International Debut କରିବେ ରାହୁଲ ତ୍ରିପାଠୀ? ଜିମ୍ବାୱେ ବିପକ୍ଷ ପ୍ରଥମ ଦିନିକିଆରେ ଏମିତି ରହିପାରେ ଭାରତର Playing XI
ନୂଆଦିଲ୍ଲୀ: ଆସନ୍ତାକାଲି ଅର୍ଥାତ ୧୮ ତାରିଖରୁ ଜିମ୍ବାୱେ-ଭାରତ ଦିନିକିଆ ସିରିଜ ଆରମ୍ଭ ହେବାକୁ ଯାଉଛି । ହରାରେ ସ୍ପୋର୍ଟସ କ୍ଲବ ପରିସରରେ ଏହି ସିରିଜର ପ୍ରଥମ ମ୍ୟାଚ ଖେଳାଯିବ । ତେବେ ଏହି ମ୍ୟାଚରୁ ହିଁ ଭାରତର ଷ୍ଟାର ବ୍ୟାଟ୍ସମ୍ୟାନ ରାହୁଲ ତ୍ରିପାଠୀଙ୍କୁ ଡେବ୍ୟୁ କରିବାର ସୁଯୋଗ ମିଳିପାରେ ବୋଲି ଆଶା କରାଯାଉଛି । ସେହିପରି ଦୀର୍ଘ ଦିନ ପରେ ଦଳର ଅଧିନାୟକ କେ.ଏଲ ରାହୁଲ ଏବଂ ଷ୍ଟାର ବୋଲର ଦୀପକ ଚହର ଆହତ ସମସ୍ୟାରୁ ବାହାରି ଦଳରେ ଯୋଗ ଦେଇଛନ୍ତି ।
ଏସିଆ କପ୍-୨୦୨୨ ପୂର୍ବରୁ ରୋହିତ ଶର୍ମା, ବିରାଟ କୋହଲିଙ୍କ ସମେତ ଜସପ୍ରୀତ ବୁମରାହ ଏବଂ ହାର୍ଦ୍ଦିକ ପାଣ୍ଡ୍ୟାଙ୍କ ଭଳି ସିନିୟର ଖେଳାଳିମାନଙ୍କୁ ବିଶ୍ରାମ ଦିଆଯାଇଛି । ତେଣୁ ଏହି ଦିନିକିଆ ସିରିଜ ପାଇଁ ଯୁବ ଖେଳାଳିମାନଙ୍କୁ ସୁଯୋଗ ଦେଇଛି ବିସିସିଆଇ । ଶୁଭମନ ଗିଲ ଏବଂ ରାହୁଲ ତ୍ରିପାଠୀଙ୍କ ଭଳି କିଛି ପ୍ରତିଭାବାନ ଖେଳାଳିମାନଙ୍କ ପାଇଁ ଏହି ସିରିଜ ଖୁବ ଗୁରୁତ୍ୱପୂର୍ଣ୍ଣ ରହିବ । ତେବେ ଏହି ସିରିଜ ପାଇଁ କୋଚ ରହୁଲ ଦ୍ରାବିଡ ମଧ୍ୟ ବିଶ୍ରାମ ନେଇଛନ୍ତି । ତେଣୁ ତାଙ୍କ ସ୍ଥାନରେ ଦଳର କୋଚିଂ ପଦ ସମ୍ଭାଳିବେ ଭିଭିଏସ ଲକ୍ଷ୍ମଣ ।
ଏହି ସିରିଜ ପାଇଁ ମଧ୍ୟ ଟିମ୍ ଚୟନ କରିବା ପାଇଁ ଲକ୍ଷ୍ମଣ ଦ୍ୱନ୍ଦ୍ୱରେ ପଡିପାରନ୍ତି । ୱିକେଟ କିପର ଭାବରେ ଦଳରେ ସଞ୍ଜୁ ସାମସନ ଏବଂ ଇଶାନ କିଶାନ ରହିଥିବା ବେଳେ ସେ କାହାକୁ ସ୍ଥାନ ଦେବେ ତାହା ଏକ ପ୍ରଶ୍ନ ହୋଇ ଠିଆ ହୋଇଛି । ସେହିପରି ଓପନର ଭାବରେ କିଏ ପାଳି ଆରମ୍ଭ କରିବେ ସେ ନେଇ ମଧ୍ୟ ଅନେକ ଆଲୋଚନା ହେଉଛି । ଭାରତ ନିକଟରେ କେ.ଏଲ ରାହୁଲ, ଶିଖର ଧୱନଙ୍କ ସମେତ ଋତୁରାଜ ଗାଏକ୍ୱାଡ ଏବଂ ଇଶାନ କିଶାନଙ୍କ ବିକଳ୍ପ ରହିଛନ୍ତି । ସେପଟେ ରାହୁଲ ତ୍ରିପାଠୀ ଆଇପିଏଲ ଏବଂ ଘରୋଇ କ୍ରିକେଟରେ ଦମଦାର ପ୍ରଦର୍ଶନକୁ ଏହି ପ୍ଲାଟଫର୍ମରେ ମଧ୍ୟ ପ୍ରମାଣିତ କରିବାକୁ ଚାହିଁବେ ।
ତେବେ ଦଳ ପାଇଁ ସବୁଠୁ ବଡ ପ୍ରଶ୍ନବାଚୀ ରହିବ ଶୁଭମନ ଗିଲ ଏବଂ ତାଙ୍କ ବ୍ୟାଟିଂ ପୋଜିସନକୁ ନେଇ । ଗତ ୱେଷ୍ଟଇଣ୍ଡିଜ ବିପକ୍ଷରେ ଓପନିଙ୍ଗ କରି ୨୦୦ରୁ ଅଧିକ ରନ ସଂଗ୍ରହ କରିଥିଲେ । ଯେଉଁଥିପାଇଁ ତାଙ୍କ ସିରିଜର ପ୍ଲେୟର ଅଫ ଦ ସିରିଜ ଭାବେ ବିବେଚନା ହୋଇଥିଲେ । କିନ୍ତୁ କେ.ଏଲ ରାହୁଲଙ୍କ ପ୍ରତ୍ୟାବର୍ତ୍ତନ ପରେ ତାଙ୍କୁ ମଧ୍ୟକ୍ରମରେ ଖେଳିବା ପାଇଁ ସୁଯୋଗ ଦିଆଯାଇପାରେ । ସେହିନରି ଏହି ସିରିଜରେ କୁଳଦୀପ-ଅକ୍ସର ଯୋଡିଙ୍କୁ ନେଇ ଖେଳିପାରନ୍ତି ରାହୁଲ । ତେବେ ଆସନ୍ତୁ ଜାଣିବା କ’ଣ ରହିପାରେ ଭାରତର ପ୍ଲେଇଙ୍ଗ ୧୧:-
କେ.ଏଲ ରାହୁଲ(ଅଧିନାୟକ), ଶିଖର ଧୱନ(ଉପଅଧିନାୟକ), ରାହୁଲ ତ୍ରିପାଠୀ, ଶୁଭମନ ଗିଲ, ଇଶାନ କିଶାନ, ଦୀପକ ହୁଡ୍ଡା, ଅକ୍ସର ପଟେଲ, ଦୀପକ ଚହର, କୁଳଦୀପ ଯାଦବ, ପ୍ରସିଦ୍ଧ କ୍ରିଷ୍ଣା ଏବଂ ମହମଦ ସିରାଜ
