ଆଗାମୀ ପଞ୍ଚାୟତ ନିର୍ବାଚନ ପାଇଁ ଏବେଠୁ ଅଣ୍ଟା ଭିଡିଲା କଂଗ୍ରେସ, ରାଜୀବ ଗାନ୍ଧୀ ପଂଚାୟତି ରାଜ ସଂଗଠନର ଆରମ୍ଭ ହେଲା ସଂକଳ୍ପ ଶିବିର

ଭୁବନେଶ୍ବର: ଆଗାମୀ ନିର୍ବାଚନ ପାଇଁ ଅଣ୍ଟାଭିଡିଲା କଂଗ୍ରେସ ।  କଂଗ୍ରେସ ଦଳର ଛାମୁଆ ସଂଗଠନ ରାଜୀବ ଗାନ୍ଧୀ ପଂଚାୟତି ରାଜ ସଂଗଠନର ପୂର୍ବ ନିଷ୍ପତି ଅନୁଯାୟୀ କଳାହାଣ୍ଡି ଜିଲ୍ଲାର ସର୍ବୋଦୟ ସଂକଳ୍ପର ଦୁଇଦିନିଆ ଶିବିର ଆରମ୍ଭ ହୋଇଯାଇଛି । ସଂଗଠନର ରାଜ୍ୟ ସାଧାରଣ ସମ୍ପାଦକ ସରୋଜ ବାଗଙ୍କ ନେତୃତ୍ୱରେ ଆୟୋଜିତ ଶିବିର ଭବାନୀପାଟଣା ସ୍ଥିତି ଅଗ୍ରସେନୀ ଭବନରେ ଅନୁଷ୍ଠିତ ହୋଇଯାଇଛି ।

ଉପିସିସି ସଭାପତି ଶ୍ରୀଯୁକ୍ତ ଭକ୍ତ ଚରଣ ଦାସ କହିଛନ୍ତି, ଓଡ଼ିଶାର ଜନଜୀବନର ସମସ୍ୟାକୁ ନେଇ କଂଗ୍ରେସ ଦଳ ଆଗାମୀ ଦିନରେ ସଂଘର୍ଷର ରାସ୍ତାକୁ ଆହୁରି ପ୍ରସାରିତ କରିବ । ନାରୀ ପାଇଁ ନ୍ୟାୟ ଆନ୍ଦୋଳନ ଆହୁରି ଶାଣୀତ ହେବ । ଆସନ୍ତା ପଂଚାୟତ ନିର୍ବାଚନରେ କଂଗ୍ରେସର ଭୋଟ ହାରକୁ ୩୦ ପ୍ରତିଶତ ବୃଦ୍ଧି କରିବାର ଲକ୍ଷ ରଖିଛି ଏବଂ ସେଥିପାଇଁ ରାଜୀବଗାନ୍ଧୀ ପଂଚାୟତରାଜ ସଂଗଠନ ନିଜକୁ ପ୍ରସ୍ତୁତ କରିବାପାଇଁ ଶ୍ରୀଯୁକ୍ତ ଦାସ ଆହ୍ୱାନ ଦେଇଥିଲେ ।
ସେହିପରି ରାଜୀବଗାନ୍ଧୀ ପଂଚାୟତ ରାଜ ସଂଗଠନର ଅଧ୍ୟକ୍ଷ ସୁଦର୍ଶନ ଦାସ କହିଲେ ଯେ, ରାଜନୀତି କେବଳ ନିର୍ବାଚନୀ ସର୍ବସ୍ୱ ନୁହେଁ । ଗାନ୍ଧୀଙ୍କ ଗ୍ରାମ ସ୍ୱରାଜ ରାସ୍ତାରେ ନିରନ୍ତନ ପ୍ରୟାସ ହେଉଛି ପ୍ରକୃତ ରାଜନୀତି, ଯାହା ଆଜି ଦିନରେ ସମସ୍ତଙ୍କ ପାଇଁ କାମ୍ୟ ହେବ । ଦେଶରେ ସମ୍ପ୍ରତି ବିଦ୍ୱେଷ ଓ ବିଭେଦର ରାଜନୀତିକୁ ମୁକାବିଲା କରିବାପାଇଁ ଯେଉଁ ଆଦର୍ଶଗତ ଲଢ଼େଇର ଆବଶ୍ୟକତା ରହିଛି ତାକୁ ଦୃଷ୍ଟିରେ ରଖି ଏହି ଶିବିର ଆୟୋଜିତ ହେଉଛି । ରାଜ୍ୟର ସମସ୍ତ ଜିଲ୍ଲା ଓ ପରେ ସବୁ ବ୍ଲକରେ ଏହିଭଳି ଶିବିରମାନ ଆୟୋଜିତ ହେବ ।

ତାହା ସହିତ ଆସନ୍ତା ୨୦୨୭ରେ ହେବାକୁ ଥିବା ପଂଚାୟତ ନିର୍ବାଚନ ପାଇଁ ରଣ କୌଶଳ ଭବାନୀପାଟଣା ସଂକଳ୍ପ ଶିବିରରୁ ଶୁଭାରମ୍ଭ ହୋଇଛି ବୋଲି ଅଧ୍ୟକ୍ଷ କହିଥିଲେ ।
ଆଜିର ପ୍ରଥମ ଦିବସରେ ସର୍ବଭାରତୀୟ ଉପଦେଷ୍ଟା ସଚିନ ନାୟକ, ସାଧାରଣ ସମ୍ପାଦକ କୁନାଲ ବାନାର୍ଜୀ, ଜିଲ୍ଲା କଂଗ୍ରେସ ସଭାପତି ଭାରତ ଭୂଷଣ ବେମାଲ, ବିଶିଷ୍ଠ ସମାଜସେବୀ ଭାରତ ଭୂଷଣ ଠାକୁର, ବିଜୟ ପ୍ରଧାନ, ଡ. ମାନସୀ ଦାସ ପଟ୍ଟନାୟକ, ରୂପକ ତୁରକ, ପ୍ରତାପ ପ୍ରଧାନ, ପ୍ରଦ୍ୟୁମ୍ନ ଦାସ, ଦେବଦତ ଦାସ, ନିମାଇ ସରକାର, ମନୋରଞ୍ଜନ ତ୍ରିପାଠୀ, ସୁଭାଷ ପ୍ରଧାନ, ନିରଞ୍ଜନ ଲେଙ୍କା, ପାଣ୍ଡବ କର୍ଣ୍ଣ ପ୍ରମୁଖ ବକ୍ତବ୍ୟ ରଖିଥିଲେ ।
ତେବେ ଆସନ୍ତାକାଲି ସମ୍ବିଧାନର ସୁରକ୍ଷା,ସାମାଜିକ ନ୍ୟାୟ ଓ କଳାହାଣ୍ଡିର ସାମ୍ପ୍ରତିକ ପରିବେଶ ସମ୍ପର୍କରେ ଦ୍ୱିତୀୟ ଦିନରେ ସଂକଳ୍ପ ଶିବିରରେ ଆଲୋଚନା ହେବ ବୋଲି ଆରଜିପିଆରଏସର ଅଧ୍ୟକ୍ଷ ସୁଦର୍ଶନ ଦାସ ସୂଚନା ଦେଇଛନ୍ତି ।