‘ନାଇଟ୍ ସିଫ୍ଟରେ କାମ କରିବାକୁ ମହିଳାଙ୍କୁ ବାଧ୍ୟ କରାଯାଇପାରିବ ନାହିଁ’…ମୋହନ ସରକାର ଜାରି କଲେ କଡ଼ା ନିୟମ
କୌଣସି ମହିଳା କର୍ମଚାରୀଙ୍କୁ ନାଇଟ ସିଫ୍ଟରେ କାମ କରିବାକୁ ବାଧ୍ୟ କରାଯାଇପାରିବ ନାହିଁ। ଏନେଇ ମହିଳାଙ୍କ ସୁରକ୍ଷାକୁ ଦୃଷ୍ଟିରେ ରଖି କଡ଼ା ନିୟମ ଜାରି କଲେ ମୋହନ ସରକାର ।
ଭୁବନେଶ୍ବର: ମହିଳା ସୁରକ୍ଷାକୁ ନେଇ ଗତ କିଛି ମାସ ଧରି ବିରୋଧୀଙ୍କ ଟାର୍ଗେଟରେ ଥିବା ମୋହନ ସରକାର ଏକ କଡ଼ା ନିୟମ ଜାରି କରିଛନ୍ତି । ଦୋକାନ ଏବଂ ବାଣିଜ୍ୟିକ ପ୍ରତିଷ୍ଠାନରେ କାମ କରୁଥିବା ମହିଳାମାନଙ୍କ ପାଇଁ ଏକ ସୁରକ୍ଷିତ ପରିବେଶ ସୃଷ୍ଟି କରିବା ଲକ୍ଷ୍ୟରେ ଏକ ଗୁରୁତ୍ୱପୂର୍ଣ୍ଣ ବିଜ୍ଞପ୍ତି ଜାରି କରିଛନ୍ତି ସରକାର।
ଶ୍ରମ ଏବଂ ESI ବିଭାଗ ଦ୍ୱାରା ଜାରି ଏହି ବିଜ୍ଞପ୍ତି ଅନୁଯାୟୀ, କୌଣସି ମହିଳା କର୍ମଚାରୀଙ୍କୁ ନାଇଟ ସିଫ୍ଟରେ କାମ କରିବାକୁ ବାଧ୍ୟ କରାଯାଇପାରିବ ନାହିଁ। ଏଥିପାଇଁ, ସ୍ୱେଚ୍ଛାକୃତ ଭାବରେ ନାଇଟ ସିଫ୍ଟରେ କାମ କରିବାକୁ ଚାହୁଁଥିବା ମହିଳାଙ୍କଠାରୁ କମ୍ପାନୀଗୁଡ଼ିକୁ ଲିଖିତ ଭାବରେ ସହମତି ନେବାକୁ ପଡିବ।
ସରକାର କହିଛନ୍ତି ଯେ, ନାଇଟ ସିଫ୍ଟରେ ମହିଳାଙ୍କୁ ଏକା କାମ କରିବାକୁ ପଡ଼ିବ ନାହିଁ। ଯେକୌଣସି ସିଫ୍ଟରେ ଅତି କମରେ ତିନି ଜଣ ମହିଳା ଉପସ୍ଥିତ ରହିବା ଉଚିତ। ମହିଳାଙ୍କ ସୁରକ୍ଷା ସୁନିଶ୍ଚିତ କରିବା ପାଇଁ, କମ୍ପାନୀଗୁଡ଼ିକୁ ପିକ୍-ଅପ୍ ଏବଂ ଡ୍ରପ୍ ସୁବିଧା ଯୋଗାଇବାକୁ ପଡିବ। ଏପରି ଯାନଗୁଡ଼ିକ GPS ଟ୍ରାକିଂ ସହିତ ସଜ୍ଜିତ ହେବା ଉଚିତ ଏବଂ କର୍ମଚାରୀମାନଙ୍କୁ ସେମାନଙ୍କ ଘରେ କିମ୍ବା ସେମାନଙ୍କ ଘର ପାଖରେ ଛାଡ଼ିବା ଉଚିତ। ଏହା ବ୍ୟତୀତ, ସେହି ଡ୍ରାଇଭରମାନେ ସିଧାସଳଖ କମ୍ପାନୀ ତରଫରୁ କାମ କରନ୍ତୁ କିମ୍ବା ସେବା ପ୍ରଦାନକାରୀଙ୍କ ମାଧ୍ୟମରେ ନିଯୁକ୍ତ ହୁଅନ୍ତୁ, ସେମାନଙ୍କର ବାୟୋଡାଟା ଏବଂ ପୋଲିସ ଯାଞ୍ଚ ବାଧ୍ୟତାମୂଳକ ହେବ ।
