ଇସ୍ପାତ ନଗରୀରେ ମାରାଥନ ବେଳେ ଗୁଳିମାଡ, ଜଣେ ଗୁରୁତର

ରାଉରକେଲା- ଇସ୍ପାତ ନଗରୀରେ ଫାୟାରିଂ । ଏକ ମାରାଥନ ଚାଲିଥିବା ବେଳେ ଫୁଟିଲା ଗୁଳି । ଏଥିରେ ଜଣେ ବ୍ୟକ୍ତି ଗୁରୁତର । ଆହତଙ୍କୁ ରାଉରକେଲାର ଆଇଜିଏଚରେ ଭର୍ତ୍ତି କରାଯାଇଛି । ରାଉରକେଲା ସେକ୍ଟର ୩ ଥାନା ଅଞ୍ଚଳରେ ସକାଳୁ ସକାଳୁ ମାରାଥନ ଚାଲିଥିବା ବେଳେ ଏହିଫାୟାରିଂ ହୋଇଛି । ପୋଲିସ ଘଟଣାର ତଦନ୍ତ ଆରମ୍ଭ କରିଛି ।

ସୂଚନା ମୁତାବକ, ଇସ୍ପାତ ନଗରୀ ରାଉରକେଲାର ସେକ୍ଟର୧ ଅନ୍ତର୍ଗତ ସେକ୍ଟର ୩ ଅଞ୍ଚଳରେ ଏକ ମାରାଥନ ଚାଲିଥିବା ବେଳେ ଗୁଳିମାଡ ହୋଇଥିଲା । ଗୁଳି ମାଡରେ ଜଣେ ବ୍ୟକ୍ତି ଗୁରୁତର ଆହତ ହୋଇଛନ୍ତି । ଆହତଙ୍କ ନାଁ ସଲିଲ ସାହୁ । ସେ ଏକ ଘରୋଇ କମ୍ପାନୀରେ କାମ କରନ୍ତି । ସେ ହିଁ ଏହି ମାରାଥନର ଆୟୋଜନା କରିଥିଲେ । ମାରାଥନ ଆଜି ସକାଳୁ ଆରମ୍ଭ ହୋଇଥିଲା । ରାସ୍ତାରେ ତାଙ୍କ ପଛପଟୁ କେହି ଗୁଳି କରିଥିଲେ । ଗୁଳି ବାଜିବା ପରେ ସଲିଲ ତଳେ ପଡିଯାଇଥିଲେ ।

ସଙ୍ଗେ ସଙ୍ଗେ ତାଙ୍କୁ ଆଇଜିଏଚକୁ ନିଆଯାଇଥିଲା । ସେଠାରେ ତାଙ୍କ ଚିକିତ୍ସା ଚାଲିଛି । ପୋଲିସ ଘଟଣାର ତଦନ୍ତ ଆରମ୍ଭ କରିଛି । ତେବେ କେଉଁ କାରଣରୁ ଗୁଳିମାଡ ହୋଇଛି ତାହା ଜଣାପଡି ନାହିଁ । କୌଣସି ବ୍ୟକ୍ତିଙ୍କ ସହ ସଲିଲଙ୍କର ପୂର୍ବରୁ ଶତ୍ରୁତା ଥିଲା ନାଁ ଏହା ପଛରେ ଅନ୍ୟ କିଛି କାରଣ ରହିଛି ତାର କାରଣ ଖୋଜୁଛି ପୋଲିସ ।