ଦୁର୍ଦ୍ଦିନରେ ଆଫଗାନବାସୀ! ଖାଦ୍ୟ ପାଇଁ କରୁଛନ୍ତି ଅଙ୍ଗ ପ୍ରତ୍ୟଙ୍ଗ ବିକ୍ରି
ଆଫଗାନିସ୍ତାନରୁ ଆମେରିକା ଏବଂ ବ୍ରିଟେନ ନିଜର ସୈନ୍ୟ ପ୍ରତ୍ୟାହାର କରିବା ପରଠାରୁ ସେଠାରେ ସ୍ଥିତି ଖରାପ ହେବାରେ ଲାଗିଛି । ବର୍ତ୍ତମାନ ଲୋକେ ଏଠାରେ ଭୋକଉପାସରେ ଦିନ କାଟୁଛନ୍ତି । ଦାରିଦ୍ର୍ୟର ଏପରି ପରସ୍ଥିତି ଉପୁଜିଛି ଯେ ଲୋକମାନେ ଟଙ୍କା ପାଇଁ କିଡନୀ ଭଳି ଅଙ୍ଗ ପ୍ରତ୍ୟଙ୍ଗ ବିକ୍ରି କରୁଛନ୍ତି । ଅଗଷ୍ଟ ୨୦୨୧ ଠାରୁ ଏଠାରେ ଏଭଳି ପରିସ୍ଥିତି ରହିଛି ।
ଆଫଗାନିସ୍ତାନର ସ୍ଥାନୀୟ ଲୋକମାନେ କହିଛନ୍ତି ଯେ କୋଡିଏ ବର୍ଷ ପରେ ଏପରି ପରିସ୍ଥିତି ସୃଷ୍ଟି ହୋଇଛି ଯେତେବେଳେ ଲୋକଙ୍କ ପାଖରେ ଖାଦ୍ୟ ଓ ପାନୀୟ ଅଭାବ ରହିଛି। କିଛି ମାସ ମଧ୍ୟରେ, ପରିସ୍ଥିତି ଏପରି ହୋଇଛି ଯେ ଲୋକଙ୍କୁ ଟଙ୍କା ପାଇଁ ଶରୀରର ଅଙ୍ଗ ବିକ୍ରି କରିବାକୁ ପଡିବ । ଦି ମିରର ଖବର ଅନୁଯାୟୀ, ଆଫଗାନିସ୍ତାନର ମହିଳାମାନେ ନିଜ ପିଲାମାନଙ୍କୁ ଟଙ୍କା ପାଇଁ ବିକ୍ରି କରୁଥିବା ଖବର ମଧ୍ୟ ସାମ୍ନାକୁ ଆସିଛି।
ସୂଚନା ପ୍ରଦାନ କରି ଆଫଗାନିସ୍ତାନର ୟୁରୋଲୋଜିଷ୍ଟ ଏବଂ କିଡନୀ ଟ୍ରାନ୍ସପ୍ଲାଣ୍ଟ ସର୍ଜନ ଡା.ନାସିର ଅହମ୍ମଦ କହିଛନ୍ତି ଯେ ଗତ ୧୨ ମାସ ମଧ୍ୟରେ ସେ ନିଜେ ୮୫ କିଡନୀ କଢିଛନ୍ତି । ଏଠାରେ ଗୋଟିଏ କିଡନୀ ସାଢ଼େ ଚାରି ଲକ୍ଷ ଟଙ୍କାରେ ବିକ୍ରି ହୁଏ । ଏଥିରେ ଡାକ୍ତରଖାନା ଖର୍ଚ୍ଚ, ଔଷଧ ଏବଂ ଅପରେସନ୍ ଫି ଅନ୍ତର୍ଭୁକ୍ତ । ଡକ୍ଟର ଅହମ୍ମଦ କହିଛନ୍ତି କିଡନୀ ବିକ୍ରି କରିବା ଜୀବନ ପ୍ରତି ବିପଦ ସୃଷ୍ଟି କରୁଛି। ଟଙ୍କା ଅଭାବରୁ କିଡନୀ ବିକ୍ରି କରିବା ପରେ ଲୋକମାନେ ଦୀର୍ଘ ସମୟ ଧରି ଯନ୍ତ୍ରଣା ଭୋଗନ୍ତି । ଆଫଗାନିସ୍ତାନରେ କିଡନୀ ଦାନ କରିବାର ସଂସ୍କୃତି ନାହିଁ । ଏଠାରେ କିଡନୀ ବିକ୍ରି କରିବାର ସଂସ୍କୃତି ଅଛି । ଗରିବ ଲୋକମାନେ କିଡନୀ ବିକ୍ରି କରିବାକୁ ରାଜି ହୁଅନ୍ତି ।
ସେପଟେ ଟଙ୍କା ଅଭାବରୁ କିଡନୀ ବିକ୍ରି ଖବର ଉପରେ ତାଲିବାନ ସ୍ପଷ୍ଟ କରିଛି ଯେ ଏଭଳି କିଛି ହେଉନାହିଁ ତାଲିବାନ ଲୋକଙ୍କ ମଧ୍ୟରେ ରାସନ ବଣ୍ଟନ କରୁଛି। ଏଥିସହିତ ଜାତିସଂଘ ମଧ୍ୟ କୋଟି କୋଟି ଟଙ୍କା ସାହାଯ୍ୟ କରୁଥିବା ନେଇ କହିଛି । ପ୍ରାୟ ୪୦ ହଜାର ଶ୍ରମିକଙ୍କୁ ପ୍ରତିଦିନ ୧୦ କିଲୋଗ୍ରାମ ଗହମ ଦିଆଯାଉଛି ।