କର୍ମକ୍ଷେତ୍ରରେ ସିସିଟିଭି ଆବଶ୍ୟକ
ସରକାର କାର୍ଯ୍ୟସ୍ଥଳରେ ମୌଳିକ ସୁବିଧା ଉପରେ ମଧ୍ୟ ଗୁରୁତ୍ୱ ଦେଇଛନ୍ତି। କମ୍ପାନୀଗୁଡ଼ିକୁ କାର୍ଯ୍ୟସ୍ଥଳ ନିକଟରେ ଭଲ ଆଲୋକିତ ଶୌଚାଳୟ ଏବଂ ପାନୀୟ ଜଳର ବ୍ୟବସ୍ଥା କରିବାକୁ ପଡିବ। ଏହି ସ୍ଥାନଗୁଡ଼ିକୁ ଯାଉଥିବା ରାସ୍ତାରେ ସିସିଟିଭି ରଖିବା ମଧ୍ୟ ବାଧ୍ୟତାମୂଳକ ହେବ, ଯାହା ଦ୍ୱାରା ମହିଳାମାନଙ୍କ ସୁରକ୍ଷା ପ୍ରତି କୌଣସି ବିପଦ ନ ଆସିବ। ଏହା ସହିତ, ଦିନ ଏବଂ ରାତି ସିଫ୍ଟ ମଧ୍ୟରେ ଅତି କମରେ ଆଠ ଘଣ୍ଟା ନିରନ୍ତର ଗ୍ୟାପ ରହିବା ନିହାତି ଆବଶ୍ୟକ, ଯାହା ଦ୍ଵାରା ମହିଳା କର୍ମଚାରୀଙ୍କ ସ୍ୱାସ୍ଥ୍ୟ ଏବଂ ମଙ୍ଗଳକୁ ପ୍ରାଥମିକତା ଦିଆଯାଇପାରିବ।
ନାଇଟ ସିଫ୍ଟରେ ନାବାଳିକା ଝିଅମାନଙ୍କୁ ନିଯୁକ୍ତି ଦିଆଯାଇପାରିବ ନାହିଁ
ଏହା ସହିତ, ସରକାର ଏହା ମଧ୍ୟ ସ୍ପଷ୍ଟ କରିଛନ୍ତି ଯେ, ନାବାଳିକାମାନଙ୍କୁ ନାଇଟ ସିଫ୍ଟରେ ନିଯୁକ୍ତି ଦିଆଯାଇପାରିବ ନାହିଁ। ଏହି ନୂତନ ନିୟମର ଉଦ୍ଦେଶ୍ୟ ହେଉଛି ମହିଳାମାନଙ୍କୁ ଏକ ସୁରକ୍ଷିତ କାର୍ଯ୍ୟ ପରିବେଶ ପ୍ରଦାନ କରିବା ଏବଂ ନାଇଟ ସିଫ୍ଟରେ କାମ କରିବା ସମୟରେ ସେମାନଙ୍କର ସୁରକ୍ଷା, ସୁବିଧା ଏବଂ ମର୍ଯ୍ୟାଦା ସୁନିଶ୍ଚିତ କରିବା। ସରକାର ବିଶ୍ୱାସ କରନ୍ତି ଯେ, ଏହି ନିର୍ଦ୍ଦେଶାବଳୀ ପାଳନ କରିବା ଦ୍ୱାରା କେବଳ ମହିଳା କର୍ମଚାରୀଙ୍କ ଅଂଶଗ୍ରହଣ ବୃଦ୍ଧି ପାଇବ ନାହିଁ, ବରଂ କାର୍ଯ୍ୟକ୍ଷେତ୍ରରେ ସେମାନଙ୍କର ଆତ୍ମବିଶ୍ୱାସ ମଧ୍ୟ ଦୃଢ଼ ହେବ।
ମହିଳାଙ୍କୁ ରାତି ସିଫ୍ଟରେ କାମ: ୧୧ସୂତ୍ରୀୟ ଗାଇଡଲାଇନ୍ ଜାରି
୧- ରାତି ସିଫ୍ଟରେ କାମ କରିବା ପାଇଁ ମହିଳା କର୍ମଚାରୀଙ୍କ ଲିଖିତ ସମ୍ମତି ନେବା ବାଧ୍ୟତାମୂଳକ ।
୨- ସିଫ୍ଟରେ ଅତି କମରେ ତିନିଜଣ ମହିଳା କର୍ମଚାରୀ ରହିବା ଆବଶ୍ୟକ, ଯେଉଁଥିରେ ଅନସାଇଟ ମହିଳା ନିଯୁକ୍ତିଦାତା ମଧ୍ୟ ଅନ୍ତର୍ଭୁକ୍ତ ହୋଇପାରିବେ ।
