HAL ରୁଷିଆକୁ କୌଣସି ଟେକ୍ନୋଲୋଜି ନ ଦେବା ଖବରରେ ସତ୍ୟତା ନାହିଁ: ବୈଦେଶିକ ମନ୍ତ୍ରଣାଳୟ
ନୂଆଦିଲ୍ଲୀ,୩୧ା୩: ସୋମବାର ଭାରତ ନ୍ୟୁୟର୍କ ଟାଇମ୍ସର ଏକ ରିପୋର୍ଟ ଉପରେ କଡ଼ା ପ୍ରତିକ୍ରିୟା ପ୍ରକାଶ କରିଛି, ଯେଉଁଥିରେ ଦାବି କରାଯାଇଛି ଯେ, ଏରୋସ୍ପେସ୍ ଏବଂ ପ୍ରତିରକ୍ଷା କମ୍ପାନୀ ହିନ୍ଦୁସ୍ତାନ ଏରୋନଟିକ୍ସ ଲିମିଟେଡ୍ ରୁଷିଆକୁ ଅସ୍ତ୍ରଶସ୍ତ୍ର ଯୋଗାଣ କରୁଥିବା ଏକ କଳା ତାଲିକାଭୁକ୍ତ ସଂସ୍ଥାକୁ ସାମରିକ ବ୍ୟବହାର କରିପାରୁଥିବା ସମ୍ବେଦନଶୀଳ ପ୍ରଯୁକ୍ତିବିଦ୍ୟା ବିକ୍ରି କରିଛି।
ସୂତ୍ର ଅନୁସାରେ, ବୈଦେଶିକ ମନ୍ତ୍ରଣାଳୟ ଏହି ରିପୋର୍ଟକୁ ସମାଲୋଚନା କରିଛି ଏବଂ ଏହାକୁ ତଥ୍ୟଗତ ଭାବରେ ଭୁଲ ଏବଂ ଭ୍ରାମିକ ବୋଲି କହିଛି। ଏହାକୁ ରାଜନୈତିକ ରୂପ ଦିଆଯାଇଛି ଏବଂ ତଥ୍ୟକୁ ବିଭ୍ରାନ୍ତ କରିବାକୁ ଚେଷ୍ଟା କରାଯାଇଛି ବୋଲି ଅଭିଯୋଗ କରାଯାଇଛି। ବୈଦେଶିକ ମନ୍ତ୍ରଣାଳୟ କହିଛି, “ଆମେ ନ୍ୟୁୟର୍କ ଟାଇମ୍ସ ଦ୍ୱାରା ପ୍ରକାଶିତ ଏକ ରିପୋର୍ଟ ଦେଖିଛୁ। ଏହି ରିପୋର୍ଟ ତଥ୍ୟଗତ ଭାବରେ ଭୁଲ ଏବଂ ଭ୍ରାମିକ। ରାଜନୈତିକ ବୟାନବାଜି ପାଇଁ ପ୍ରସଙ୍ଗଗୁଡ଼ିକୁ ବିକୃତ କରିବାକୁ ଚେଷ୍ଟା କରାଯାଇଛି।”
‘ନ୍ୟୁୟର୍କ ଟାଇମ୍ସ ଏପରି ରିପୋର୍ଟ ପ୍ରକାଶ କରିବା ପୂର୍ବରୁ ମୌଳିକ ତଦନ୍ତ କରିବା ଉଚିତ’
MEA ଆହୁରି କହିଛି, “ରିପୋର୍ଟରେ ଉଲ୍ଲେଖ କରାଯାଇଥିବା ଭାରତୀୟ ସଂସ୍ଥା ରଣନୈତିକ ବାଣିଜ୍ୟ ନିୟନ୍ତ୍ରଣ ଏବଂ ଶେଷ-ଉପଭୋକ୍ତା ପ୍ରତିବଦ୍ଧତା ଉପରେ ଏହାର ସମସ୍ତ ଅନ୍ତର୍ଜାତୀୟ ଦାୟିତ୍ୱକୁ ବିଶ୍ୱସ୍ତତାର ସହିତ ପାଳନ କରିଛି। ରଣନୈତିକ ବାଣିଜ୍ୟ ଉପରେ ଭାରତର ଦୃଢ଼ ଆଇନଗତ ଏବଂ ନିୟାମକ ଢାଞ୍ଚା ଏହାର କମ୍ପାନୀଗୁଡ଼ିକ ଦ୍ୱାରା ବିଦେଶୀ ବାଣିଜ୍ୟିକ ଉଦ୍ୟମକୁ ବିଚାରକୁ ନେଇଛି।” ମନ୍ତ୍ରଣାଳୟ “ପ୍ରତିଷ୍ଠିତ ଗଣମାଧ୍ୟମ ସଂସ୍ଥାଗୁଡ଼ିକୁ ଏପରି ରିପୋର୍ଟ ପ୍ରକାଶ କରିବା ପୂର୍ବରୁ ମୌଳିକ ସତର୍କତା ଅବଲମ୍ବନ କରିବାକୁ” ଅନୁରୋଧ କରିଛି, ଯାହାକୁ ଏହି କ୍ଷେତ୍ରରେ ଅଣଦେଖା କରାଯାଇଥିଲା। ତଥାପି, ହିନ୍ଦୁସ୍ତାନ ଏରୋନଟିକ୍ସ ଲିମିଟେଡ୍ (HAL) ଏପର୍ଯ୍ୟନ୍ତ କୌଣସି ପ୍ରତିକ୍ରିୟା ଦେଇନାହିଁ।
ବିବାଦ ସେତେବେଳେ ଆରମ୍ଭ ହୋଇଥିଲା ଯେତେବେଳେ ନ୍ୟୁୟର୍କ ଟାଇମ୍ସ ୨୮ ମାର୍ଚ୍ଚ ୨୦୨୫ରେ ଏକ ରିପୋର୍ଟ ପ୍ରକାଶ କରିଥିଲା, ଯେଉଁଥିରେ ଦାବି କରାଯାଇଥିଲା ଯେ ବ୍ରିଟିଶ ଏରୋସ୍ପେସ୍ ନିର୍ମାତା HR ସ୍ମିଥ୍ ଗ୍ରୁପ୍ HAL ମାଧ୍ୟମରେ ରୁଷକୁ ବୈଷୟିକ ଉପକରଣ ଯୋଗାଇଛି। ଏଥିରେ ଟ୍ରାନ୍ସମିଟର, କକପିଟ୍ ଉପକରଣ ଏବଂ ଅନ୍ୟାନ୍ୟ ସମ୍ବେଦନଶୀଳ ଅଂଶ ଅନ୍ତର୍ଭୁକ୍ତ ଥିଲା। ଦାବି କରାଯାଇଥିଲା ଯେ ବ୍ରିଟେନ ଏବଂ ଆମେରିକା ରୁଷକୁ ଏହି ଉପକରଣ ବିକ୍ରି ନକରିବାକୁ ନିର୍ଦ୍ଦେଶ ଦେଇଥିଲେ। ରିପୋର୍ଟରେ ଏହା ମଧ୍ୟ କୁହାଯାଇଛି, HAL HR ସ୍ମିଥଙ୍କଠାରୁ ପ୍ରାପ୍ତ ଉପକରଣଗୁଡ଼ିକୁ କଳାତାଲିକାଭୁକ୍ତ ରୁଷୀୟ ସଂସ୍ଥା Rosoboronexportକୁ ପଠାଇଥିଲା।