୍ତି ଯେ ନୂତନ ସିଷ୍ଟମ ବ୍ୟାଙ୍କିଙ୍ଗ ସିଷ୍ଟମ ପରି କାମ କରିବ । କୌଣସି ଜରୁରୀକାଳୀନ ପରିସ୍ଥିତିରେ, EPFO ସଦସ୍ୟମାନେ ଏକ ନିର୍ଦ୍ଦିଷ୍ଟ ସୀମା ପର୍ଯ୍ୟନ୍ତ ଟଙ୍କା ଉଠାଇବାକୁ ସକ୍ଷମ ହେବେ । କେନ୍ଦ୍ରମନ୍ତ୍ରୀ କହିଛନ୍ତି ଯେ EPFO 3.0 ଲଞ୍ଚ ହେବା ପରେ ଇପିଏଫଓ ସଦସ୍ୟମାନଙ୍କୁ ଏଟିଏମ କାର୍ଡ ଯୋଗାଇ ଦିଆଯିବ ।
ସେ କହିଛନ୍ତି ଯେ ଆଇଟି ସିଷ୍ଟମ 2.01 ଅଧୀନରେ ୱେବସାଇଟ୍ ଏବଂ ସିଷ୍ଟମକୁ ଅପଗ୍ରେଡ୍ କରିବାର ପ୍ରଥମ ପର୍ଯ୍ୟାୟ ଜାନୁୟାରୀ 2025 ଶେଷ ସୁଦ୍ଧା ଶେଷ ହେବ। ଏହା ପରେ ନାମରେ ଭୁଲ କିମ୍ବା ଅନ୍ୟ କୌଣସି କାରଣରୁ PF ଆକାଉଣ୍ଟରୁ ଟଙ୍କା ଉଠାଇବାରେ କୌଣସି ଅସୁବିଧା ହେବ ନାହିଁ । ମେ-ଜୁନ୍ ସୁଦ୍ଧା ଇପିଏଫ୍ଓର ସମ୍ପୂର୍ଣ୍ଣ ବ୍ୟବସ୍ଥା ବ୍ୟାଙ୍କ ପରି କାମ ଆରମ୍ଭ କରିବ ।
ଦେଶରେ ବେରୋଜଗାରୀ ବୃଦ୍ଧି ନେଇ ବିରୋଧୀଙ୍କ ଅଭିଯୋଗକୁ ପ୍ରତିହତ କରି ମାଣ୍ଡାଭିଆ ଦାବି କରିଛନ୍ତି ଯେ ୟୁପିଏ ସରକାର ତୁଳନାରେ ଏନଡିଏ ସରକାରରେ ରୋଜଗାର ବୃଦ୍ଧି ପାଇଛି । ଦେଶରେ ନିଯୁକ୍ତି ଗତ 10 ବର୍ଷରେ 36 ପ୍ରତିଶତ ବୃଦ୍ଧି ପାଇ 2023-24 ରେ 64.33 କୋଟିରେ ପହଞ୍ଚିଛି । 2014-15 ମସିହାରେ ଏହା 47.15 କୋଟି ଥିଲା । ସେ କହିଛନ୍ତି ଯେ ୟୁପିଏ ସରକାରଙ୍କ ଅଧୀନରେ 2004 ରୁ 2014 ମଧ୍ୟରେ ନିଯୁକ୍ତି କ୍ଷେତ୍ରରେ ପ୍ରାୟ 7 ପ୍ରତିଶତ ବୃଦ୍ଧି ଘଟିଛି ।