୩-ମହିଳାମାନଙ୍କୁ ସେମାନଙ୍କ ବାସସ୍ଥାନ ନିକଟରୁ ଆଣିବା ଓ ଛାଡ଼ିବା ପାଇଁ ଜିପିଏସ ଟ୍ରାକିଂ ସିଷ୍ଟମ୍ ସହିତ ସୁରକ୍ଷିତ ପରିବହନ ସୁବିଧା ଦେବାକୁ ହେବ ।
୪-ନିଯୁକ୍ତିଦାତାଙ୍କୁ ରାତି ସିଫ୍ଟ ପାଇଁ ବ୍ୟବହୃତ ଗାଡ଼ିର ପ୍ରତ୍ୟେକ ଡ୍ରାଇଭରଙ୍କ ବାୟୋ-ଡାଟା ଓ ପୁଲିସ୍ ଭେରିଫିକେସନ୍ କରାଇବାକୁ ହେବ ।
୫-କାର୍ଯ୍ୟସ୍ଥଳରେ ଶୌଚାଳୟ, ୱାଶରୁମ ଓ ପାନୀୟ ଜଳର ଉପଯୁକ୍ତ ସୁବିଧା ରହିବା ଆବଶ୍ୟକ, ଯେଉଁଥିରେ ସିସିଟିଭି କ୍ୟାମେରା ଓ ଯଥେଷ୍ଟ ଆଲୋକ ବ୍ୟବସ୍ଥା ରହିବ ।
୬-କାର୍ଯ୍ୟସ୍ଥଳ ଓ ପରିବହନ ଗାଡ଼ିରେ ମହିଳା ହେଲ୍ପଲାଇନ ନମ୍ବର (୧୮୧) ଓ ଶ୍ରମ ବିଭାଗର ହେଲ୍ପଲାଇନ ନମ୍ବର (୧୮୦୦୩୪୫୬୭୦୩) ପ୍ରମୁଖ ଭାବେ ପ୍ରଦର୍ଶନ କରାଯିବ ।
୭-ଦିନ ସିଫ୍ଟରୁ ରାତି ସିଫ୍ଟକୁ ବା ତା’ର ବିପରୀତ ସିଫ୍ଟ ବଦଳାଇବା ସମୟରେ, କ୍ରମାଗତ ୮ ଘଂଟା ବିଶ୍ରାମ ଦେବା ବାଧ୍ୟତାମୂଳକ ।
୮-‘କାର୍ଯ୍ୟସ୍ଥଳରେ ମହିଳାଙ୍କ ଯୌନ ଉତ୍ପୀଡ଼ନ (ନିବାରଣ, ନିଷେଧ ଓ ନିରାକରଣ) ଆଇନ, ୨୦୧୩’ର ପାଳନ ବାଧ୍ୟତାମୂଳକ ।
୯-ଯେକୌଣସି ନିଯୁକ୍ତିଦାତା ଯିଏ ମହିଳାମାନଙ୍କୁ ରାତିରେ କାମରେ ନିୟୋଜିତ କରିବେ, ତାଙ୍କୁ ବିଭାଗର ନିର୍ଦ୍ଧାରିତ ୱେବସାଇଟରେ ଏକ ନିର୍ଦ୍ଦିଷ୍ଟ ଫର୍ମାଟରେ ସ୍ୱ-ପ୍ରମାଣପତ୍ର ଦାଖଲ କରିବାକୁ ପଡ଼ିବ ଯେ ସେ ସମସ୍ତ ସର୍ତ୍ତକୁ ପାଳନ କରିି ବିଜ୍ଞପ୍ତିରେ ଉଲ୍ଲେଖିତ ସବୁ ସୁବିଧା ପ୍ରଦାନ କରିଛନ୍ତି ଏବଂ ମହିଳା କର୍ମଚାରୀଙ୍କ ସୁରକ୍ଷା, ନିରାପତ୍ତା ଓ ସମ୍ମାନ ନେଇ ଯଥେଷ୍ଟ ଯତ୍ନ ଓ ସତର୍କତା ଅବଲମ୍ବନ କରିବେ ।
୧୦-କୌଣସି କିଶୋର-କିଶୋରୀଙ୍କୁ ରାତିରେ କୌଣସି ପ୍ରତିଷ୍ଠାନରେ କାମ କରିବାକୁ ଅନୁମତି ଦିଆଯିବ ନାହିଁ ।
୧୧- ଏହି ସର୍ତ୍ତଗୁଡ଼ିକର ପାଳନ ନ କଲେ ‘ଓଡ଼ିଶା ଦୋକାନ ଓ ବାଣିଜ୍ୟିକ ପ୍ରତିଷ୍ଠାନ ଆଇନ, ୧୯୫୬’ର ଧାରା ୩୫ ଅନୁଯାୟୀ ଜରିମାନା ଲାଗୁ ହେବ ।