ସମାଜସେବୀ ନୀଲମବେନ ପାରିଖ ଆଉ ନାହାନ୍ତି, ଗାନ୍ଧୀବାଦୀ ଚିନ୍ତାଧାରାରେ ଥିଲେ ଅନୁପ୍ରାଣିତ

ଅହମଦାବାଦ୍: ଗୁଜୁରାଟର ନଭସରୀରେ ଜାତିର ପିତା ମହାତ୍ମା ଗାନ୍ଧୀଙ୍କ ଅଣନାତୁଣୀ ନୀଲମବେନ ପାରିଖଙ୍କ ପରଲୋକ ଘଟିଛି । ମଙ୍ଗଳବାର ଦିନ ନୀଲମବେନ ନିଜ ଶେଷ ନିଶ୍ୱାସ ତ୍ୟାଗ କରିଛନ୍ତି ।

ମୃତ୍ୟୁବେଳକୁ ତାଙ୍କୁ ୯୩ ବର୍ଷ ବୟସ ହୋଇଥିଲା । ସ୍ୱଭାବରେ ସେ ଜଣେ ଗାନ୍ଧୀବାଦୀ ଥିଲେ । ସମାଜମଙ୍ଗଳ କାର୍ଯ୍ୟରେ ସେ ନିଜର ଜୀବନକୁ ଉତ୍ସର୍ଗ କରିଦେଇଥିଲେ । ବିଶେଷ କରି ନାରୀ ଶସକ୍ତିକରଣ ଏବଂ ଗ୍ରାମିଣ ବିକାଶ କ୍ଷେତ୍ରରେ ସେ କାମ କରୁଥିଲେ ।

ପୁଅ ଡା. ସମୀର ପାରିଖଙ୍କ ପାଖରେ ରହୁଥିଲେ ନୀଲମବେନ । ସେ ଏକ ଅନୁଷ୍ଠାନ ତିଆରି କରିଥିଲେ, ଯାହାର ନାଁ ଥିଲା ଦକ୍ଷିଣାପଥ । ଏହା ଜରିଆରେ ନୀଲମବେନ ଆଦିବାସୀ ମହିଳାମାନଙ୍କୁ କୁଶଳୀ ହେବାର କଳା ଶିଖାଉ ଥିଲେ ।ଏହାଛଡ଼ା ଗ୍ରାମିକ ଲୋକଙ୍କ ବିକାଶ ଦିଗରେ ନୀଲମବେନ ଏବଂ ସ୍ୱାମୀ ୟୋଗେନ୍ଦ୍ର ଭାଇ କାମ କରୁଥିଲେ ।

ଲେଖାଲେଖି କରିବା ମଧ୍ୟ ନୀଲମବେନଙ୍କୁ ପସନ୍ଦ ଥିଲା । ସେ ଏକ ପୁସ୍ତକ ଲେଖିଥିଲେ, ଯାହାର ନାଁ ଥିଲା ‘ଗାନ୍ଧୀଜ୍ ଲଷ୍ଟ ଜୁଏଲ୍: ହରିଲାଲ୍ ଗାନ୍ଧୀ’ । ଏହି ବହି ଜରିଆରେ ନୀଲମ ବେନ୍ ମହାତ୍ମା ଗାନ୍ଧୀ ଏବଂ ଜେଜେବାପାଙ୍କ ସମ୍ପର୍କ ବିଷୟରେ ଆଲୋକପାତ କରିଛନ୍ତି ।