IND vs BAN; କୋହଲି ନୁହେଁ, ଓପନିଙ୍ଗ କରିବେ ଋଷଭ ପନ୍ତ! ବ୍ୟାଟିଂ ଅର୍ଡରରେ ରୋହିତ କରିବେ ‘ବିରାଟ’ ପରିବର୍ତ୍ତନ

ନୂଆଦିଲ୍ଲୀ: ଆଜି ସୁପର-୮ ମୁକାବିଲାରେ ମୁହାଁମୁହିଁ ହେବେ ଭାରତ ଏବଂ ବାଂଲାଦେଶ । ଲିଗ୍ ପର୍ଯ୍ୟାୟ ଏବଂ ସୁପର-୮ର ପ୍ରଥମ ମ୍ୟାଚରେ ବିଜୟ ହାସଲ କରି ଟିମ ଇଣ୍ଡିଆର ଆତ୍ମବିଶ୍ୱାସ ଖୁବ ଉଚ୍ଚରେ ରହିଛି । ସେପଟେ ଦ୍ୱିତୀୟ ପର୍ଯ୍ୟାୟର ପ୍ରଥମ ମ୍ୟାଚରେ ଅଷ୍ଟ୍ରେଲିଆ ପାଖରୁ ପରାସ୍ତ ହୋଇଛି ବାଂଲାଦେଶ । ତେଣୁ ଏହି ମ୍ୟାଚରେ କମବ୍ୟାକ ଆଶାରେ ମଇଦାନକୁ ଓହ୍ଲାଇବ ସାଣ୍ଟୋ ସେନା । ଭାରତୀୟ ଦଳ ସମ୍ପୂର୍ଣ୍ଣ ସନ୍ତୁଳିତ ରହିଥିଲେ ମଧ୍ୟ ବିରାଟ କୋହଲିଙ୍କ ଫର୍ମ ରୋହିତଙ୍କ ପାଇଁ ଚିନ୍ତାର ବିଷୟ ପାଲଟିଛି । ତେଣୁ ଆଜି ବ୍ୟାଟିଂ ଅର୍ଡରରେ ଏକ ବଡ଼ ପରିବର୍ତ୍ତନ କରିପାରନ୍ତି ଅଦିନାୟକ ରୋହିତ ଶର୍ମା ।

ଟି-୨୦ ବିଶ୍ୱକପରେ ବିରାଟ ୪ଟି ମ୍ୟାଚରେ ଓପନିଙ୍ଗ କରିଥିଲେ ମଧ୍ୟ ବର୍ତ୍ତମାନ ସୁଦ୍ଧା ଆଶାନୁଯାୟୀ ପାଳି ଖେଳି ପାରି ନାହାନ୍ତି । ତେଣୁ ଆଗକୁ ନକ୍ ଆଉଟ୍ ମ୍ୟାଚକୁ ଦୃଷ୍ଟିରେ ରଖି ରୋହିତ ବାଂଲାଦେଶ ବିପକ୍ଷ ମ୍ୟାଚରେ ରଣନୀତି ପରିବର୍ତ୍ତନ କରିପାରନ୍ତି । ବିରାଟଙ୍କ ସ୍ଥାନରେ ଓପନିଙ୍ଗ ପାର୍ଟନର ପରିବର୍ତ୍ତନ କରିପାରନ୍ତି ରୋହିତ । ୩ ନମ୍ବରରେ ବିରାଟଙ୍କୁ ସୁଯୋଗ ଦେଇ ତାଙ୍କୁ ପୁରୁଣା ଲୟକୁ ଫେରିବାର ସୁଯୋଗ ଦିଆ ଯାଇପାରେ । ତେବେ ଏମିତି ହେଲେ ରୋହିତଙ୍କ ସହ ପାଳି ଆରମ୍ଭ କରିବା ପାଇଁ ଋଷଭ ପନ୍ତଙ୍କୁ ଦାୟିତ୍ୱ ମିଳିପାରେ । ବିରାଟ ଏ ପର୍ଯ୍ୟନ୍ତ ୪ଟି ମ୍ୟାଚରେ ଓପନିଙ୍ଗ କରିଥିବା ବେଳେ ସେ ୧,୪,୦ ଏବଂ ୨୪ ରନ୍ ସ୍କୋର କରିଛନ୍ତି । ତେଣୁ ତାଙ୍କ ବ୍ୟାଟରୁ ବିସ୍ଫୋରକ ଇନିଂସକୁ ଆଶା କରି ବ୍ୟାଟିଂ ଅର୍ଡରରେ ୩ ନମ୍ବରରେ ତାଙ୍କୁ ଖେଳାଇପାରନ୍ତି ରୋହିତ ଏବଂ ଦ୍ରାବିଡ ।

