ଷ୍ଟାର ଅଲରାଉଣ୍ଡରଙ୍କ ହାତ ଛାଡ଼ିଲା CSK: ସୋସିଆଲ ମିଡିଆ ପୋଷ୍ଟରୁ ଖୋଲିଲା ରହସ୍ୟ
ନୂଆଦିଲ୍ଲୀ: ଆଇପିଏଲ-୨୦୨୪ ପାଇଁ ପ୍ରସ୍ତୁତି ଆରମ୍ଭ କରି ଦେଇଛନ୍ତି ସମସ୍ତ ଫ୍ରାଞ୍ଚାଇଜି । ଆଜି ସନ୍ଧ୍ୟା ପର୍ଯ୍ୟନ୍ତ ଖେଳାଳି ମାନଙ୍କ ରିଲିଜ ଏବଂ ରିଟେନ୍ ପାଇଁ ଶେଷ ସମୟ ରଖାଯାଇଛି । ଏହି ତାଲିକାରେ ଚମ୍ପିଆନ୍ ଟିମ୍ ଚେନ୍ନାଇ ସୁପର କିଙ୍ଗସ ମଧ୍ୟ ଯୋଡ଼ି ହୋଇଛି । ଚେନ୍ନାଇ ବର୍ତ୍ତମାନ ଦଳର ଜଣେ ଷ୍ଟାର ଅଲରାଉଣ୍ଡରଙ୍କୁ ବାଦ୍ ଦେଇଛି । ରିଟେନ୍ସନ ତାଲିକା ଦେବା ପୂର୍ବରୁ ଚେନ୍ନାଇ ଏହି ଅଲରାଉଣ୍ଡରଙ୍କୁ ଦଳରୁ ଛାଡ଼ିବା ପାଇଁ ନିଷ୍ପତ୍ତି ନେଇଛି । ଏ ନେଇ ଖେଳାଳି ସୋସିଆଲ ମିଡିଆରେ ଏକ ପୋଷ୍ଟ କରିଛନ୍ତି, ଯାହାକୁ ନେଇ ଚର୍ଚ୍ଚା ଆରମ୍ଭ ହୋଇଯାଇଛି ।
ସୋସିଆଲ ମିଡିଆ ପ୍ଲାଟଫର୍ମ ଇନଷ୍ଟାଗ୍ରାମରେ ଏକ ପୋଷ୍ଟ କରିଛନ୍ତି ଚେନ୍ନାଇ ସୁପର କିଙ୍ଗସର ଷ୍ଟାର ଅଲରାଉଣ୍ଡର ଡ୍ୱେନ ପ୍ରିଟୋରିୟସ । ଦକ୍ଷିଣ ଆଫ୍ରିକାର ଅଲରାଉଣ୍ଡରଙ୍କ ଏହି ପୋଷ୍ଟକୁ ନେଇ ଏବେ ଚର୍ଚ୍ଚା ଆରମ୍ଭ ହୋଇଯାଇଛି । ଏହି ପୋଷ୍ଟରେ ପ୍ରିଟୋରିୟସ ଲେଖିଛନ୍ତି ଯେ, ଧନ୍ୟବାଦ୍ ସିଏସକେ । ମୁଁ ମୋର ଚେନ୍ନାଇ ସହିତ ରହି ଖୁବ ସୁନ୍ଦର ରହିଛି । ତେଣୁ ଟିମ୍ ମ୍ୟାନେଜମେଣ୍ଟ, କୋଚ୍ ଏବଂ ଖେଳାଳିଙ୍କ ସହ ଫ୍ୟାନ୍ସମାନଙ୍କୁ ଧନ୍ୟବାଦ ଜଣାଇବାକୁ ଚାହିଁବି । ଆଗାମୀ ସିଜନ ପାଇଁ ଦଳକୁ ଶୁଭକାମନା । ପ୍ରିଟୋରିୟସଙ୍କ ଏହି ପୋଷ୍ଟ ପରେ ଫ୍ୟାନ୍ସମାନେ ଭିନ୍ନ ଭିନ୍ନ କମେଣ୍ଟ କରିଛନ୍ତି ।
View this post on Instagram
ଡ୍ୱେନ ପ୍ରିଟୋରିୟସ ଆଇପିଏଲ-୨୦୨୨ରେ ଡେବ୍ୟୁ କରିଥିଲେ । ତେବେ ବର୍ତ୍ତମାନ ପର୍ଯ୍ୟନ୍ତ ସେ ମୋଟ ୭ଟି ମ୍ୟାଚ ଖେଳିଥିବା ବେଳେ ୬ଟି ୱିକେଟ ନିଜ ନାମରେ କରିଛନ୍ତି । ଏଥିମଧ୍ୟରେ ୩୦ ରନ୍ ଦେଇ ୨ଟି ୱିକେଟ ତାଙ୍କ ସର୍ବଶ୍ରେଷ୍ଠ ପ୍ରଦର୍ଶନ ରହିଛି । ତେବେ ଚେନ୍ନାଇ ପକ୍ଷରୁ ଏ ନେଇ କୌଣସି ଘୋଷଣା କରାଯାଇ ନାହିଁ । ତେଣୁ ଚେନ୍ନାଇ ସୁପର କିଙ୍ଗସ ତରଫରୁ ଏ ନେଇ ସୂଚନାକୁ ଅପେକ୍ଷା କରିଛନ୍ତି ଫ୍ୟାନ୍ସ ।
