୨୦୨୮ ଅଲିମ୍ପିକ୍ସରୁ ବାଦ ପଡ଼ିଲା ପାକିସ୍ତାନ, ଭାରତକୁ ମିଳିଲା ଅଗ୍ରାଧିକାର
ନୂଆଦିଲ୍ଲୀ: ୨୦୨୮ରେ ଲସ୍ ଏଞ୍ଜେଲ୍ସରେ ଅନୁଷ୍ଠିତ ହେବାକୁ ଥିବା ଅଲିମ୍ପିକ୍ସରେ ପାକିସ୍ତାନ ପୁରୁଷ କ୍ରିକେଟ ଦଳ ଅଂଶଗ୍ରହଣ କରିବ ନାହିଁ ବୋଲି ଏକ ରିପୋର୍ଟରେ ଦାବି କରାଯାଇଛି। ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି) ଆଞ୍ଚଳିକ କ୍ୱାଲିଫାଇଂ ଫର୍ମାଟ ଅନୁସରଣ କରିବାକୁ ନିଷ୍ପତ୍ତି ନେଇଛି, ଯାହାଦ୍ୱାରା ପାକିସ୍ତାନ ଓ ନ୍ୟୁଜିଲାଣ୍ଡ ଭଳି ଦଳଗୁଡ଼ିକ ୧୨୮ ବର୍ଷ ପରେ ଅଲିମ୍ପିକ୍ସରେ କ୍ରିକେଟର ପୁନରାଗମନ ସତ୍ତ୍ୱେ ଏହି ଇଭେଣ୍ଟରୁ ବାଦ ପଡ଼ିବେ।
ରିପୋର୍ଟ ଅନୁସାରେ, ଏସିଆ, ଓସେନିଆ, ୟୁରୋପ ଓ ଆଫ୍ରିକାର ନମ୍ବର-୧ ର୍ୟାଙ୍କ ପ୍ରାପ୍ତ ଦଳ ଏବଂ ଆମେରିକା ମହାଦେଶର ପ୍ରତିନିଧିତ୍ୱ କରୁଥିବା ଆୟୋଜକ ଆମେରିକା ସ୍ୱୟଂଚାଳିତ ଭାବେ କ୍ୱାଲିଫାଇ କରିବ। ଦି ଗାର୍ଡିଆନର ରିପୋର୍ଟ ଅନୁଯାୟୀ, “ଆଇସିସି ର୍ୟାଙ୍କିଂ ଆଧାରରେ ଏସିଆରୁ ଭାରତ ଓ ଓସେନିଆରୁ ଅଷ୍ଟ୍ରେଲିଆକୁ ସ୍ଥାନ ଦିଆଯିବ। ଅନ୍ତର୍ଜାତୀୟ ଅଲିମ୍ପିକ କମିଟି (ଆଇଓସି) ବିଶ୍ୱର ସମସ୍ତ ଅଞ୍ଚଳର ପ୍ରତିନିଧିତ୍ୱ ନିଶ୍ଚିତ କରିବା ପାଇଁ ଆଞ୍ଚଳିକ କ୍ୱାଲିଫିକେସନକୁ ପସନ୍ଦ କରୁଛି।” ଯୁକ୍ତରାଷ୍ଟ୍ର ଆୟୋଜକ ଭାବେ କ୍ୱାଲିଫାଇ କରୁଥିବାରୁ ୱେଷ୍ଟଇଣ୍ଡିଜର ସୁଯୋଗ ମଧ୍ୟ କ୍ଷୀଣ ହୋଇଛି।
ମୋଟ ଛଅଟି ଦଳ ଏହି ଇଭେଣ୍ଟ ପାଇଁ ଚୟନ ହେବେ। ପାଞ୍ଚଟି ସ୍ଥାନ ପାଇଁ କ୍ୱାଲିଫିକେସନ ପ୍ରକ୍ରିୟା ଚୂଡ଼ାନ୍ତ ହୋଇଥିବା ବେଳେ ଷଷ୍ଠ ଦଳ ପାଇଁ ପ୍ରକ୍ରିୟା ଏପର୍ଯ୍ୟନ୍ତ ନିର୍ଦ୍ଧାରଣ ହୋଇନାହିଁ।
କ୍ରିକେଟ ୨୦୨୮ ଲସ୍ ଏଞ୍ଜେଲ୍ସ ଅଲିମ୍ପିକ୍ସରେ ଟି-୨୦ ଫର୍ମାଟରେ ପୁନରାଗମନ କରିବ, ଯେଉଁଠାରେ ପୁରୁଷ ଓ ମହିଳା ବିଭାଗରେ ଛଅଟି ଲେଖାଏଁ ଦଳ ଓ ୧୮୦ ଜଣ ଖେଳାଳି ଅଂଶଗ୍ରହଣ କରିବେ। ମ୍ୟାଚ୍ଗୁଡ଼ିକ ଲସ୍ ଏଞ୍ଜେଲ୍ସରୁ ୫୦ କିମି ଦୂର ପୋମେନାର ଫେୟାରଗ୍ରାଉଣ୍ଡ ଷ୍ଟାଡିୟମରେ ଜୁଲାଇ ୧୨ରୁ ଆରମ୍ଭ ହେବ ଏବଂ ମେଡାଲ ମ୍ୟାଚ୍ ଜୁଲାଇ ୨୦ ଓ ୨୯ରେ ଅନୁଷ୍ଠିତ ହେବ।
କ୍ରିକେଟ ଏକମାତ୍ର ଥର ୧୯୦୦ ମସିହାରେ ପ୍ୟାରିସ ଅଲିମ୍ପିକ୍ସରେ ଖେଳାଯାଇଥିଲା, ଯେଉଁଠାରେ ଗ୍ରେଟ ବ୍ରିଟେନ ଓ ଫ୍ରାନ୍ସ ମଧ୍ୟରେ ଦୁଇ ଦିନିଆ ମ୍ୟାଚରେ ଗ୍ରେଟ ବ୍ରିଟେନ ସ୍ୱର୍ଣ୍ଣ ପଦକ ଜିତିଥିଲା। ପ୍ରତ୍ୟେକ ବିଭାଗରେ ୯୦ ଜଣ ଖେଳାଳିଙ୍କ କୋଟା ସହ ୧୨ଟି ଦଳ ୧୫ ଜଣିଆ ସ୍କ୍ୱାଡ ନାମାଙ୍କନ କରିପାରିବେ।
କ୍ରିକେଟର ବର୍ଦ୍ଧିତ ଲୋକପ୍ରିୟତା ୨୦୨୪ ଟି-୨୦ ବିଶ୍ୱକପରେ ଯୁକ୍ତରାଷ୍ଟ୍ରର ଗ୍ରାଣ୍ଡ ପ୍ରେରୀ, ଲାଉଡରହିଲ ଓ ନିଉୟର୍କରେ ଆୟୋଜିତ ମ୍ୟାଚଗୁଡ଼ିକରୁ ଜଣାପଡ଼ିଛି। ଆଇଓସି କ୍ରିକେଟ ସମେତ ବେସବଲ/ସଫ୍ଟବଲ, ଫ୍ଲାଗ ଫୁଟବଲ, ଲାକ୍ରୋସ (ସିକ୍ସେସ) ଓ ସ୍କ୍ୱାସକୁ ୨୦୨୮ ଅଲିମ୍ପିକ୍ସରେ ନୂତନ ଖେଳ ଭାବେ ଅନୁମୋଦନ କରିଛି।