Online Payment ଫେଲ୍ ହେଲେ ବ୍ୟସ୍ତ ନ ହୋଇ ତୁରନ୍ତ କରନ୍ତୁ ଏହି କାମ, ଦୂର ହେବ ସମସ୍ୟା

ମୁମ୍ୱାଇ: ନ୍ୟାସନାଲ ଅଟୋମେଟେଡ୍ କ୍ଲିୟରିଂ ହାଉସ୍ (ଏନଏସିଏଚ୍) ହେଉଛି ଏକ ଇଲେକ୍ଟ୍ରୋନିକ୍ ସିଷ୍ଟମ, ଯାହା ସାହାଯ୍ୟରେ ବ୍ୟାଙ୍କ ନଯାଇ ଯେକୌଣସି ପ୍ରକାରର ଦେୟ ପ୍ରଦାନ କରାଯାଏ। ଏହା ଜରିଆରେ ବିଦ୍ୟୁତ ବିଲ୍ ଠାରୁ ଆରମ୍ଭ କରି ମୋବାଇଲ୍ ବିଲ୍ ପର୍ଯ୍ୟନ୍ତ ପେମେଣ୍ଟ କରାଯାଇପାରିବ। ଋଣ, କ୍ରେଡିଟ୍ କାର୍ଡ, ମ୍ୟୁଚୁଆଲ ଫଣ୍ଡ ଏବଂ ବୀମା ପଲିସିର କିସ୍ତି ମଧ୍ୟ ଦେଇପାରିବେ। ଏନଏସିଏଚ ହେଉଛି ଆରବିଆଇ ଦ୍ୱାରା ଆରମ୍ଭ କରାଯାଇଥିବା ଏକ ବ୍ୟବସ୍ଥା, ଯାହା ସାହାଯ୍ୟରେ ଶ୍ରମିକମାନଙ୍କୁ ମାସିକ ଦରମା ଭଳି ବଲ୍କ ପେମେଣ୍ଟ ମଧ୍ୟ କରାଯାଇଥାଏ।

ଭାରତ ସରକାରଙ୍କ ଅନେକ ଅଂଶୀଦାର ସଂସ୍ଥା ମଧ୍ୟ ଏହି ବ୍ୟବସ୍ଥାର ବ୍ୟବହାର କରି ଯୋଜନାର ହିତାଧିକାରୀଙ୍କ ଆକାଉଣ୍ଟକୁ ଟଙ୍କା ଟ୍ରାନ୍ସଫର କରିଥାନ୍ତି। ଏଥିରେ ଏକାସାଙ୍ଗରେ କୋଟି କୋଟି ଟଙ୍କା ପ୍ରଦାନ କରାଯାଉଛି। ଲୋକଙ୍କ ଆକାଉଣ୍ଟରେ ଦରମା ଓ ପେନସନ ଜମା କରିବା ପାଇଁ ମଧ୍ୟ ସରକାର ଏହି ବ୍ୟବସ୍ଥା ବ୍ୟବହାର କରୁଛନ୍ତି। ତେବେ ଏନଏସିଏଚ୍ ଜରିଆରେ ଦେୟ ମଧ୍ୟ ଅନେକ ଥର ବିଫଳ ହୋଇଥାଏ। ଏଭଳି ସ୍ଥିତିରେ ଆପଣଙ୍କ ପାଖରେ କ’ଣ ବିକଳ୍ପ ରହିଛି ତାହା ଜାଣିବା ଜରୁରୀ।

ଏହି ପରିସ୍ଥିତିରେ ପ୍ରଥମେ ଆପଣଙ୍କ ବ୍ୟାଙ୍କ ସହ ଯୋଗାଯୋଗ କରନ୍ତୁ କିମ୍ବା ଆପଣଙ୍କ ବ୍ୟାଙ୍କ ଷ୍ଟେଟମେଣ୍ଟ ଯାଞ୍ଚ କରନ୍ତୁ ଯେ ଆକାଉଣ୍ଟରେ କମ୍ ଟଙ୍କା ଅଛି କି ନାହିଁ କିମ୍ବା ଦେୟ ବିଫଳ ହେବା କାରଣରୁ କୌଣସି ବୈଷୟିକ ତ୍ରୁଟି ନାହିଁ। ଯଦି ଆକାଉଣ୍ଟରେ କମ୍ ଟଙ୍କା ଯୋଗୁଁ ଦେୟ ବିଫଳ ହୋଇଛି, ତେବେ ତୁରନ୍ତ ଆକାଉଣ୍ଟରେ ଟଙ୍କା ଜମା କରନ୍ତୁ ଏବଂ ଯଦି ଆଦେଶ ଅବଧି ଶେଷ ହୋଇଛି, ତେବେ ଏହାକୁ ନବୀକରଣ କରିବାକୁ ଆପଣଙ୍କ ସେବା ପ୍ରଦାନକାରୀ କିମ୍ବା ଋଣଦାତାଙ୍କ ସହ ଯୋଗାଯୋଗ କରନ୍ତୁ। ପେମେଣ୍ଟ ପାଇଁ ନେଟ୍ ବ୍ୟାଙ୍କିଂ, ୟୁପିଆଇ କିମ୍ବା ଚେକ୍ ଭଳି ବିକଳ୍ପ ଉପାୟ ମଧ୍ୟ ଆପଣାଇପାରିବେ। ଜରିମାନାରୁ ବର୍ତ୍ତିବା ପାଇଁ ଆପଣ ମାନୁଆଲି ମଧ୍ୟ ଦେୟ ଦେଇପାରିବେ।