ସାବଧାନ ଶତ୍ରୁ ! ଆସୁଛି ଡ୍ରୋନ, ଆମେରିକା-ଭାରତ ମଧ୍ୟରେ ଚୁକ୍ତି ସ୍ବାକ୍ଷରିତ

ଥରହର ହେବେ ଶତ୍ରୁ । ଆସୁଛି ଅତ୍ୟାନୁଧିକ ଡ୍ରୋନ । ଭାରତ ଏବଂ ଆମେରିକା ମଧ୍ୟରେ ଆରବ ଡଲାର ମୂଲ୍ୟର ଡ୍ରୋନ୍ କିଣିବା ନେଇ ଚୁକ୍ତି ଶେଷ କରିଛନ୍ତି । ପ୍ରକାଶଥାଉକି, ବର୍ତ୍ତମାନ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ 3ଦିନିଆ ଆମେରିକା ଗସ୍ତରେ ରହିଥିବା ବେଳେ ଜୋ ବାଇଡେନଙ୍କୁ ସାକ୍ଷାତ କରିଥିଲେ । ଏହି ସମୟରେ ପିଏମ ମୋଦୀ ଆମେରିକାର ରାଷ୍ଟ୍ରପତି ଜୋ ବିଡେନଙ୍କ ସହ ଦ୍ୱିପାକ୍ଷିକ ଆଲୋଚନା କରିଥିଲେ । ଡ୍ରୋନ୍ କାରବାରକୁ ନେଇ ଉଭୟଙ୍କ ମଧ୍ୟରେ ଚୁକ୍ତି ସ୍ବାକ୍ଷରିତ ହୋଇଛି ।

ଆମେରିକାରୁ 31 MQ-9B ସ୍କାଏ ଗାର୍ଡିଆନ୍ ଏବଂ ସି ଗାର୍ଡିଆନ୍ ଡ୍ରୋନ୍ କ୍ରୟ କରିବ ଭାରତ ।  ଏହି ଡ୍ରୋନ୍ କ୍ରୟ ମୂଲ୍ୟ ପ୍ରାୟ 3 ବିଲିୟନ ଡଲାର ବୋଲି ଜଣାପଡିଛି । ଚୀନ୍ ସୀମାରେ କ୍ଷମତା ବୃଦ୍ଧି କରିବା ଏହି ସମୟରେ ଭାରତର ଲକ୍ଷ୍ୟ ରହିଛି । ଏହି ଚୁକ୍ତି ପାଇଁ ଏକ ବର୍ଷରୁ ଅଧିକ ସମୟ ଧରି ଆଲୋଚନା ଜାରି ରହିଥିଲା । ଗତ ବର୍ଷ ଜୁନ୍ ମାସରେ ପ୍ରତିରକ୍ଷା ମନ୍ତ୍ରଣାଳୟ ଆମେରିକାରୁ ଏୟାର-ଟୁ ଗ୍ରାଉଣ୍ଡ ମିସାଇଲ୍ ଏବଂ ଲେଜର ଗାଇଡ୍ ବୋମା ସହିତ ସଜ୍ଜିତ MQ-9B ସ୍କାଏ ଗାର୍ଡିଆନ୍ ଏବଂ ସାଗର ଗାର୍ଡିଆନ୍ ସଶସ୍ତ୍ର ଡ୍ରୋନ୍ କ୍ରୟକୁ ଅନୁମୋଦନ କରିଥିଲା।

ଡ୍ରୋନ୍ କିଣିବା ବ୍ୟତୀତ ଭାରତୀୟ ନୌସେନା ମଧ୍ୟ ଏହି ଆର୍ଥିକ ବର୍ଷରେ ଅନ୍ୟ ଦୁଇଟି ବଡ ପ୍ରତିରକ୍ଷା ଚୁକ୍ତି ସ୍ୱାକ୍ଷର କରିବାକୁ ଯୋଜନା କରୁଛି । ନୌସେନା ଚଳିତ ବର୍ଷ ଆଉ 3 ସ୍କର୍ପିନ୍ ବୁଡ଼ାଜାହାଜ ଏବଂ 26 ରାଫାଲ୍-ଏମ୍ ଯୁଦ୍ଧ ବିମାନ କିଣିବା ପାଇଁ ଏକ ଚୁକ୍ତି ସ୍ୱାକ୍ଷର କରିବା ନେଇ ଆଲୋଚନା ହୋଇଛି ।

ଛାନିଆ ହେବେ ଚୀନ-ପାକିସ୍ତାନ: ଏହି ଡ୍ରୋନ୍ ସଶସ୍ତ୍ର ବାହିନୀର ସର୍ଭେଲାନ୍ସ ସିଷ୍ଟମ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ । ପୂର୍ବ ଲଦାଖରେ ଚାଲିଥିବା ସାମରିକ ମୁକାବିଲା ମଧ୍ୟରେ ଚୀନ୍ ସହିତ 3,488 କିଲୋମିଟର ଲାଇନ୍ ଅଫ୍ ଆକ୍ଟୁଆଲ୍ କଣ୍ଟ୍ରୋଲ୍ (LAC) ରେ ଭାରତ ଏହି ଡ୍ରୋନ୍ ନିୟୋଜିତ କରିପାରିବ । ଯଦି ଆମେ 31 MQ-9B ଡ୍ରୋନ୍ କଥା ହେବା, ଏହା ପ୍ରାୟ 40000 ଫୁଟରୁ ଅଧିକ ଉଚ୍ଚତାରେ 40 ଘଣ୍ଟା ଧରି ଉଡିପାରିବ । ଏହି ଡ୍ରୋନ୍ ଗୁଡିକରେ 170 ହେଲଫାୟାର କ୍ଷେପଣାସ୍ତ୍ର, 310 GBU-39B ସଠିକତ ଗାଇଡ୍ ଗ୍ଲାଇଡ୍ ବୋମା, ନାଭିଗେସନ୍ ସିଷ୍ଟମ୍, ସେନ୍ସର ସୁଟ୍ ଏବଂ ମୋବାଇଲ୍ ଗ୍ରାଉଣ୍ଡ କଣ୍ଟ୍ରୋଲ୍ ସିଷ୍ଟମ ଭଳି ସୁବିଧା ରହିଛି ।

ସୂଚନା ଅନୁସାରେ, ଏହି ଡ୍ରୋନ୍ ଅଧିକ ଶକ୍ତିଶାଳୀ । ଏହି ଡ୍ରୋନ୍ ଦ୍ୱାରା ଆମେରିକା  ଅଲ କାଏଦାର ନେତା ଅଲ ଜାୱାହିରିଙ୍କୁ ହତ୍ୟା କରିଥିଲେ । ଏହି ଡ୍ରୋନ୍ ବିଷୟରେ ସବୁଠାରୁ ବିଶେଷ କଥା ହେଉଛି ଏହା ଯେକୌଣସି ମିଶନ ପାଇଁ ପଠାଯାଇପାରିବ । ଏହାର ସାହାଯ୍ୟରେ ନୀରିକ୍ଷଣ, ଗୁପ୍ତଚର, ସୂଚନା ସଂଗ୍ରହ କିମ୍ବା ଶତ୍ରୁ ଲୁଚି ରହିଥିବା ସ୍ଥାନ ଉପରେ ଗୁପ୍ତ ଆକ୍ରମଣ କରାଯାଇପାରିବ । ଏହାର ପରିସର 1900 କିଲୋମିଟର ।