ସେପଟେ ବିରାଟ କୋହଲିଙ୍କୁ ନେଇ ଦଳରେ ଦେଖା ଦେଇଥିବା ଏହି ସମସ୍ୟାର ଏକମାତ୍ର ସମାଧାନ ହେଉଛନ୍ତି ଋଷଭ ପନ୍ତ । ବିଶ୍ୱକପରେ କମବ୍ୟାକ କରି ଦମଦାର ବ୍ୟାଟିଂ ପ୍ରଦର୍ଶନ କରୁଥିବା ଋଷଭ ବିରାଟଙ୍କ ସ୍ଥାନରେ ଓପନିଙ୍ଗ କରିବା ପାଇଁ ଏକଦମ୍ ଫିଟ୍ ରହିଛନ୍ତି । ରୋହିତଙ୍କ ସହ ଋଷଭ ପାଳି ଆରମ୍ଭ କଲେ, ବିରାଟ ୩ ନମ୍ବରରେ ଟିମ ଇଣ୍ଡିଆକୁ ବଡ଼ ସ୍କୋରରେ ପହଞ୍ଚାଇ ପାରନ୍ତି । ଏହାବ୍ୟତୀତ ଭାରତକୁ ବାମ-ଡାହାଣ ହାତୀ ଓପନିଙ୍ଗ କମ୍ବିନେସନ୍ ମଧ୍ୟ ମିଳିପାରିବ । ସେହିପରି ଋଷଭ ଓପନିଙ୍ଗ କଲେ, ପ୍ରଥମ ଓଭରରୁ ସେ ପ୍ରତିପକ୍ଷ ବୋଲରଙ୍କୁ ଆଟାକ କରିପାରିବେ । ଯାହା ଫଳରେ ରୋହିତ ମଧ୍ୟ କିଛି ସମୟ ପାଇପାରନ୍ତି ।

ଦୀର୍ଘ ଦିନ କ୍ରିକେଟରୁ ଦୂରେଇ ରହିବା ପରେ ବିଶ୍ୱକପରେ ଟିମ ଇଣ୍ଡିଆକୁ କମବ୍ୟାକ କରିଛନ୍ତିି ଋଷଭ ପନ୍ତ । ବର୍ତ୍ତମାନ ପର୍ଯ୍ୟନ୍ତ ଋଷଭ ଭଲ ଫର୍ମରେ ଥିବା ବେଳେ ସେ ଓପନିଙ୍ଗ ଦାୟିତ୍ୱ ଗ୍ରହଣ କଲେ ଟିମ ଇଣ୍ଡିଆକୁ ଖୁବ ଫାଇଦା ମିଳିପାରେ । ରୋହିତ-ଋଷ ପାଳି ଆରମ୍ଭ କଲେ ମଧ୍ୟକ୍ରମରେ ବିରାଟ କୋହଲି, ସୂର୍ଯ୍ୟକୁମାର ଯାଦବ ଏବଂ ହାର୍ଦ୍ଦିକ ପାଣ୍ଡ୍ୟା ବଡ଼ ପାଳି ଖେଳିପାରିବେ । ଏହପାରେ ଶିବମ ଦୁବେ ୬ ନମ୍ବରରେ ଖେଳିପାରନ୍ତି । ପରେ ରବିନ୍ଦ୍ର ଜାଡେଜା, ଅକ୍ସର ପଟେଲ ଏବଂ କୁଳଦୀପ ଯାଦବ ୩ ସ୍ପିନର ଭାବରେ ଟିମରେ ସ୍ଥାନ ପାଇବେ । ତେବେ ଫାଷ୍ଟ ବୋଲରରେ ବୁମରାହ ଏବଂ ଅର୍ଶଦୀପ ଭଲ ଲୟରେ ରହିଛନ୍ତି ।

ଭାରତୀୟ ଦଳର ପ୍ଲେଇଙ୍ଗ-୧୧: ରୋହିତ ଶର୍ମା(ଅଧିନାୟକ), ଋଷଭ ପନ୍ତ, ବିରାଟ କୋହଲି, ସୂର୍ଯ୍ୟକୁମାର ଯାଦବ, ହାର୍ଦ୍ଦିକ ପାଣ୍ଡ୍ୟା, ଶିବମ ଦୁବେ, ରବିନ୍ଦ୍ର ଜାଡେଜା, ଅକ୍ସର ପଟେଲ, କୁଳଦୀପ ଯାଦବ, ଅର୍ଶଦୀପ ସିଂହ, ଯଶପ୍ରୀତ ବୁମରାହ।