୧୦ ହଜାର ମିଟର ରେସରେ ଭାରତ ଜିତିଲା ୨ଟି ପଦକ: କାର୍ତ୍ତିକ ଏବଂ ଗୁଲବୀର ରଚିଲେ ଇତିହାସ
ନୂଆଦିଲ୍ଲୀ: ଚୀନର ହାଙ୍ଗଜୋ ସହରରେ ଚାଲିଥିବା ୧୯ତମ ଏସିଆନ୍ ଗେମ୍ସରେ ଆଥଲେଟିକ୍ସର ସପ୍ତମ ଦିନରେ ପୁରୁଷ ୧୦,୦୦୦ ମିଟର ରେସ୍ ଇଭେଣ୍ଟରେ ଭାରତ ଉଭୟ ରୌପ୍ୟ ଏବଂ ବ୍ରୋଞ୍ଜ ପଦକ ହାସଲ କରିଛି । ଭାରତରୁ ଏହି ଇଭେଣ୍ଟରେ ଅଂଶଗ୍ରହଣ କରିଥିବା କାର୍ତ୍ତିକ କୁମାର ୨୮:୧୫:୩୮ ସମୟ ସହ ରୌପ୍ୟ ପଦକ ଜିତିଥିବାବେଳେ ଗୁଲବୀର ୨୮:୧୭:୨୧ ସମୟ ସହ ବ୍ରୋଞ୍ଜ ପଦକ ଜିତିଛନ୍ତି । ଭାରତର ଆଥଲେଟିକ୍ସ ଅର୍ଥାତ୍ ଟ୍ରାକ୍ ଏବଂ ଫିଲ୍ଡରେ ଏହି ଏସୀୟ ଗେମ୍ସରେ ଏହା ହେଉଛି ତୃତୀୟ ପଦକ । ଏହାପୂର୍ବରୁ ଷଷ୍ଠ ଦିନରେ କିରଣ ବାଲିଆନ ମହିଳା ସଟ ପୁଟ ଇଭେଣ୍ଟରେ ବ୍ରୋଞ୍ଜ ପଦକ ଜିତିଥିଲେ ।
Kartik Kumar and Gulveer Singh win silver and bronze medals for India in men’s 10000m race
— Press Trust of India (@PTI_News) September 30, 2023
ଭାରତ ଏସିଆନ ଗେମ୍ସ ୨୦୨୩ ରେ ଏପର୍ଯ୍ୟନ୍ତ ମୋଟ ୧୦ ଟି ସ୍ୱର୍ଣ୍ଣ ପଦକ ଜିତିଛି । ଏହା ବ୍ୟତୀତ ୧୪ ଟି ରୌପ୍ୟ ଏବଂ ୧୪ ଟି ବ୍ରୋଞ୍ଜ ପଦକ ମଧ୍ୟ ଜିତିଛି, ଏହା ପରେ ମୋଟ ପଦକ ସଂଖ୍ୟା ୩୮ ରେ ପହଞ୍ଚିଛି । ଏବେ ଭାରତ ଆଥଲେଟିକ୍ସରେ ଅଧିକ ପଦକ ଜିତିବାର ଆଶା କରାଯାଉଛି, ଯେଉଁଥିରେ ଜାଭେଲିନ୍ ଇଭେଣ୍ଟରେ ସମସ୍ତଙ୍କ ନଜର ନୀରଜ ଚୋପ୍ରାଙ୍କ ଉପରେ ରହିବ ।
ଅନ୍ୟପଟେ ସ୍କ୍ୱାଶ୍ରେ ପାକିସ୍ତାନକୁ ହରାଇଛି ଭାରତ । ଫାଇନାଲରେ ପାକିସ୍ତାନକୁ ମାତ୍ ଦେଇ ସ୍ୱର୍ଣ୍ଣ ଜିତିଛି ଭାରତ । ପୁରୁଷ ଟିମ୍ ଇଭେଣ୍ଟରେ ପାକିସ୍ତାନକୁ ୨-୧ରେ ହରାଇଛି । ଚେନ୍ନାଇର ଅଭୟ ସିଂହ, ନିଜର ଜଲ୍ଵା ଦେଖେଇଛନ୍ତି । ସେ ନୂର ଜମାନଙ୍କୁ ୩-୨ ରେ ପରାସ୍ତ କରିଥିଲେ। ଏହି ମ୍ୟାଚରେ ୨୫ ବର୍ଷୀୟ ଭାରତୀୟ ଖେଳାଳି ଦୁଇଟି ସ୍ୱର୍ଣ୍ଣ ପଏଣ୍ଟ ବଞ୍ଚାଇ ବିଜେତା ହୋଇଥିଲେ। ଏହି ବିଜୟ ପରେ ସେ ନିଜ ରାକେଟକୁ ଉପରକୁ ଫିଙ୍ଗି ଦେଇଥିଲେ। ଏହା ପୂର୍ବରୁ ଅଭିଜ୍ଞ ସୌରଭ ଘୋଷାଲ ମହମ୍ମଦ ଅସୀମ ଖାନଙ୍କୁ ୩-୦ ଗୋଲରେ ପରାସ୍ତ କରି ଭାରତକୁ ମ୍ୟାଚ୍ ରେ ପ୍ରତ୍ୟାବର୍ତ୍ତନ କରାଇଥିବା ବେଳେ ମହେଶ ମାନଗାଓଁକର ପ୍ରଥମ ମ୍ୟାଚ୍ ରେ ଇକବାଲ ନାସିରଙ୍କଠାରୁ ସମାନ ବ୍ୟବଧାନରେ ପରାସ୍ତ ହୋଇଥିଲେ। ଫଳରେ ଲିଗ୍ ପର୍ଯ୍ୟାୟରେ ପାକିସ୍ତାନ ବିପକ୍ଷ ପରାଜୟର ପ୍ରତିଶୋଧ ନେଇଥିଲା ଭାରତ। ୨୦୧୪ ସଂସ୍କରଣରେ ଭାରତ ପୁରୁଷ ଦଳର ସ୍କ୍ୱାସ୍ ସ୍ୱର୍ଣ୍ଣ ଜିତିଥିବା ବେଳେ ପାକିସ୍ତାନ ଶେଷ ଥର ପାଇଁ ୨୦୧୦ରେ ଗୁଆଙ୍ଗଝୁରେ ସ୍ୱର୍ଣ୍ଣ ପଦକ ଜିତିଥିଲା।
