କରୋନା ଭୟରେ ୨ ବର୍ଷ ଧରି ଘରେ ଲୁଚିଥିଲେ ମା’ ଓ ଝିଅ; ଜାଣନ୍ତୁ କାହିଁକି କଲେ ଏପରି
ନୂଆଦିଲ୍ଲୀ: ଦୁନିଆରେ ପୁଣି ଥରେ କରୋନା ଭାଇରସ୍ ସଂକ୍ରମଣ ବୃଦ୍ଧି ପାଇବାରେ ଲାଗିଛି । ଚୀନ୍ରେ କରୋନା ମହାମାରୀ ଭୟଙ୍କର ଭାବେ ବ୍ୟାପିବାରେ ଲାଗିଛି । ତେବେ ଭାରତରେ ମାମଲା କମ୍ ଥିଲେ ମଧ୍ୟ ସ୍ୱାସ୍ଥ୍ୟ ମନ୍ତ୍ରଣାଳୟ ଆଜି ଏକ ଗୁରୁତ୍ୱପୂର୍ଣ୍ଣ ବୈଠକ ଡାକିଥିଲେ । ସେପଟେ ଆନ୍ଧ୍ରପ୍ରଦେଶର କାକିନାଡା ଜିଲ୍ଲାରୁ ଏକ ଆଶ୍ଚର୍ଯ୍ୟଜନକ ମାମଲା ସାମ୍ନାକୁ ଆସିଛି । ଏଠାରେ ଦୁଇଜଣ ମହିଳା କୋଭିଡ ସଂକ୍ରମିତ ହେବା ଭୟରେ ନିଜକୁ ଦୁଇ ବର୍ଷ ପର୍ଯ୍ୟନ୍ତ ଘରେ ବନ୍ଦ ରଖିଥିଲେ । ଏହି ଆଶ୍ଚର୍ଯ୍ୟଜନକ ଘଟଣା କାକିନାଡାର କୁଏରୁ ଗାଁରୁ ସାମ୍ନାକୁ ଆସିଛି । ସ୍ତ୍ରୀ ଓ ଝିଅର ଅବସ୍ଥା ଖରାପ ହେବା ସମ୍ପର୍କରେ ପରିବାର ମୁଖ୍ୟ ଅଧିକାରୀଙ୍କୁ ସୂଚନା ଦେଇଥିଲେ, ପରେ ଉଭୟଙ୍କୁ କାକିନାଡାସ୍ଥିତ ସରକାରୀ ଡାକ୍ତରଖାନାରେ ଭର୍ତ୍ତି କରାଯାଇଥିଲା ।
ସ୍ୱାସ୍ଥ୍ୟ କର୍ମୀମାନେ ଦୁଇ ଜଣ ମହିଳାଙ୍କୁ ନେବାକୁ ପହଞ୍ଚିଥିଲେ । ପ୍ରଥମେ ମହିଳାମାନେ କୋଠରୀର କବାଟ ଖୋଲିବାକୁ ମନା କରିଦେଇଥିଲେ । ଏହା ପରେ କୌଣସି ପ୍ରକାରେ ମହିଳା ସ୍ୱାସ୍ଥ୍ୟ କର୍ମୀମାନେ ତାଙ୍କୁ କବାଟ ଖୋଲିବାକୁ କହିଥିଲେ ଏବଂ ତାଙ୍କୁ ଜବରଦସ୍ତ ଡାକ୍ତରଖାନାକୁ ନିଆଯାଇଥିଲା । ସ୍ଥାନୀୟ ଅଧିକାରୀ କହିଛନ୍ତି ଯେ ଉଭୟ ମହିଳା ମାନସିକ ସ୍ତରରେ ଅସୁସ୍ଥ ଥିବା ସନ୍ଦେହ କରାଯାଉଛି ।
କାକିନାଡ଼ା ଅଞ୍ଚଳର ମଣି ଏବଂ ତାଙ୍କ ଝିଅ ଦୁର୍ଗା ଭବାନୀ କୋଭିଡ ମହାମାରୀ ପରେ ୨୦୨୦ ରେ ଘରର ଚାରି କାନ୍ଥରେ ନିଜକୁ ସୀମିତ ରଖିଥିଲେ । କିନ୍ତୁ କରୋନା ମହାମାରୀ ନିୟନ୍ତ୍ରଣକୁ ଆସିଥିଲେ ମଧ୍ୟ ମା-ଝିଅ ନିଜକୁ ଅଲଗା ରଖିଥିଲେ । ମଣିଙ୍କ ସ୍ୱାମୀ ତାଙ୍କୁ ଖାଦ୍ୟ ଏବଂ ପାଣି ଦେଉଥିଲେ କିନ୍ତୁ ସେ ଗତ ଏକ ସପ୍ତାହ ଧରି ତାଙ୍କ କୋଠରୀରେ ପ୍ରବେଶ କରିବାକୁ ଅନୁମତି ଦେଉ ନଥିଲେ । ଏହା ପରେ ସେ ସ୍ଥାନୀୟ କର୍ତ୍ତୃପକ୍ଷଙ୍କୁ ଏ ବିଷୟରେ ସୂଚନା ଦେଇଥିଲେ ।
ରାଜ୍ୟରେ ଏହା ହେଉଛି ଦ୍ୱିତୀୟ ଘଟଣା । କାରଣ ଗତ ବର୍ଷ ଜୁଲାଇ ମାସରେ ପୂର୍ବ ଗୋଦାବରୀ ଜିଲ୍ଲାରୁ ଏଭଳି ଏକ ସମାନ ଘଟଣା ସାମ୍ନାକୁ ଆସିଥିଲା । କୋଭିଡ ସଂକ୍ରମିତ ହେବା ଭୟ ହେତୁ ତିନିଜଣ ମହିଳା ନିଜ ଘରେ ପ୍ରାୟ ୧୫ ମାସ ଧରି ଲୁଚି ରହିଥିଲେ ।
