ବଡ଼ ଖବର… ୧୫ଟି ଭାଷାରେ ପରୀକ୍ଷା ଆୟୋଜନ କରିବେ ସରକାର: ଜିତେନ୍ଦ୍ର ସିଂହ
ନୂଆଦିଲ୍ଲୀ: ସରକାରୀ ଚାକିରି ପାଇଁ ପରୀକ୍ଷାକୁ ନେଇ ଏକ ବଡ଼ ନିଷ୍ପତ୍ତି ନେଇଛନ୍ତି ସରକାର । ଷ୍ଟାଫ ସିଲେକ୍ସନ କମିଟି ଦ୍ୱାରା ଅନୁଷ୍ଠିତ ହେଉଥିବା ପରୀକ୍ଷା ଗୁଡ଼ିକୁ ୧୫ଟି ଭାଷାରେ ଆୟୋଜନ କରିବା ପାଇଁ ସରକାରଙ୍କ ତରଫରୁ ନିଷ୍ପତ୍ତି ନିଆଯାଇଛି । ଏହାଦ୍ୱାରା ଯୁବବର୍ଗ କୌଣସି ସୁଯୋଗ ହାତଛଡ଼ା କରିବେ ନାହିଁ ବୋଲି କହିଛନ୍ତି କେନ୍ଦ୍ରମନ୍ତ୍ରୀ ଜିତେନ୍ଦ୍ର ସିଂହ । ଏହି ଐତିହାସିକ ନିଷ୍ପତ୍ତି ସ୍ଥାନୀୟ ଯୁବବର୍ଗଙ୍କ ଅଂଶଗ୍ରହଣକୁ ବୃଦ୍ଧି କରିବା ସହ ଆଞ୍ଚଳିକ ଭାଷାକୁ ପ୍ରାଧାନ୍ୟ ଦିଆ ଯାଇପାରିବ । ଜନ ଅଭିଯୋଗ ଏବଂ ପେନସନ ମନ୍ତ୍ରାଳୟର ୧୪ତମ ପରାମର୍ଶଦାତା କମିଟିର ବୈଠକରେ ଏ ନେଇ ସେ ସୂଚନା ଦେଇଛନ୍ତି ।
କେନ୍ଦ୍ରମନ୍ତ୍ରୀ କହିଛନ୍ତି ଯେ, ସରକାରୀ ଚାକିରି ପାଇଁ ଏବେ ୧୫ଟି ଭାରତୀୟ ଭାଷାରେ ପରୀକ୍ଷା ଅନୁଷ୍ଠିତ କରିବା ପାଇଁ ସରକାର ନିଷ୍ପତ୍ତି ନେଇଛନ୍ତି । ଯାହା ଫଳରେ ଦେଶର କୌଣସି ଯୁବବର୍ଗ ଭାଷାଗତ ସମସ୍ୟା ଯୋଗୁଁ ଚାକିରି ସୁଯୋଗରୁ ବଞ୍ଚିତ ନ ହୁଅନ୍ତି । ହିନ୍ଦୀ ଏବଂ ଇଂରାଜୀ ବ୍ୟତୀତ ଆସାମୀ, ବେଙ୍ଗଲି, ଗୁଜୁରାଟୀ, ମାଲାୟଲମ୍, କନ୍ନଡ, ତାମିଲ, ତେଲୁଗୁ, ଓଡ଼ିଆ, ଉର୍ଦ୍ଦୁ ସହିତ ପଞ୍ଜାବୀ, ମଣିପୁରୀ(ମଇତି) ଏବଂ କୋଙ୍କଣୀ ଭାଷାରେ ମଧ୍ୟ ପ୍ରଶ୍ନପତ୍ର ତିଆରି କରାଯିବ । ଗତ ୯ ବର୍ଷ ମଧ୍ୟରେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ହିନ୍ଦୀ ବ୍ୟତୀତ ଭାରତର ଅନେକ ଆଞ୍ଚଳିକ ଭାଷାର ଉଲ୍ଲେଖନୀୟ ଅଗ୍ରଗତି ଘଟିଥିବା ଦେଖିବାକୁ ମିଳିଛି । ତେବେ ସରକାରଙ୍କ ଏହି ନିଷ୍ପତ୍ତି ପରେ ଅଧିକ ସଂଖ୍ୟାରେ ଯୁବବର୍ଗ ନିଜ ମାତୃଭାଷାରେ ପରୀକ୍ଷାରେ ଅଂଶଗ୍ରହଣ କରିବା ସହ ଚୟନ ପ୍ରକ୍ରିୟାରେ ମଧ୍ୟ ଉନ୍ନତି ଆଣିପାରିବେ ବୋଲି କେନ୍ଦ୍ରମନ୍ତ୍ରୀ ପ୍ରକାଶ କରିଛନ୍ତି । ଏହାପୂର୍ବରୁ ହିନ୍ଦୀ ଇଂରାଜୀ ବ୍ୟତୀତ ଅନ୍ୟ ଭାଷଶରେ ପରୀକ୍ଷା ଆୟୋଜନ କରିବା ପାଇଁ ବିଭିନ୍ନ ରାଜ୍ୟରୁ ବାରମ୍ବାର ଦାବି ହୋଇ ଆସୁଥିଲା ।
ପରୀକ୍ଷାରେ ଅନ୍ୟାନ୍ୟ ଜିନିଷ ଉପରେ ନଜର ରଖିବା ସହ ଏହି କ୍ଷେତ୍ରରେ ସ୍ୱତନ୍ତ୍ର ଦୃଷ୍ଟି ଦେବା ପାଇଁ ଏକ ବିଶେଷଜ୍ଞ ଟିମ୍ ଗଠନ କରିଛନ୍ତି ସରକାର । ତେବେ ଏହି ନିୟମ ଅଫିସିଆଲ ଭାଷାଗତ ନୀତି, ୧୯୭୬ ମସିହାରୁ ଏଥିପାଇଁ ନୀତି ନିୟମ ପ୍ରସ୍ତୁତ ହୋଇଥିଲେ ମଧ୍ୟ, ଗତ ୫-୬ ବର୍ଷ ମଧ୍ୟରେ ଏହାର ଏକ ବଡ଼ ସଫଳତା ଦେଖିବାକୁ ମିଳିଛି । ତେବେ ବର୍ତ୍ତମାନ ସରକାର ପରୀକ୍ଷାର୍ଥୀଙ୍କୁ ୧୫ଟି ଭାଷାରେ ପରୀକ୍ଷା ଦେବା ପାଇଁ ଏକ ଫର୍ମାଟ ଲଞ୍ଚ କରିଛନ୍ତି ।
କେନ୍ଦ୍ରମନ୍ତ୍ରୀ ଜିତେନ୍ଦ୍ର ସିଂହ କହିଛନ୍ତି ଯେ, JEE, NEET ଏବଂ UGC ଇତ୍ୟାଦି ପରୀକ୍ଷା ଦେଶର ୧୨ଟି ଭାଷାରେ ଅନୁଷ୍ଠିତ ହେଉଛି । UPSCରେ ଉଚ୍ଚଶିକ୍ଷା ବିଷୟ ପୁସ୍ତକଗୁଡ଼ିକର ଅଭାବ ରହିଛି କିନ୍ତୁ ଭାରତୀୟ ଭାଷାରେ ବିଶେଷ ପୁସ୍ତକ ପ୍ରଚାର ପାଇଁ ଶିକ୍ଷା ମନ୍ତ୍ରଣାଳୟର ସମନ୍ୱୟ ରକ୍ଷା କରି ଉଦ୍ୟମ ଜାରି ରହିଛି ବୋଲି ସେ କରିଛନ୍ତି।