ଆଜାଦ ହିନ୍ଦ୍ ଫୌଜର ଶେଷ ସୈନିକ ଲକ୍ଷ୍ମୀ ସେହଗଲଙ୍କୁ ଶ୍ରାଦ୍ଧ ଦିବସରେ କୋଟି କୋଟି ପ୍ରଣାମ
ଆଜି ହେଉଛି ମହାନ୍ କ୍ରାନ୍ତିକାରୀ ପୁରୁଷ ନେତାଜୀ ସୁଭାଷ ଚନ୍ଦ୍ର ବୋଷଙ୍କ ଆଜାଦ ହିନ୍ଦ ଫୌଜର ଶେଷ ସୈନିକ ଲକ୍ଷ୍ମୀ ସେହଗଲଙ୍କ ଶ୍ରାଦ୍ଧ ଦିବସ । ଏହି ଅବସରରେ ଏହି ଚିର ବିପ୍ଲବୀଣି, ଅଗ୍ନିତେଜସ୍ୱିନୀ, ଭାରତ ନନ୍ଦିନୀ, ମହାନ୍ ସ୍ୱାଧୀନତା ସଂଗ୍ରାମୀ, ଆଜୀବନ ସେବିକାଙ୍କୁ କୋଟି କୋଟି ପ୍ରଣାମ ।
୧୯୧୪ ମସିହା ଅକ୍ଟୋବର ମାସ ୨୪ ତାରିଖରେ ଏହି ମହାନ୍ ଜନନାୟିକା ମାଡ୍ରାସରେ ଜନ୍ମଗ୍ରହଣ କରିଥଲେ । ସେ କୁଇନ୍ ମ୍ୟାରି’ସ୍ କଲେଜରୁ ଶିକ୍ଷା ସମାପ୍ତ କରିବା ପରେ ମାଡ୍ରାସ ମେଡିକାଲ କଲେଜରୁ ୧୯୩୮ ମସିହାରେ ଏମବିବିଏସ ଡିଗ୍ରୀ ହାସଲ କରିଥିଲେ । ପରେ ସେ ସ୍ତ୍ରୀ ରୋଗ ଓ ପ୍ରସୂତୀ ଚିକିତ୍ସାରେ ଡିପ୍ଲୋପା କରିବା ସହ ଚେନ୍ନାଇର ତ୍ରିପ୍ଲିକେନରେ ଥିବା କସ୍ତୁରବା ଗାନ୍ଧୀ ସରକାରୀ ହସ୍ପିଟାଲରେ ଡାକ୍ତର ଭାବେ ଯୋଗ ଯୋଗଦେଇଥିଲେ । ୧୯୪୦ ମସିହାରେ ସେ ସିଙ୍ଗାପୁର ଚାଲିଯାଇଥିଲେ ଓ ଏହି ରହଣି ସମୟରେ ସେ ନେତାଜୀ ସୁଭାଷ ଚନ୍ଦ୍ର ବୋଷଙ୍କ ଇଣ୍ଡିଆ ନ୍ୟାସନାଲ ଆର୍ମିର ଜଣେ ସଦସ୍ୟ ହୋଇଥିଲେ ।
ଲକ୍ଷ୍ମୀ ପ୍ରେମ କୁମାର ସେହଗଲଙ୍କୁ ୧୯୪୭ ମସିହାରେ ଲାହୋରେ ବିବାହ କରିବା ପରେ ଦୁହେଁ କାନପୁରକୁ ଚାଲିଆସିଥିଲେ । ତାଙ୍କର ଦୁଇକନ୍ୟାଙ୍କ ମଧ୍ୟରୁ ସୁଭାଶିନୀ ଅଲ୍ଲୀ ଜଣେ କମ୍ୟୁନିଷ୍ଟ ନେତ୍ରୀ ହୋଇଥିବା ବେଳେ ଓ ଅନିସା ପୁରୀଙ୍କ ନାତି ଥିଲେ ଫିଲ୍ମନିର୍ମାତା ଶାଦ ଅଲ୍ଲୀ । ୧୯୯୮ ମସିହାରେ ଭାରତ ସରକାର ତାଙ୍କୁ ପଦ୍ମ ବିଭୂଷଣ ସମ୍ମାନରେ ସମ୍ମାନିତ କରିଥିଲେ । ୨୦୧୦ ମସିହାରେ କାଲିକଟ ୟୁନିଭରସିଟି ପକ୍ଷରୁ ତାଙ୍କୁ ସମ୍ମାନଜନକ ଡକ୍ଟରେଟ୍ ଉପାଧି ପ୍ରଦାନ କରାଯାଇଥିଲା । ୨୦୧୨ ମସିହା ଜୁଲାଇ ମାସ ୨୩ ତାରିଖରେ ସବୁଦିନ ପାଇଁ ଆଖି ବୁଜିଦେଇଥିଲେ ଏହି ମହାନ୍ ନେତ୍ରୀ । ଚିରନିଦ୍ରାରେ ସବୁଦିନ ପାଇଁ ନିରବି ଯାଇଥିଲା ଏହି ଅମୂଲ୍ୟ କନ୍ୟାରତ୍ନର ସ୍ୱର । ତାଙ୍କର ମରଶରୀରକୁ ଗଣେଶ ଶଙ୍କର ବିଦ୍ୟାର୍ଥୀ ମେମୋରିଆଲ ମେଡିକାଲ କଲେଜକୁ ରିସର୍ଚ୍ଚ ପାଇଁ ଦାନ କରାଯାଇଥିଲା ।
