ଜୁଲାଇ ଆରମ୍ଭରୁ ଆସିଲା ବଡ ଖୁସି ଖବର: ଜିଏସଟି ହ୍ରାସ ଦ୍ୱାରା ଶସ୍ତା ହେଲା ଏହିସବୁ ଇଲେକ୍ଟ୍ରୋନିକ ଜିନିଷ
ନୂଆଦିଲ୍ଲୀ: ସ୍ମାର୍ଟଫୋନ୍, ଟିଭି, ଫ୍ରିଜ୍ ଓ ୱାଶିଂ ମେସିନ୍ ପରି ବହୁ ଇଲେକ୍ଟ୍ରୋନିକ ଜିନିଷ ଆଜି ଠାରୁ ଶସ୍ତା ହୋଇଯାଇଛି । ସରକାର ଇଲେକ୍ଟ୍ରୋନିକ ଜିନିଷ କ୍ରୟ ଉପରେ ଜିଏସଟି କମ୍ କରି ଦେଇଛନ୍ତି । ଏବେ ଗ୍ରାହକ ଏହିସବୁ ଜିନିଷ କିଣିବା ଲାଗି ୩୧.୩ ପ୍ରତିଶତ ଜିଏସଟି ଦେବେ ନାହିଁ । ସରକାର ଏହି ସମସ୍ତ ଇଲେକ୍ଟ୍ରୋନିକ ଜିନିଷ ଉପରେ ଜିଏସଟି ପ୍ରାୟ ଅଧା କରି ଦେଇଛନ୍ତି । ତେଣୁ ଆପଣ ପୂର୍ବାପେକ୍ଷା ଏହି ସମସ୍ତ ଜିନିଷକୁ ଶସ୍ତାରେ କିଣିପାରିବେ ।
ସରକାର ସ୍ମାର୍ଟଫୋନ୍, ଟିଭି, ଫ୍ରିଜ୍ ଓ ୱାଶିଂ ମେସିନ୍, ୟୁପିଏସ୍ ଆଦି ଇଲେକ୍ଟ୍ରୋନିକ ଜିନିଷ ଉପରେ ଜିଏସଟି ହ୍ରାସ କରି ସାଧାରଣ ଲୋକଙ୍କୁ ଆଶ୍ୱସ୍ତି ଦେଇଛନ୍ତି । ଏ ପର୍ଯ୍ୟନ୍ତ ଏହି ସମସ୍ତ ସାମଗ୍ରୀ ଉପରେ ୩୧.୩ ପ୍ରତିଶତ ପର୍ଯ୍ୟନ୍ତ ଜିଏସଟି ଆଦାୟ କରାଯାଉଥଇଲା । କିନ୍ତୁ ଏବେ ହ୍ରାସ କରାଯାଇ ୧୮ରୁ ୧୨ ପ୍ରତିଶତ ମଧ୍ୟରେ ଆଦାୟ କରାଯିବ । କେନ୍ଦ୍ର ଅର୍ଥମନ୍ତ୍ରଣାଳୟ ପକ୍ଷରୁ ଏହି ସମସ୍ତ ହୋମ୍ ଆପ୍ଲାଏନ୍ସ ଓ ଇଲେକ୍ଟ୍ରୋନିକ ଜିନିଷ ଉପରେ ପ୍ରଦାନ କରାଯାଇଥିବା ଜିଏସଟି ରିହାତି ବିଷୟରେ ଟୁଇଟ୍ ଜରିଆରେ ସେୟାର କରାଯାଇଛି ।
With reduced taxes, #GST brings happiness to every home: Relief through #GST on household appliances and mobile phones 👇#6YearsofGST #TaxReforms #GSTforGrowth pic.twitter.com/6qbdaERpzp
— Ministry of Finance (@FinMinIndia) June 30, 2023
ସରକାର ୨୭ ଇଞ୍ଚ କିମ୍ବା ଏହାଠାରୁ କମ୍ ସ୍କ୍ରିନ୍ ସାଇଜ୍ ଟିଭି ଉପରେ ଜିଏସଟି ୩୧.୩ ପ୍ରତିଶତରୁ କମ୍ କରି ୧୮ ପ୍ରତିଶତ କରି ଦେଇଛନ୍ତି । ସେହିପରି ସରକାର ମୋବାଇଲ୍ ଫୋନ୍ ଉପରେ ମଧ୍ୟ ଜିଏସଟି କମ୍ କରିଛନ୍ତି । ପୂର୍ବରୁ ଗ୍ରାହକଙ୍କୁ ମୋବାଇଲ୍ ଫୋନ୍ କ୍ରୟ ଉପରେ ୩୧.୩ ପ୍ରତିଶତ ଜିଏସଟି ଦେବାକୁ ପଡୁଥିବା ବେଳେ ଏବେ ୧୨ ପ୍ରତିଶତ ଜିଏସଟି ଦେବାକୁ ହେବ ।
ୱାଶିଂ ମେସିନ୍ ଓ ରେଫ୍ରିଜରେଟର ପରି ଘରୋଇ ଉପକରଣ ସହିତ ଫ୍ୟାନ୍, କୁଲର, ଗୀଜର ମଧ୍ୟ ଶସ୍ତା ହୋଇଯିବ । ଏହିସବୁ ଘରୋଇ ଉପକରଣ ଉପରେ ଜିଏସଟି ୩୧.୩ ପ୍ରତିଶତରୁ କମାଇ ୧୮ ପ୍ରତିଶତ କରି ଦିଆଯାଇଛି । ଅର୍ଥାତ୍ ମୂଲ୍ୟ ୧୨ ପ୍ରତିଶତ ପର୍ଯ୍ୟନ୍ତ ହ୍ରାସ ପାଇବ । ଅନ୍ୟ ଘରୋଇ ଇଲେକ୍ଟ୍ରୋନିକ ଜିନିଷ ଯେପରିକି ଗ୍ରାଇଣ୍ଡର, ଜୁସର, ଭାକ୍ୟୁମ କ୍ଲିନର, ଏଲଇଡି ଆଦି ଉପରେ ମଧ୍ୟ ଜିଏସଟି ହ୍ରାସ କରାଯାଇଛି ।
