IPLରେ ଆଜି ଐତିହାସିକ ମ୍ୟାଚ: ପ୍ରଥମ ଥର ଭାଇ-ଭାଇ ଭିତରେ ମୁକାବିଲା, ଲଢିବେ ପାଣ୍ଡ୍ୟା ବ୍ରଦର୍ସ

ନୂଆଦିଲ୍ଲୀ: ଇଣ୍ଡିଆନ ପ୍ରିମିୟର ଲିଗରେ ଯୋଡି ହେଉଛି ଇତିହାସର ଗୋଟିଏ ପରେ ଗୋଟିଏ ଫର୍ଦ୍ଦ । ଆଜି ଚଳିତ ସିଜନର ୫୧ତମ ମ୍ୟାଚରେ ମଧ୍ୟ ଆଉ ଏକ ଇତିହାସ ଲେଖିବାକୁ ଯାଉଛି ଆଇପିଏଲ । ଆଜିର ପ୍ରଥମ ମ୍ୟାଚରେ ମୁହାଁମୁହିଁ ହେବେ ଗୁଜୁରାଟ ଟାଇଟନ୍ସ ଏବଂ ଲକ୍ଷ୍ନୌ ସୁପର ଜିଆଣ୍ଟସ । ଯେଉଁ ମ୍ୟାଚରେ ଅଧିନାୟକ ଭାବରେ ଦୁଇ ଭାଇ ପରସ୍ପରକୁ ସାମନା କରିବେ । ଗୋଟିଏ ପଟେ ହାର୍ଦ୍ଦିକ ପାଣ୍ଡ୍ୟା ଗୁଜୁରାଟର ଅଧିନାୟକ ଥିବା ବେଳେ କ୍ରୁନାଲ ପାଣ୍ଡ୍ୟାଙ୍କୁ ମଧ୍ୟ ସୁପର ଜିଆଣ୍ଟସର ନେତୃତ୍ୱ ମିଳିଛି ।

ଆଇପିଏଲ ଇତିହାସରେ ଅନେକ ସମୟରେ ଦୁଇ ଭାଇଙ୍କୁ ଖେଳିବାର ଦେଖାଯାଇଛି । ଇରଫାନ ପଠାନ-ୟୁସୁଫ ପଠାନ୍, ମିଚେଲ ମାର୍ଶ-ସନ୍ ମାର୍ଶ, ସାମ୍ କରନ- ଟମ୍ କରନ ଏବଂ ହାର୍ଦ୍ଦିକ ପାଣ୍ଡ୍ୟା-କ୍ରୁନାଲ ପାଣ୍ଡ୍ୟାଙ୍କ ଭଳି ଆହୁରି ଉଦାହରଣ ରହିଛି । ତେବେ ଅନେକ ସମୟରେ ଏମାନଙ୍କୁ ପରସ୍ପରଙ୍କ ବିରୋଧରେ ମଧ୍ୟ ଖେଳୁଥିବାର ଦେଖାଯାଏ । କିନ୍ତୁ ଇତିହାସରେ ପ୍ରଥମ ଥର ଦୁଇ ଭାଇ ଦୁଇଟି ଦଳର ଅଧିନାୟକ ଭାବରେ ମୁହାଁମୁହିଁ ହେବାକୁ ଯାଉଛନ୍ତି । ଏମିତି କରି ଇତିହାସରେ ଏକ ନୂଆ ଅଧ୍ୟାୟ ଲେଖିବାକୁ ତତ୍ପର ପାଣ୍ଡ୍ୟା ବ୍ରଦର୍ସ । ୨୦୨୨ରେ ମୁମ୍ବାଇରୁ ଅଲଗା ହେବା ପରେ ଗୁଜୁରାଟ ପାଣ୍ଡ୍ୟାଙ୍କୁ ଅଧିନାୟକ ପଦ ଦେଇଥିଲା । ସେପଟେ ଲକ୍ଷ୍ନୌ ସୁପର ଜିଆଣ୍ଟସ ଦଳରେ ସାମିଲ ହୋଇଥିଲେ କ୍ରୁନାଲ ପାଣ୍ଡ୍ୟା । କିନ୍ତୁ ଚଳିତବର୍ଷ ଦଳର ଲକ୍ଷ୍ନୌର ଅଧିନାୟକ କେ.ଏଲ ରାହୁଲ ଆହତ ହୋଇ ବାଦ୍ ପଡିବାରୁ ତାଙ୍କ ସ୍ଥାନରେ ଦଳର ନେତୃତ୍ୱ ନେଉଛନ୍ତି କ୍ରୁନାଲ ।

ତେବେ ଆଜି ଏହି ଦୁଇ ଦଳ ନିଜ ନିଜ ଭିତରେ ମହାମୁକାବିଲା ଖେଳିବାକୁ ଯାଉଛନ୍ତି । ଅର୍ଥାତ୍ ପାଣ୍ଡ୍ୟା ବ୍ରଦର୍ସ ମଧ୍ୟ ଏହି ମ୍ୟାଚରେ ଲଢେଇ କରିବା ପାଇଁ ମଇଦାନକୁ ଓହ୍ଲାଇବେ । ଇଣ୍ଡିଆନ୍ ପ୍ରିମିୟର ଲିଗର ଇତିହାସରେ ପୂର୍ବରୁ କେବେ ଏଭଳି ସଂଯୋଗ ଦେଖିବାକୁ ମିଳି ନଥିଲା । ତେଣୁ ଯଦି ଆଜି ପାଣ୍ଡ୍ୟା ବ୍ରଦର୍ସ ଉଭୟ ଦଳ ପାଇଁ ଉପସ୍ଥିତ ରୁହନ୍ତି, ତେବେ ଆଇପିଏଲରେ ଏକ ନୂଆ ଇତିହାସ ଲେଖାଯିବ ।