ମାଛ ଖାଇ ମହିଳାଙ୍କ ମୃତ୍ୟୁ, କୋମାକୁ ଚାଲିଗଲେ ସ୍ୱାମୀ, ଜାଣନ୍ତୁ ସଂପୂର୍ଣ୍ଣ ତଥ୍ୟ

ନୂଆଦିଲ୍ଲୀ: ମାଲେସିଆରୁ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି। ମାଛ ଖାଇବା କାରଣରୁ ଜଣେ ମହିଳା ପ୍ରାଣ ହରାଇଛନ୍ତି। ମାଲେସିଆରେ ଜଣେ ୮୩ ବର୍ଷୀୟା ମହିଳାଙ୍କ ମୃତ୍ୟୁ ଘଟିଛି। ଏହାସହ ତାଙ୍କ ସ୍ୱାମୀ ଆଇସିୟୁରେ ଆଡମିଟ ହୋଇଛନ୍ତି। ସୂଚନାନୁସାରେ, ସେ ଗତ ସପ୍ତାହରେ ପଫର ମାଛ ଖାଇଥିଲେ। ଏହି ମାଛରେ ବିଷାକ୍ତ ପଦାର୍ଥ ଥାଏ। ମାଛ ଖାଇବା ପରେ ମହିଳା ଅସୁସ୍ଥ ହୋଇପଡିଥିଲେ, ଯେଉଁଥିପାଇଁ ତାଙ୍କୁ ଡାକ୍ତରଖାନା ନିଆଯିବା ବାଟରେ ମୃତ୍ୟୁ ଘଟିଥିଲା।

ମହିଳାଙ୍କ ଝିଅ ନାଗ ଆଇ ଲି କହିଛନ୍ତି ଯେ, ତାଙ୍କ ପିତା ମାର୍ଚ୍ଚ ୨୫ ରେ ନିକଟସ୍ଥ ଦୋକାନରୁ ପଫର ମାଛ କିଣିଥିଲେ। ଏହା ମଧ୍ୟାହ୍ନ ଭୋଜନ ପାଇଁ ରୋଷେଇ ହୋଇଥିଲା, ଏହା ଖାଇବାର କିଛି ସମୟ ପରେ ମହିଳା କମ୍ପିବା ଆରମ୍ଭ କରିଥିଲେ ଏବଂ ତାଙ୍କୁ ଶ୍ୱାସ ନେବାରେ ଅସୁବିଧା ହୋଇଥିଲା। ଲି କହିଛନ୍ତି ଯେ, ଖାଇବା ପରେ ଏକ ଘଣ୍ଟା ମଧ୍ୟରେ ତାଙ୍କ ପିତାଙ୍କଠାରେ ସମାନ ଲକ୍ଷଣ ଦେଖାଦେଇଥିଲା। ସେ କହିଛନ୍ତି ଯେ, ଉଭୟଙ୍କୁ ଡାକ୍ତରଖାନା ନିଆଯାଇଥିଲା, ହେଲେ ରାସ୍ତାରେ ତାଙ୍କ ମା’ଙ୍କର ମୃତ୍ୟୁ ଘଟିଥିଲା।

ପୁଣି ତାଙ୍କ ଝିଅ କହିଛନ୍ତି ଯେ, ତାଙ୍କ ପିତା ଏବେ ବି କୋମାରେ ଅଛନ୍ତି। ଡାକ୍ତର ତାଙ୍କ ପିତାଙ୍କ ଚିକିତ୍ସା କରୁଛନ୍ତି। ଏହା ସହିତ ଡାକ୍ତର କହିଛନ୍ତି ଯେ, ତାଙ୍କ ବାପାଙ୍କ ବୟସ ବହୁତ ଅଧିକ, ଯେଉଁଥିପାଇଁ ସେ ସୁସ୍ଥ ହେବା ପରେ ମଧ୍ୟ ଆଗ ଭଳି ରହିବେ ନାହିଁ। ସୂଚନାନୁସାରେ, ଖାଦ୍ୟ ଏବଂ ଔଷଧ ପ୍ରଶାସନ କହିଛନ୍ତି ଯେ, ଜାପାନର ଡିସ୍ ପଫର୍ ମାଛରେ ଏକ ମାରାତ୍ମକ ବିଷାକ୍ତ ପଦାର୍ଥ ରହିଥାଏ। ସେହି ମାଛରେ ଟେଟ୍ରୋଡୋଟକ୍ସିନ ଏବଂ ସାକ୍ସିଟୋକ୍ସିନ ମିଳିଥାଏ। ଯାହା ଥଣ୍ଡା କିମ୍ବା ଗରମ ଦ୍ୱାରା ମଧ୍ୟ ନଷ୍ଟ ହୋଇପାରିବ ନାହିଁ। ଏହା ବ୍ୟତୀତ ସେ କହିଛନ୍ତି ଯେ, କେବଳ କୁଶଳୀ ରୋଷେୟା ଏହାକୁ ତିଆରି କରିପାରିବେ ଏବଂ କେବଳ ସେମାନେ ଏହାର ମାରାତ୍ମକ ବିଷାକ୍ତ ପଦାର୍ଥକୁ ଦୂର କରିପାରିବେ।