ସୋନମ କପୁରଙ୍କ ଶାଶୁ ଘରୁ ଚୋରି, ଏତିକି କୋଟି ଟଙ୍କାର ସୁନା ଗହଣା ନେଇ ଚୋର ଫେରାର୍
ବଲିଉଡ୍ ଅଭିନେତ୍ରୀ ସୋନମ କପୁରଙ୍କ ଶାଶୁ ଘରୁ ଚୋରି ହେବାର ଖବର ଆସିଛି । ସୋନମଙ୍କ ସ୍ୱାମୀ ଆନନ୍ଦ ଆହୁଜାଙ୍କ ଦିଲ୍ଲୀ ସ୍ଥିତ ଘରୁ ଚୋରି ହେବାର ଖବର ଆସିଛି । ଖବର ଅନୁସାରେ ସୋନମଙ୍କ ଘରୁ ପ୍ରାୟ ୨.୪ କୋଟି ଟଙ୍କାର ସୁନା ଗହଣା ନେଇ ଚୋର ଫେରାର ହୋଇଯାଇଛି । ଦିଲ୍ଲୀର ଅମୃତା ଶେରଗିଲ ମାର୍ଗରେ ଆନନ୍ଦ ଆହୁଜାଙ୍କ ଘର ରହିଛି । ଏଠାରେ ଆନନ୍ଦଙ୍କ ବାପା ହରିଷ ଆହୁଜା ମା ପ୍ରିୟା ଆହୁଜା ଏବଂ ତାଙ୍କର ଜେଜେମା ଶାରଳା ଆହୁଜା ରହିଥାଆନ୍ତି ।
ଖବର ଅନୁସାରେ ଆନନ୍ଦଙ୍କ ଜେଜେ ମାଙ୍କ ଏକ ବ୍ୟାଗ ମିଳି ନଥିଲା । ସେହି ବ୍ୟାଗ୍ରେ ପ୍ରାୟ ୪୨ ଲକ୍ଷ ଟଙ୍କାର ଗହଣା ଥିବା ସୂଚନା ମିଳିଛି । ଫେବୃଆରୀ ମାସ ୨୩ ତାରିଖରେ ଏହି ବ୍ୟାଗ୍ ନିଖୋଜ ବାବଦକୁ ଏଫଆଇଆର ଦାଖଲ ହେବା ପରେ ଏହି ଘଟଣା ସାମ୍ନାକୁ ଆସିଥିଲା । ଆହୁଜା ପରିବାର ଏହି ବିଷୟରେ ଦିଲ୍ଲୀର ତୁଗଲକ ରୋଡ୍ ଥାନାରେ ଅଭିଯୋଗ କରିଥିଲେ । ତେବେ ଏହି ବ୍ୟାଗକୁ ଶାରଳା ଆହୁଜା ପ୍ରାୟ ଦୁଇ ବର୍ଷ ପରେ ଦେଖିବାକୁ ଇଚ୍ଛା କରିଥିଲେ, କିନ୍ତୁ ତାଙ୍କୁ ଏହି ବ୍ୟାଗ୍ ମିଳି ନଥିଲା ।
ବ୍ୟାଗ୍ ନିିଖୋଜ ହେବା ପରେ ପରିବାର ଲୋକେ ଘରସାରା ତନ୍ନ ତନ୍ନ କରି ଖୋଜିଥିଲେ ମଧ୍ୟ ବ୍ୟାଗର ଟେର ପାଇ ନଥିଲେ । ଏହା ପରେ ଦିଲ୍ଲୀ ପୋଲିସ ନିକଟରେ ଏହି ବିଷୟରେ ଏଫଆଇଆର ଦାୟର ହୋଇଥିଲା । ପୋଲିସ ଏହି ମାମଲାରେ ଏପର୍ଯ୍ୟନ୍ତ ପ୍ରାୟ ୨୫ ଜଣଙ୍କୁ ପଚରାଉଚରା କରି ସାରିଲାଣି । ଏଥିରେ ଆନନ୍ଦଙ୍କ ଘରେ କାମ କରୁଥିବା ଲୋକେ ମଧ୍ୟ ସାମିଲ ଅଛନ୍ତି । ପୋଲିସ ସିସିଟିଭି ଫୁଟେଜ ମଧ୍ୟ ଚେକ କରିଥିବା ଜଣା ପଡିଛି । ଏଥି ସହିତ ଗତ ଦିନ ମାନଙ୍କରେ କାମ ଛାଡ଼ି ଯାଇଥିବା ଲୋକମାନଙ୍କୁ ମଧ୍ୟ ଜେରା କରାଯାଉଥିବା ପୋଲିସ କହିଛି ।
ବର୍ତ୍ତମାନ ସୋନମ ମୁମ୍ବାଇରେ ସ୍ୱାମୀ ଆନନ୍ଦଙ୍କ ସହିତ ରହୁଛନ୍ତି । ନିକଟରେ ସୋନମ ମାଆ ହେବାକୁ ଯାଉଥିବା ଖବର ଘୋଷଣା କରିଥିଲେ । ସୋନମ ଇନଷ୍ଟାଗ୍ରାମରେ ଏକ ପୋଷ୍ଟ କରି ଏହି ସୂଚନା ଦେଇଥିଲେ । ଏହି ସମୟରେ ସୋନମ ବଲିଉଡଠାରୁ ସାମାନ୍ୟ ଦୂରରେ ରହିଛନ୍ତି । ସୋନମଙ୍କ ହାତରେ ଏବେ କିଛି କାମ ରହିଥିଲେ ମଧ୍ୟ ସେ ଏଥିରେ ଦୁରରେ ରହି ନିଜର ଧ୍ୟାନ ରଖୁଛନ୍ତି ।
