ନାସାରେ କିପରି ହୁଏ ସିଲେକ୍ସନ? ଆସନ୍ତୁ ଜାଣିବା
ନାସାରେ କେତେ ପ୍ରକାରର ଚାକିରୀ ରହିଛି? କେତେ ଦରମା? କିପରି ଆବେଦନ କରିବେ? ଜାଣି ନିଅନ୍ତୁ..
ଓଡିଶା ଭାସ୍କର: ନାସାରେ କାମ କରିବା କେବଳ ଏକ ସମ୍ମାନଜନକ ସୁଯୋଗ ନୁହେଁ ବରଂ ମହାକାଶ ବିଜ୍ଞାନ, ଇଞ୍ଜିନିୟରିଂ ଏବଂ ପ୍ରଯୁକ୍ତିବିଦ୍ୟାରେ ଆଗ୍ରହୀ ଲୋକଙ୍କ ପାଇଁ ଏକ ସ୍ୱପ୍ନ। ତଥାପି, ବିଜ୍ଞାନ ଏବଂ ଇଞ୍ଜିନିୟରିଂ ବ୍ୟତୀତ, ନାସାରେ ଅନେକ ପ୍ରକାରର ଚାକିରି ରହିଛି। ତେବେ ଆସନ୍ତୁ ଜାଣିବା ସେସବୁ କଣ ଏବଂ ସେଥିରେ କେତେ ଦରମା ମିଳେ?
ନାସାରେ ଚାକିରୀ କରିବା ଏତେ ସହଜ ହୋଇନଥାଏ। ଏଥିରେ ଚାକିରୀ କରିବାକୁ ହେଲେ ପ୍ରାର୍ଥୀମାନଙ୍କର ଭଲ ଜ୍ଞାନ ଥିବା ଆବଶ୍ୟକ। ସେହି ଅନୁସାରେ, ଏଠାରେ ସ୍ୱତନ୍ତ୍ର ସୁବିଧା ଏବଂ ଦରମା ମଧ୍ୟ ମିଳିଥାଏ।
ଯଦିଓ ଅଧିକାଂଶ ଲୋକ ନାସାକୁ କେବଳ ମହାକାଶଚାରୀମାନଙ୍କ ପାଇଁ ଜାଣନ୍ତି, ତଥାପି ଅନ୍ୟାନ୍ୟ ଅନେକ ଚାକିରି ମଧ୍ୟ ଏଥିରେ ଅଛି। ନାସା ବୈଜ୍ଞାନିକ, ଇଞ୍ଜିନିୟର, ଟେକ୍ନିସିଆନ, ପ୍ରଶାସକ ଏବଂ ଅନ୍ୟାନ୍ୟ ବୃତ୍ତିଗତମାନଙ୍କର ଏକ ବଡ଼ ଟିମକୁ ନିଯୁକ୍ତି ଦିଏ। NASA ଚାକିରିଗୁଡ଼ିକ ଆମେରିକା ସରକାରଙ୍କ ସରକାରୀ ଚାକିରି ପୋର୍ଟାଲ୍ USAJOBS.gov ରେ ତାଲିକାଭୁକ୍ତ।
ଏଠାରେ ପ୍ରାର୍ଥୀମାନେ ସେମାନଙ୍କର CV ଦାଖଲ କରିପାରିବେ ଏବଂ ବୈଜ୍ଞାନିକ, ଇଞ୍ଜିନିୟର, ଟେକ୍ନିସିଆନ୍, କମ୍ପ୍ୟୁଟର ବୈଜ୍ଞାନିକ, ଡାଟା ବୈଜ୍ଞାନିକ, ସଫ୍ଟୱେର ଇଞ୍ଜିନିୟର, ମହାକାଶଚାରୀ ଭଳି ଚାକିରୀ କରିପାରିବେ। କେବଳ ବୈଷୟିକ ଚାକିରି ନୁହେଁ, NASA ପରିଚାଳନା, HR ଇତ୍ୟାଦି ଚାକିରି ପାଇଁ ମଧ୍ୟ ଆବେଦନ କରିପାରିବେ।
ଏଠାରେ ଥିବା ଅଧିକାଂଶ ବୈଷୟିକ ପଦବୀ ପାଇଁ ବିଜ୍ଞାନ, ପ୍ରଯୁକ୍ତିବିଦ୍ୟା, ଇଞ୍ଜିନିୟରିଂ ଏବଂ ଗଣିତ କ୍ଷେତ୍ରରେ ସ୍ନାତକ କିମ୍ବା ପିଏଚଡି ଡିଗ୍ରୀ ଆବଶ୍ୟକ। ଯଦି ପ୍ରାର୍ଥୀଙ୍କ ପାଖରେ ପୂର୍ବରୁ ଇଣ୍ଟର୍ନସିପ୍, ଗବେଷଣା ପ୍ରକଳ୍ପ କିମ୍ବା ବୈଷୟିକ ତାଲିମର ପ୍ରମାଣପତ୍ର ଅଛି, ତେବେ ଏଠାରେ ଚାକିରି ପାଇବା ସହଜ ହେବ।
