ସଙ୍କେତ ଦେଲେ ଗାଙ୍ଗୁଲି, ଦ୍ରାବିଡ-ଲକ୍ଷ୍ମଣଙ୍କ ପରେ ସଚିନଙ୍କୁ ଦଳରେ ମିଳିପାରେ ବଡ ଦାୟିତ୍ଵ
ନୂଆଦିଲ୍ଲୀ : ଭାରତୀୟ କ୍ରିକେଟ୍ କଣ୍ଟ୍ରୋଲ ବୋର୍ଡ(ବିସିସିଆଇ) ରାହୁଲ ଦ୍ରାବିଡଙ୍କୁ ମୁଖ୍ୟ କୋଚ୍ ଦାୟିତ୍ଵ ଦେବା ପରେ ଭିଭିଏସ ଲକ୍ଷ୍ମଣଙ୍କୁ ଜାତୀୟ କ୍ରିକେଟ୍ ଏକାଡେମୀ(ଏନସିଏ)ର ନିର୍ଦ୍ଦେଶକ ଭାବେ ନିଯୁକ୍ତ ଦେଇ ସାରିଛି । ଆଉ ଏଥିରେ ବିସିସିଆଇ ଅଧ୍ୟକ୍ଷ ସୌରଭ ଗାଙ୍ଗୁଲିଙ୍କ ଗୁରୁତ୍ଵପୂର୍ଣ୍ଣ ଭୂମିକା ରହିଛି। ଏହା ପରେ ଚାରିଆଡେ ଚର୍ଚ୍ଚା ଆରମ୍ଭ ହୋଇଯାଇଛି ଯେ, ଭାରତୀୟ କ୍ରିକେଟରେ ଗାଙ୍ଗୁଲିଙ୍କ ଯୁଗର ପ୍ରତ୍ୟାବର୍ତ୍ତନ ଘଟିଛି। ଗାଙ୍ଗୁଲି ଦ୍ରାବିଡ ଓ ଲକ୍ଷ୍ମଣଙ୍କ ପରେ ମହାନ ବ୍ୟାଟସମ୍ୟାନ ସଚିନ ତେନ୍ଦୁଲକରଙ୍କୁ ଏହି ତାଲିକାରେ ଯୋଡିବାର ସଙ୍କେତ ଦେଇଛନ୍ତି। ତେବେ ଦାଦା ଏହା ମଧ୍ୟ କହିଛନ୍ତି, ସଚିନଙ୍କ ମାମଲାରେ କିଛିଟା ଭିନ୍ନ ରହିପାରେ ।
ସାମ୍ବାଦିକ ବୋରିଆ ମଜୁମଦାରଙ୍କ ଶୋ ‘ବ୍ୟାକଷ୍ଟେଜ୍ ଓ୍ଵିଥ୍ ବୋରିଆ’ରେ ଗାଙ୍ଗୁଲି କହିଛନ୍ତି ଯେ, ସଚିନ ସ୍ପଷ୍ଟ ଭାବେ କିଛିଟା ଭିନ୍ନ । ସେ ଏହି ସବୁରେ ସାମିଲ୍ ହେବାକୁ ଚାହାନ୍ତି ନାହିଁ । ମୋତେ ବିଶ୍ଵାସ ଯେ, ସଚିନଙ୍କ ଭାରତୀୟ କ୍ରିକେଟରେ ସାମିଲ୍ ହେବାଠୁ ବଡ ଅନ୍ୟ କୌଣସି ଖବର ହୋଇ ପାରିବ ନାହିଁ । କେଉଁଭଳି ସଚିନଙ୍କୁ ଭାରତୀୟ ଦଳରେ ଜଡିତ କରାଯିବ ଏହା ଉପରେ କାମ କରାଯିବାର ଆବଶ୍ୟକତା ରହିଛି । କାରଣ ଆପଣ ଠିକ୍ କରନ୍ତୁ କି ଭୁଲ୍ କରନ୍ତୁ ଚାରିଆଡେ ଖାଲି ବିବାଦ ହିଁ ବିବାଦ । ବିବାଦ ଦ୍ଵାରଦେଶକୁ ବି ଚାଲି ଆସୁଛି । ଆପଣଙ୍କୁ କ୍ରିକେଟର ସବୁଠୁ ଭଲ ପ୍ରତିଭା ସାମିଲ୍ କରିବାର ସବୁଠୁ ଭଲ ତରିକା ଖୋଜିବାର ଆବଶ୍ୟକତା ରହିଛି। ସେହିପରି ଯେମିତି ହେଲେ ସଚିନଙ୍କୁ ଭାରତୀୟ ଦଳରେ ସାମିଲ୍ ହେବାର ଉପାୟ ଖୋଜି ନେବୁ ବୋଲି ଗାଙ୍ଗୁଲି କହିଛନ୍ତି।