ଟ୍ରେନରେ ଯାତ୍ରା କରୁଥିବା ଲୋକଙ୍କ ପାଇଁ ଖୁସି ଖବର! ଆଜିଠୁ ରେଲୱେ ଦେଉଛି ଏହି ସୁବିଧା
ନୂଆଦିଲ୍ଲୀ: ଟ୍ରେନରେ ଯାତ୍ରା କରୁଥିବା ଲୋକଙ୍କ ପାଇଁ ଖୁସି ଖବର ଆଣି ଦେଇଛି ଭାରତୀୟ ରେଲୱେ । ଆଜି ଅର୍ଥାତ୍ ୨୯ ଜୁନରୁ ସମସ୍ତ ଟ୍ରେନରେ ସାଧାରଣ ଶ୍ରେଣୀ ଟିକେଟ୍ ଉପଲବ୍ଧ ହେବ । ଏହି ସୁବିଧା ସହିତ ଯାତ୍ରୀମାନେ ବିନା ସଂରକ୍ଷଣରେ ଟିକେଟ୍ କାଉଣ୍ଟରରୁ ଟିକେଟ୍ ନେଇ ଯାତ୍ରା କରିପାରିବେ । ରେଲୱେର ଏହି ବ୍ୟବସ୍ଥାରେ ଯାତ୍ରୀଙ୍କୁ ଟିକେଟ୍ ଭଡାରେ ୨୦ ଟଙ୍କା ପର୍ଯ୍ୟନ୍ତ ସଞ୍ଚୟ କରିପାରିବେ । ଏହା ସହିତ ସାଧାରଣ ବର୍ଗର କୋଚଗୁଡିକରେ ସଂରକ୍ଷଣ ବ୍ୟବସ୍ଥା ସମ୍ପୂର୍ଣ୍ଣ ରଦ୍ଦ ହୋଇଯିବ । ଏହି ସିଷ୍ଟମ ୧ ଜୁଲାଇ ସୁଦ୍ଧା ସମ୍ପୂର୍ଣ୍ଣ ରୂପେ ଟ୍ରାକକୁ ଆସିବ ।
ଯାତ୍ରୀମାନେ ସାଧାରଣ ଟିକେଟରେ ଯେକୌଣସି ମେଲ୍ କିମ୍ବା ଏକ୍ସପ୍ରେସ ଟ୍ରେନରେ ଯାତ୍ରା କରିପାରିବେ । ବର୍ତ୍ତମାନ ଯାତ୍ରୀମାନଙ୍କୁ ସାଧାରଣ ଟିକେଟ୍ ଉପରେ ୧୫ ଟଙ୍କା, ସ୍ଲିପର ଉପରେ ୨୦, ଏସି-୩ ରେ ୪୦, ଏସି-୨ ରେ ୫୦ ଏବଂ ଏସି-୧ ରେ ୬୦ ଟଙ୍କା ରିଜର୍ଭେସନ ଚାର୍ଜ ଦେବାକୁ ପଡିବ ।
କରୋନା ସମୟରେ ରେଲୱେ ଟ୍ରେନରେ ଭିଡ଼କୁ ନିୟନ୍ତ୍ରଣ କରିବା ପାଇଁ ସାଧାରଣ କୋଚରେ ସଂରକ୍ଷଣ ବ୍ୟବସ୍ଥା ଲାଗୁ କରିଥିଲା । ସାଧାରଣ କୋଚରେ ଟିକେଟ୍ ବୁକ୍ କରିବା ପାଇଁ ଯାତ୍ରୀଙ୍କୁ ଭଡା ରାଶି ବ୍ୟତୀତ ୧୫ ଟଙ୍କା ରିଜର୍ଭେସନ୍ ଫି ଦେବାକୁ ପଡିବ । ସାଧାରଣ କୋଚରେ ଥିବା ସିଟ୍ ଖାଲି ଥିଲେ ମଧ୍ୟ ଟ୍ରେନ୍ ଛାଡିବାର ପ୍ରାୟ ଚାରି ଘଣ୍ଟା ପୂର୍ବରୁ ଟିକେଟ୍ ସଂରକ୍ଷଣ କରିବା ବାଧ୍ୟତାମୂଳକ ଥିଲା ।
ରେଲୱେର ସୂଚନା ଅନୁସାରେ, ଅଧିକାଂଶ ଟ୍ରେନରେ ସାଧାରଣ ଟିକେଟ୍ ସୁବିଧା ଆରମ୍ଭ ହୋଇଛି । ଆଜିଠାରୁ ପଶ୍ଚିମ କେନ୍ଦ୍ରୀୟ ରେଳବାଇର ଟ୍ରେନରେ ଏହି ବ୍ୟବସ୍ଥା ଆରମ୍ଭ ହେବ । ଏହା ପରେ, ଜୁଲାଇ ୫ ସୁଦ୍ଧା ୧୦୦ ପ୍ରତିଶତ ଟ୍ରେନରେ ସାଧାରଣ କୋଚ୍ ପାଇଁ ସଂରକ୍ଷଣ କରିବାର ବାଧ୍ୟତାମୂଳକ ରଦ୍ଦ ହେବ ।