ଟ୍ରାକରେ ବସି ପବଜୀ ଖେଳିବା ହେଲା କାଳ, 3 ସାଙ୍ଗକୁ ଚାପିଦେଲା ଟ୍ରେନ
ବିହାରରେ ଇୟରଫୋନ୍ ଦେଇ ଟ୍ରାକ୍ରେ ପବଜୀ ଖେଳୁଥିଲେ ୩ ସାଙ୍ଗ । ଟ୍ରେନ ମାଡିବାରୁ ଚାଲିଗଲା ଜୀବନ ।
ନୂଆଦିଲ୍ଲୀ: ବିହାରର ବୈତିୟା ଜିଲ୍ଲାର ମୁଫାସିଲ ଥାନା ଅଞ୍ଚଳରୁ ଏକ ଅଭାବନୀୟ ଘଟଣା । ପବଜୀ ନିଶାରେ ବାୟା ହୋଇ ଚାଲିଗଲା 3 ସାଙ୍ଗର ଜୀବନ । ଟ୍ରାକରେ ବସି କାନରେ ଇୟର ଫୋନ ଦେଇ ପବଜୀ ଖେଳୁଥିବା ବେଳେ ଚାପିଦେଲା ଟ୍ରେନ । ମୁଫାସିଲ ପୋଲିସ ଷ୍ଟେସନ ଅନ୍ତର୍ଗତ ନରକାଟିଆଗଞ୍ଜ ମନସା ଟୋଲାରେ ଥିବା ରୟାଲ ସ୍କୁଲ ନିକଟରେ ଏହି ଦୁର୍ଘଟଣା ଘଟିଛି ।
3 ସାଙ୍ଗ ଏକାଠୀ ହୋଇ ପବଜୀ ଖେଳିବା ପାଇଁ ସ୍ଥିର କରିଥିଲେ । ଏହାପର ଘର ନିକଟରେ ରହିଥିବା ଟ୍ରେନ ଟ୍ରାକ ଉପରକୁ ଚାଲିଯାଇଥିଲେ । ସେଠାରେ କାନରେ ଏକ ଇୟର ଫୋନ ଦେଇ ପବଜୀ ଖେଳିବା ଆରମ୍ଭ କରିଥିଲେ । ସେମାନେ ଭାବିଥିଲେ ଏଠାରେ ବସିଲେ କେହି ତାଙ୍କୁ ହଇରାଣ କରିବେ ନାହିଁ । କିନ୍ତି ଛୋଟିଆ ଭୁଲ ପାଇଁ ଆଜି ତାଙ୍କର ଜୀବନ ଚାଲିଯାଇଛି । ହାତଧରାଧରି ହୋଇ ଏକାଥରେ 3 ଜଣ ସାଙ୍ଗ ଆରପାରିକୁ ଚାଲିଯାଇଛନ୍ତି । ଏହି ଘଟଣାପରେ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି ।
କାହିଁକି ସେମାନେ ରେଳ ଧାରଣାକୁ ଯାଇଥିଲେ, କିଏ ତାଙ୍କୁ ପ୍ରବର୍ତ୍ତାଇଥିଲା କି ଏନେଇ ବର୍ତ୍ତମାନ ଅନେକ ପ୍ରଶ୍ନବାଚୀ ସୃଷ୍ଟି ହୋଇଛ । ଖବରପାଇ ପଲିସ ଘଟଣାସ୍ଥଳରେ ପହଞ୍ଚି ମୃତଦେହ ଉଦ୍ଧାର କରି ବ୍ୟବଚ୍ଛେଦ ପାଇ ପଠାଇବା ସହିତ ସମସ୍ତ ଦିଗକୁ ନେଇ ତଦନ୍ତ ଜାରି ରଖିଛି ।