ଆସନ୍ତାକାଲି ମହିଳା ଫୁଟ୍ବଲ ଦଳର ଫାଇନାଲ ମ୍ୟାଚ; ମଣିପୁର ସହ ଲଢ଼ିବ ଓଡ଼ିଶା
ଓଡିଶା ଭାସ୍କର; ଆସନ୍ତାକାଲି ଓଡ଼ିଶା ମହିଳା ଫୁଟ୍ବଲ ଦଳର ଫାଇନାଲ ମ୍ୟାଚ । ଗୋଆରେ ଚାଲିଥିବା ଜାତୀୟ କ୍ରୀଡ଼ାର ଫାଇନାଲ ମ୍ୟାଚରେ ମୁହାଁମୁହିଁ ହେବେ ଓଡିଶା ଓ ମଣିପୁର । ଏଥିପାଇଁ ସମସ୍ତ ରାଜ୍ୟବାସୀ ବେଶ ଉତ୍ସାହିତ ରହିଛନ୍ତି । ଶୁକ୍ରବାର ଅନୁଷ୍ଠିତ ବହୁ ସଂଘର୍ଷପୂର୍ଣ୍ଣ ପ୍ରଥମ ସେମିଫାଇନାଲରେ ଓଡ଼ିଶା ପେନାଲ୍ଟି ଶୁଟ୍ ଆଉଟ ୫-୪ ଗୋଲରେ ବେଙ୍ଗଲକୁ ହରାଇ ଫାଇନାଲରେ ପ୍ରବେଶ କରିଛି।
ସୂଚନା ଥାଉକି, ଗତକାଲି ମ୍ୟାଚ ଆରମ୍ଭରୁ ଓଡିଶା-ବେଙ୍ଗଲ ମଧ୍ୟରେ କଡ଼ା ଟକ୍କର ଦେଖା ଦେଇଥିଲା। ଉଭୟ ଦଳ ଫାଇନାଲରେ ପ୍ରବେଶ କରିବା ଲକ୍ଷ୍ୟ ନେଇ ଲଢେଇକୁ ଜୋରଦାର କରିଥିଲେ। ପ୍ରଥମାର୍ଦ୍ଧ ଗୋଲଶୂନ୍ୟ ରହିବା ପରେ ଦ୍ୱିତୀୟାର୍ଦ୍ଧ ମ୍ୟାଚ ସ୍ୱାଭାବିକ ଭାବେ ରୋମାଞ୍ଚକ ହୋଇଥିଲା। ମାତ୍ର ନିର୍ଦ୍ଧାରତ ସମୟରେ ମ୍ୟାଚ ଗୋଲଶୂନ୍ୟ ରହିବାରୁ ଫଳାଫଳ ନିର୍ଣ୍ଣୟ ପାଇଁ ପେନାଲ୍ଟି ଶୁଟ୍ ଆଉଟ ପଦ୍ଧତି ଅବଲମ୍ବନ କରାଯାଇଥିଲା। ଏଥିରେ ଓଡ଼ିଶାକୁ ଭାଗ୍ୟଦେବୀ ସହାୟ ହୋଇଥିଲେ ଏବଂ ଦଳ ୫-୪ ଗୋଲରେ ବିଜୟୀ ହୋଇଥିଲା।
ଶୁଟ୍ ଆଉଟ ପର୍ଯ୍ୟାୟରେ ଓଡ଼ିଶା ପକ୍ଷରୁ ଜବାମଣି ଟୁଡୁ, ଅଧିନାୟିକା ସୁପ୍ରିୟା ରାଉତରାୟ, ଗ୍ରେସ୍ ଲାଲରାମପରି ହୌହନର,ପ୍ୟାରୀ ଖାଖା ଓ ଏସ୍. ଲିଣ୍ଡା କୋମ୍ ଗୋଲ ସ୍କୋର କରିଥିଲେ। ବେଙ୍ଗଲ ପକ୍ଷରୁ ସୁମିତ୍ରା ମାରାଣ୍ଡି, ଅଧିନାୟିକା ରନତା ହାଲଦାର, ସୁଲଞ୍ଜନା ରାଉଳ ଓ ଏନ୍ଗଙ୍ଗୋମ୍ ଆନିବାଲା ଦେବୀ ଗୋଲ ଦେବାରେ ସକ୍ଷମ ହୋଇଥିଲେ। ତେବେ ଗତକାଲି ସେମି ଫାଇନାଲ ମ୍ୟାଚ ଶେଷ ହୋଇଥିବା ବେଳେ ଆସନ୍ତାକାଲି ଫାଇନାଲ ମ୍ୟାଚ ଅନୁଷ୍ଠିତ ହେବାକୁ ଯାଉଛି । ଏହି ଫାଇନାଲ ମ୍ୟାଚରେ ଓଡିଶା ଓ ମଣିପୁର ମହିଳା ଦଳ ମୁହାଁମୁହିଁ ହେବେ ।
