Online Ph.D ପ୍ରତି ସତର୍କ ରୁହନ୍ତୁ: ଛାତ୍ରଛାତ୍ରୀଙ୍କ ପାଇଁ ନୋଟିସ୍ ଜାରି କଲେ UGC ଓ AICTE
ନୂଆଦିଲ୍ଲୀ: ଆଜିକାଲି ପିଏଚ.ଡି ଡିଗ୍ରୀକୁ ନେଇ ଅନେକ ଠକାମି ହେଉଥିବାର ଦେଖିବାକୁ ମିଳୁଛି । ଏନେଇ ୟୁନିଭରସିଟି ଗ୍ରାଣ୍ଟସ କମିସନ (ୟୁଜିସି) ଓ ସର୍ବ ଭାରତୀୟ ବୈଷୟିକ ଶିକ୍ଷା ପରିଷଦ (ଏଆଇସିଟିଇ) ପକ୍ଷରୁ ଆଲର୍ଟ ଜାରି କରାଯାଇଛି । ଏକ ଛୋଟ ଭୁଲ ପାଇଁ ଜଣେ ବିଦ୍ୟାର୍ଥୀଙ୍କ କ୍ୟାରିୟର ବର୍ବାଦ ହୋଇପାରେ । ଅନେକ ପିଲା ଏପରି କିଛି ସଂସ୍ଥାରୁ ପିଏଚ.ଡି କରିଥାନ୍ତି, ଯାହା କି ଭାରତରେ ବୈଧ ହୋଇନଥାଏ । ତେଣୁ ଏନେଇ ସତର୍କ ରହିବାକୁ ଚେତାବନୀ ଦିଆଯାଇଛି ।
ୟୁଜିସି ଓ ଏଆଇସିଟିଇ ମୁତାବକ, ଛାତ୍ରଛାତ୍ରୀମାନେ ଅନଲାଇନ୍ ଏଡୁଟେକ କମ୍ପାନୀଙ୍କ ଜରିଆରେ ପିଏଚ.ଡି କରନ୍ତୁ ନାହିଁ । ଯେ କୌଣସି ବିଦେଶୀ ୟୁନିଭରସିଟି ସହିତ ମିଶି ଏହି କମ୍ପାନୀମାନେ ପିଏଚ.ଡି ଡିଗ୍ରୀ ପ୍ରଦାନ କରିଥାନ୍ତି, ଯାହାକି ଭାରତରେ ବୈଧ ହୋଇନଥାଏ । ସେମାନେ ଆଶାୟୀଙ୍କୁ ଅନଲାଇନ ବିଜ୍ଞାପନ ଜରିଆରେ ପ୍ରଲୋଭିତ କରିବାକୁ ଉଦ୍ୟମ କରିଥାନ୍ତି । ଏ ବାବଦରେ ୟୁଜିସିର ଅଫିସିଆଲ ୱେବସାଇଟ https://www.ugc.ac.in/ରେ ନୋଟିସ ଜାରି କରାଯିବା ସହ ଟ୍ୱିଟର ହ୍ୟାଣ୍ଡେଲରେ ମଧ୍ୟ ପୋଷ୍ଟ ଶେୟାର କରାଯାଇଛି ।
ଶିକ୍ଷାର୍ଥୀମାନେ ପିଏଚ.ଡି କୋର୍ସରେ ଆଡମିସନ କରିବା ପୂର୍ବରୁ ଏପରି ଶିକ୍ଷାନୁଷ୍ଠାନର ଡିଗ୍ରୀ ବିଷୟରେ ଭଲ ଭାବେ ଯାଞ୍ଚ କରି ନେବା ଦରକାର । ଏଥିପାଇଁ ଛାତ୍ରଛାତ୍ରୀମାନେ ୟୁଜିସି ପିଏଚଡି ରେଗୁଲେସନ ୨୦୧୬କୁ ଥରେ ଭଲଭାବେ ପଢ଼ିନେବା ଦରକାର । ନିୟମ ଦୃଷ୍ଟିରୁ ଏପରି ଅନଲାଇନ ପ୍ରୋଗ୍ରାମକୁ ସ୍ୱୀକୃତି ପ୍ରଦାନ କରାଯାଇନାହିଁ । ଯେ କୌଣସି କୋର୍ସରେ ପ୍ରବେଶ ପୂର୍ବରୁ ‘ୟୁଜିସି (ମିନିମମ ଷ୍ଟାଣ୍ଡାର୍ଡସ ଆଣ୍ଡ ପ୍ରୋସିଜିଓର ଫର ଆୱାର୍ଡ ଅଫ୍ ଏମ.ଫିଲ / ପିଏଚ.ଡି ଡିଗ୍ରିସ) ରେଗୁଲେସନ୍ସ, ୨୦୧୬କୁ ଥରେ ଚେକ୍ କରିନେବା ଉଚିତ ବୋଲି କୁହାଯାଇଛି ।
UGC advises Students and public, at large, not to be misled by advertisements for online Ph.D programmes offered by EduTech Companies in collaboration with Foreign Educational Institutes.
For more details please see the attached public notice. @PMOIndia pic.twitter.com/RlP33Ziv7B— UGC INDIA (@ugc_india) October 28, 2022
