‘ମହାଭାରତ’ର ଶ୍ରୀକୃଷ୍ଣ ଥାନାର ଦ୍ୱାରସ୍ଥ: IAS ପତ୍ନୀଙ୍କ ବିରୋଧରେ ମାନସିକ ନିର୍ଯାତନା ଅଭିଯୋଗ ଆଣିଲେ ଅଭିନେତା ନୀତିଶ ଭରଦ୍ୱାଜ

ନୂଆଦିଲ୍ଲୀ: ଟିଭି ସିରିୟଲ ‘ମହାଭାରତ’ରେ ଶ୍ରୀକୃଷ୍ଣ ଭୂମିକାରେ ଅଭିନୟ କରିଥିବା ଜଣାଶୁଣା ଅଭିନେତା ନୀତିଶ ଭରଦ୍ୱାଜ ଥାନାର ଦ୍ୱାରସ୍ଥ ହୋଇଛନ୍ତି । ନୀତିଶ ତାଙ୍କ ଆଇଏଏସ ପତ୍ନୀ ସ୍ମିତା ଭରଦ୍ୱାଜଙ୍କ ବିରୋଧରେ ପୋଲିସରେ ଏକ ଏଫଆଇଆର ଦାୟର କରିଛନ୍ତି । ସ୍ମିତା ତାଙ୍କୁ ଦୀର୍ଘ ଦିନ ହେଲା ମାନସିକ ନିର୍ଯାତନା ଦେଇ ଆସୁଥିବା ନୀତିଶ ଅଭିଯୋଗ ପତ୍ରରେ ଉଲ୍ଲେଖ କରିଛନ୍ତି ।

ନିଜ ଅଭିଯୋଗ ପତ୍ରରେ ଅଭିନେତା ଦର୍ଶାଇଛନ୍ତି, ମଧ୍ୟପ୍ରଦେଶ କ୍ୟାଡରର ଆଇଏଏସ ଅଫିସର ଥିବା ତାଙ୍କର ପତ୍ନୀ ସ୍ମିତା ତାଙ୍କୁ ଦୀର୍ଘଦିନ ହେଲା ମାନସିକ ନିର୍ଯାତନା ଦେଇ ଆସୁଛନ୍ତି । ସ୍ମିତା ତାଙ୍କୁ ତାଙ୍କର ଯମଜ କନ୍ୟାଙ୍କ ଠାରୁ ଦୂରେଇ ରଖିଛନ୍ତି । ସେନେଇ ସେ ମାନସିକ ଭାବେ ଭାଙ୍ଗି ପଡ଼ିଛନ୍ତି । ଏନେଇ ନୀତିଶ ଭୋପାଳ ପୋଲିସ କମିଶନରଙ୍କୁ ଇ-ମେଲ ଜରିଆରେ ସହାୟତା ମାଗିଛନ୍ତି । ତେଣୁ ନୀତିଶଙ୍କ ଅଭିଯୋଗ ଆଧାରରେ ଭୋପାଳ ପୋଲିସ କମିଶନର ମାମଲାର ଯାଞ୍ଚ ଆଦେଶ ଦେଇଛନ୍ତି । ଜଣେ ଅତିରିକ୍ତ ଡିସିପିଙ୍କୁ ମାମଲା ଯାଞ୍ଚ ଦାୟିତ୍ୱ ଦିଆଯାଇଛି ।

ସୂଚନାଯୋଗ୍ୟ ଯେ, ନୀତିଶ ‘ମହାଭାରତ’ର ଶ୍ରୀକୃଷ୍ଣ ଭୂମିକାରେ ଅଭିନୟ କରି ଘରେ ଘରେ ବେଶ୍ ପରିଚିତ ହୋଇ ପାରିଥିଲେ । ଆଜି ବି ଫ୍ୟାନ୍ସ ତାଙ୍କୁ ଶ୍ରୀକୃଷ୍ଣ ଭୂମିକା ପାଇଁ ମନେ ପକାଉଛନ୍ତି । ୨୦୦୯ ମସିହା ମସିହା ମାର୍ଚ୍ଚ ମାସ ୧୪ ତାରିଖରେ ଆଇଏଏସ ଅଫିସର ସ୍ମିତାଙ୍କୁ ନୀତିଶ ଦ୍ୱିତୀୟ ବିବାହ କରିଥିଲେ । ୨୦୧୯ ମସିହା ସେପ୍ଟେମ୍ବରରେ ସେମାନଙ୍କର ସମ୍ପର୍କ ଭାଙ୍ଗିଯାଇଥିଲା ଓ ୨୦୨୨ରେ ଦୁହେଁ ଅଲଗା ହୋଇଯାଇଥିଲା । ସ୍ମିତା ତାଙ୍କର ଯମଜ କନ୍ୟାଙ୍କ ସହିତ ଇନ୍ଦୋରରେ ରହୁଥିଲେ ।