୧ ଡିସେମ୍ବରରେ ଲାଗୁ ହେବ ସିମ୍ କାର୍ଡ କିଣିବାର ନୂଆ ନିୟମ, ଏବେ ପାଖରେ ଆଉ ରଖିପାରିବେନି ଅଧିକ ସିମ୍!
Advertisement
ନୂଆଦିଲ୍ଲୀ: ଦିନକୁ ଦିନ ବଢୁଥିବା ଠକେଇକୁ ରୋକିବା ପାଇଁ ସରକାର ନିରନ୍ତର ଉଦ୍ୟମ କରୁଛନ୍ତି। ଲୋକଙ୍କୁ ଠକାମୀର ଶିକାର ହେବାକୁ ରକ୍ଷା କରିବା ପାଇଁ ଟେଲିକମ୍ ବିଭାଗ ବର୍ତ୍ତମାନ ସିମ୍ କ୍ରୟ କରିବାର ନିୟମ ପରିବର୍ତ୍ତନ କରିଛି। ଡିସେମ୍ବର ୧, ୨୦୨୩ ରୁ ସାରା ଦେଶରେ ସିମ୍ କ୍ରୟ ପାଇଁ ନୂତନ ନିୟମ ଲାଗୁ ହେବ। ଏହି ନିୟମାବଳୀ କାର୍ଯ୍ୟକାରୀ ହେବା ପରେ, ଗୋଟିଏ ID ରେ କେବଳ ସୀମିତ ସଂଖ୍ୟକ ସିମ୍ କ୍ରୟ କରାଯିବ, ଅର୍ଥାତ୍ ଅତିରିକ୍ତ ସିମ୍ କିଣିବା ଉପରେ କଟକଣା ଲାଗିବ।
ସିମ୍ କ୍ରୟ ପାଇଁ ନୂତନ ନିୟମ ପୂର୍ବରୁ ଅକ୍ଟୋବର ୧, ୨୦୨୩ ରୁ ଲାଗୁ କରାଯାଉଥିଲା, କିନ୍ତୁ ବର୍ତ୍ତମାନ ଟେଲିକମ୍ ବିଭାଗ ଏହାକୁ କାର୍ଯ୍ୟକାରୀ କରିବା ପାଇଁ ଟେଲିକମ୍ କମ୍ପାନୀମାନଙ୍କୁ ୨ ମାସର ଅତିରିକ୍ତ ସମୟ ଦେଇଛି। ଡିସେମ୍ବର ୧ ରୁ ଏହାକୁ କାର୍ଯ୍ୟକାରୀ କରିବାକୁ ଟେଲିକମ୍ ଅପରେଟରମାନଙ୍କୁ ନିର୍ଦ୍ଦେଶ ଦିଆଯାଇଛି। ସିମ୍ କ୍ରୟ ପାଇଁ ନୂତନ ନିୟମ ଲାଗୁ ହେବା ପରେ, ଯେଉଁମାନେ ବହୁ ପରିମାଣରେ ସିମ୍ କ୍ରୟ କରୁଛନ୍ତି ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇପାରିବ। ନୂତନ ନିୟମ ସମ୍ପର୍କରେ କେନ୍ଦ୍ର ମନ୍ତ୍ରୀ ଅଶ୍ୱିନୀ ବୈଷ୍ଣବ ପୂର୍ବରୁ କହିଥିଲେ ଯେ, ସାଇବର ଜାଲିଆତି ଏବଂ ଘୋଟାଲାକୁ ରୋକିବା ପାଇଁ ସରକାର ସିମ କାର୍ଡ ପାଇଁ ନୂତନ ନିୟମ ଜାରି କରିଛନ୍ତି। କେବଳ ଏତିକି ନୁହେଁ, ଠକେଇ କଲ୍ ବନ୍ଦ କରିବା ପାଇଁ ପ୍ରାୟ ୫୨ ଲକ୍ଷ ସଂଯୋଗକୁ ଅବରୋଧ କରାଯାଇଛି।
ନୂତନ ନିୟମ ଅନୁଯାୟୀ, ଯଦି ନଭେମ୍ବର ୩୦ ପରେ କୌଣସି ଟେଲିକମ୍ କମ୍ପାନୀ ଜଣେ ବିକ୍ରେତାଙ୍କୁ ବିନା ପଞ୍ଜିକରଣରେ ସିମ୍ ବିକ୍ରୟ କରିବାକୁ ଅନୁମତି ଦିଏ, ତା’ହେଲେ ତାଙ୍କ ଉପରେ ୧୦ ଲକ୍ଷ ଟଙ୍କା ଜୋରିମାନା ଲାଗୁ କରାଯାଇପାରେ। ବର୍ତ୍ତମାନ ଦେଶରେ ପ୍ରାୟ ୧୦ ଲକ୍ଷ ସିମ୍ କାର୍ଡ ବିକ୍ରେତା ଅଛନ୍ତି। ନଭେମ୍ବର ଶେଷ ସୁଦ୍ଧା ସମସ୍ତ ଡିଲରଙ୍କ ପାଇଁ ପଞ୍ଜୀକୃତ ହେବା ବାଧ୍ୟତାମୂଳକ ଅଟେ।