ନାସାରେ ଜ୍ୟୋତିର୍ବିଜ୍ଞାନୀ, ଭୂତତ୍ତ୍ୱବିତ୍, ଜଳବାୟୁ ବୈଜ୍ଞାନିକ, ଜୀବବିଜ୍ଞାନୀ ଏବଂ ପଦାର୍ଥବିଜ୍ଞାନୀମାନଙ୍କୁ ମଧ୍ୟ ନିଯୁକ୍ତି ଦିଆଯାଏ। ଏହା ବ୍ୟତୀତ ମହାକାଶ ମିଶନରେ ଅଂଶଗ୍ରହଣ କରୁଥିବା ତାଲିମପ୍ରାପ୍ତ ବୃତ୍ତିଗତ, ପାଇଲଟ୍, ମିଶନ ବିଶେଷଜ୍ଞ, ପେଲୋଡ୍ ବିଶେଷଜ୍ଞ, ସାଇବର ସୁରକ୍ଷା ବିଶେଷଜ୍ଞ, ପ୍ରୋଜେକ୍ଟ ମ୍ୟାନେଜର, ଆର୍ଥିକ ବିଶ୍ଳେଷକ, ଲଜିଷ୍ଟିକ୍ସ ବିଶେଷଜ୍ଞ, ସୋସିଆଲ ମିଡିଆ ମ୍ୟାନେଜର, ମିଶନ ନିୟନ୍ତ୍ରଣ କର୍ମଚାରୀ, ସୁରକ୍ଷା ବିଶେଷଜ୍ଞ, ରୋବୋଟିକ୍ସ ବିଶେଷଜ୍ଞ, ଆନ୍ତର୍ଜାତୀୟ ମହାକାଶ ଆଇନ ଏବଂ ନୀତି ଉପରେ କାମ କରିବା ପାଇଁ ଆଇନ ବିଶେଷଜ୍ଞ ଇତ୍ୟାଦି ପଦବୀରେ ଚାକିରି ଉପଲବ୍ଧ।
କିପରି ଆବେଦନ କରିବେ: NASAରେ ଚାକିରି ଆବେଦନ କରିବା ପାଇଁ, ପ୍ରାର୍ଥୀମାନଙ୍କୁ USAJOBS ନାମକ ସରକାରୀ ୱେବସାଇଟକୁ ଦେଖିବାକୁ ପଡିବ। ଯଦି ନାସାରେ କୌଣସି ପଦବୀ ଖାଲିପଡ଼େ, ତେବେ ଏହାକୁ ଏହି ୱେବସାଇଟରେ ଯାଞ୍ଚ କରାଯାଇପାରିବ।
ଯଦି ଆପଣ ଆବେଦନ କରିବାକୁ ଚାହାଁନ୍ତି, ତେବେ ପ୍ରଥମେ ଆପଣଙ୍କୁ USAJOBS ୱେବସାଇଟରେ ଏକ ଆକାଉଣ୍ଟ ତିଆରି କରି CV ଅପଲୋଡ୍ କରିବାକୁ ପଡିବ।
ରିଜ୍ୟୁମ୍ ଅପଲୋଡ୍ କରିବା ପରେ, Hiring Paths ବିଭାଗକୁ ଯାଇ ଆପଣଙ୍କ ପସନ୍ଦର ଚାକିରି ବାଛି ତା’ର ସମ୍ପୂର୍ଣ୍ଣ ବିବରଣୀକୁ ଭଲଭାବେ ପଢ଼ନ୍ତୁ। ଯଦି ଆପଣ ଯୋଗ୍ୟ, ତେବେ “Apply” ବଟନ୍ କ୍ଲିକ୍ କରି CV ଆଟାଚ କରନ୍ତୁ।
ତା ପରେ ଏକ ଫର୍ମ ପୂରଣ କରି ତାକୁ ସବମିଟ କରି ୱେବସାଇଟର ହୋମପେଜକୁ ଫେରି ଆସନ୍ତୁ। ଏଥିରେ ଶେଷ ତାରିଖ ପୂର୍ବରୁ ଫର୍ମରେ ପରିବର୍ତ୍ତନ ମଧ୍ୟ ହୋଇପାରିବ।
ନାସାର ମହାକାଶଚାରୀଙ୍କ ଦରମା କେତେ? NASA ୱେବସାଇଟ୍ ଅନୁଯାୟୀ, ଏଠାରେ ମହାକାଶଚାରୀଙ୍କ ଦରମା ପ୍ରତିବର୍ଷ ପାଖାପାଖି 1.26 କୋଟି ଟଙ୍କା ପର୍ଯ୍ୟନ୍ତ ଥାଏ। ଦରମା ବ୍ୟତୀତ, ମହାକାଶଚାରୀମାନଙ୍କୁ ଅନ୍ୟାନ୍ୟ ସୁବିଧା ମଧ୍ୟ ଦିଆଯାଏ।
ଏହା ବ୍ୟତୀତ, ଯଦି କୌଣସି ମହାକାଶଚାରୀ ମହାକାଶ ମିଶନରେ ଯାଆନ୍ତି ଏବଂ ଏଥିରେ ଅଧିକ ଦିନ ଲାଗେ, ତେବେ ସେଥିପାଇଁ ମଧ୍ୟ ଅଲଗା ଟଙ୍କା ଦିଆଯାଏ।