ଏଠି ଗ୍ରାହକ ନିଜେ ବନାନ୍ତି ଚା’ ଆଉ ନିଜେ କିଣନ୍ତି ଜିନିଷ… ବିନା ମାଲିକରେ ୯୦ ବର୍ଷ ହେଲାଣି ଚାଲିଛି ଚା’ ଦୋକାନ!
କୋଲକାତା: ପଶ୍ଚିମବଙ୍ଗ ହୁଗଲିର ସେରାମପୁରରେ ଏକ ବିଚିତ୍ର ଚା’ ଦୋକାନ ରହିଛି । ଯେଉଁଠାରେ କେହି ମାଲିକ ନାହାନ୍ତି । ଆଜ୍ଞା ହଁ ଆପଣ ଯାହା ପଢ଼ିଲେ ତାହା ନିରାଟ ସତ୍ୟ । ବଙ୍ଗାଳିମାନଙ୍କର ଚା’ ପ୍ରତି ଥିବା ପ୍ରୀତି କାହାକୁ ଅଛପା ନାହିଁ । ସକାଳେ ଓ ସନ୍ଧ୍ୟାରେ ହାତରେ ଚା’ ଧରି ଗପସପ କରିବା ସେମାନଙ୍କ ଅଭ୍ୟାସ । ଛାତ୍ର କାଲୀବାବୁ ଶ୍ମଶାନ ଆଗରେ ଥିବା ଏ ଚା’ ଦୋକାନ ପାଖାପାଖି ୩୦୦ରୁ ୩୫୦ ବର୍ଷ ପୁରୁଣା । ପୂର୍ବରୁ ଏଠାରେ ବଜାର ଦୋକାନ ଥିଲା । ଏ ଦୋକାନର ବିଶେଷତ୍ୱ ହେଉଛି, ଏଠାର କୌଣସି ମାଲିକ କିମ୍ବା ୱେଟର ନାହାନ୍ତି । ଯେଉଁବ୍ୟକ୍ତିଙ୍କର ଚା’ ପିଇବାକୁ ଇଚ୍ଛା ସେମାନେ ନିଜେ ଏଠାରେ ଚା’ ତିଆରି କରି ପିଇପାରିବେ । ଚା’ ଦୋକାନ କରିଥିବା ବ୍ୟକ୍ତିଙ୍କ ବିୟୋଗ ପରେ ସାଧାରଣ ଲୋକ ହିଁ ଦୋକାନର ଦାୟିତ୍ୱ ନିଜ ହାତକୁ ନେଇଛନ୍ତି ।
ଏଠାକୁ ଲୋକ କେବଳ ଚା’ ପିଇବାକୁ ନୁହେଁ ବରଂ କଥାବାର୍ତ୍ତା ଓ କିଛି ସମୟ ଅତିବାହିତ କରିବାକୁ ଆସନ୍ତି । ଚାକିରିରୁ ଅବସର ନେଇଥିବା ଲୋକେ ହିଁ ଏହି ସ୍ଥାନକୁ ଆସି ସମୟ କାଟିବାକୁ ପସନ୍ଦ କରନ୍ତି । ସେମାନେ ନିଜେ ଚା’ ତିଆରି କରି ପିଅନ୍ତି ଆଉ ଖଟି କରି ଯାଆନ୍ତି । ଚା’ ତିଆରି ଜିନିଷ ସରିଗଲେ ସେମାନେ ନିଜେ ଟଙ୍କା ଆଦାୟ କରି ଜିନିଷ ବଜାରରୁ କିଣି ଆଣନ୍ତି । କେବଳ ବୃଦ୍ଧ କି ମଧ୍ୟବୀତ୍ତ ବୟସର ଲୋକ ଏଠାରେ ଚା’ ପିଇବାକୁ ଆସନ୍ତା ତା’ ନୁହେଁ ଯୁବପିଢ଼ିଙ୍କୁ ମଧ୍ୟ ଏ ସ୍ଥାନ ଆକୃଷ୍ଟ କରୁଛି ।