ମନକୁ ଛୁଇଁବ ହାଫ୍ ଲଭ୍ ଷ୍ଟୋରୀ! ରିଲିଜ ହେଲା ପୋଷ୍ଟର, ନଭେମ୍ବର 15ରେ ଶୁଭମୁକ୍ତି

ଭୁବନେଶ୍ବର: 15 ନଭେମ୍ବରରେ ବଡ ପରଦାକୁ ଆସିବ ବହୁ ପ୍ରତିକ୍ଷୀତ ଫିଲ୍ମ ହାଫ ଲଭ ଷ୍ଟୋରୀ । ଅଞ୍ଜନେୟ ମିଡ଼ିଆ ପ୍ରଇଭେଟ ଲିମିଟେଡ଼ ପ୍ରସ୍ତୁତ ‘ହାଫ୍ ଲଭ୍ ଷ୍ଟୋରୀ’ ଚଳଚ୍ଚିତ୍ରର ପୋଷ୍ଟର ଲୋକାର୍ପଣ ହୋଇଛି । ଶୀତଲ ହୋଟେଲର ଏକ ବର୍ଣ୍ଣାଢ୍ୟ ପରିବେଶରେ ଚଳଚ୍ଚିତ୍ରର ପ୍ରଯୋଜକ, ନିର୍ଦ୍ଦେଶକ, ଅଭିନେତା, ଅଭିନେତ୍ରୀ, ସଙ୍ଗୀତ ନିର୍ଦ୍ଦେଶକ, କଣ୍ଠଶିଳ୍ପୀ, ଅନେକ ସିନେପ୍ରେମୀଙ୍କ ସମେତ ସାମ୍ବାଦିକ ବନ୍ଧୁମାନଙ୍କ ଗହଣରେ ମହାଡ଼ମ୍ବରରେ ପୋଷ୍ଟର ରିଲିଜ ହୋଇଛି । ଏହି ଚଳଚ୍ଚିତ୍ରର ପ୍ରଯୋଜନା କରିଛନ୍ତି ପ୍ରଭାତ କୁମାର ପ୍ରଧାନ ଏବଂ ନିର୍ଦ୍ଦେଶନା ଦେଇଛନ୍ତି ମୃତ୍ୟୁଞ୍ଜୟ ସାହୁ । ଚଳଚ୍ଚିତ୍ରର କ୍ରିଏଟିଭ ହେଡ଼ ମିଡିଆ ପ୍ଲାନର ମୁଖ୍ୟ ପ୍ରଣୟ ଜେଠୀ ରହିଥିବା ବେଳେ ଚିତ୍ରନାଟ୍ୟ ଏବଂ ସଂଳାପ ରଚନା କରିଛନ୍ତି ଦେବୀଦତ୍ତ ମହାନ୍ତି । ସେହିପରି ସଙ୍ଗୀତ ନିର୍ଦ୍ଦେଶନା ବୈଦ୍ୟନାଥ ଦାଶ ଦେଇଥିବା ବେଳେ ଗୀତ ରଚନା କରିଛନ୍ତି ଡଃ ନିର୍ମଳ ନାୟକ, ଅରୁଣ ମନ୍ତ୍ରୀ ଏବଂ ଡାକ୍ତର ଶୁଭ ଦାଶ । ଚିତ୍ରତ୍ତୋଳନ ଈଶ୍ୱର ବାରିକ ଏବଂ ସମ୍ପାଦନା ରାଜେଶ ଦାଶ । ସେହପରି ହ୍ୟୁମାନ ସାଗର, ଗୌରଭ ଆନନ୍ଦ, କୁଲଦୀପ ପଟ୍ଟନାୟକ, ତାରିକ ଅଜିଜ୍, ବୈଦ୍ୟନାଥ ଦାଶ ଏବଂ ଅସୀମା ପଣ୍ଡା କଣ୍ଠଦାନ କିଛନ୍ତି ।

ଫିଲ୍ମର ଷ୍ଟୋରୀ ମଧ୍ୟ ବେଶ୍ ରୋମାଞ୍ଚର ହୋଇଛି । ଦର୍ଶକଙ୍କ ହୃଦୟକୁ ଛୁଇଁବା ନେଇ ଆଶା କରାଯାଉଛି । ଗୋଟିଏ ମଫସଲ ଗାଁର ପୁଅ କିପରି ଏକ ଝିଅ ପ୍ରେମରେ ପଡି ବାହାଘର ପାଇଁ ଯିଦି ଧରୁଛି ଏବଂ ପରେ ସେ ଏକ ଝିଅ ନୁହେଁ ଆତ୍ମା ବୋଲି ଜଣାପଡୁଛୁ । କାହାଣୀ ଏତିକିରେ ଶେଷ ହେଉନି ବରଂ ଆରମ୍ଭ ହେଉଛି । ତେବେ ପୁଅ(ଶିବୁ)ର ମାମୁଁ ଚରିତ୍ରରେ ସ୍ବର୍ଗତ ପିଣ୍ଟୁ ନନ୍ଦ ଏବଂ ମାଇଁ ଚରିତ୍ରରେ ଜ୍ୟୋତି ମିଶ୍ର, ଘନିଷ୍ଠ ବନ୍ଧୁ ହରିଆ ଚରିତ୍ରରେ ହରିହର ମହାପାତ୍ର ଅଭିନୟ କରିଛନ୍ତି । ଶିବୁ ଭୂମିକାରେ ସୁନୀଲ କୁମାର ଏବଂ ନାୟିକା ଭୂମିକାରେ କୁକିଜ୍ ସ୍ୱାଇଁ ଏବଂ ମନସ୍ବିନୀ ରହିଛନ୍ତି ।

ଆସନ୍ତା ନଭେମ୍ବର ୧୫ ତାରିଖରେ ବଡ଼ ପରଦାରେ ମୁକ୍ତିଲାଭ କରିବ ଏଇ ଓଡ଼ିଆ ଚଳଚ୍ଚିତ୍ର ହାଫ୍ ଲଭ୍ ଷ୍ଟୋରୀ । ମୃତ୍ୟୁଞ୍ଜୟ ସାହୁଙ୍କ ନିର୍ଦ୍ଦେଶିତ ଛୋଟ ପରଦା ହେଉ ଅବା ବଡ଼ ପରଦା ସବୁ ଚଳଚ୍ଚିତ୍ରକୁ ଦର୍ଶକ ଭଲ ପାଇବା ଦେଇଆସିଛନ୍ତି । ହାଫ୍ ଲଭ୍ ଷ୍ଟୋରୀକୁ ମଧ୍ୟ ଢେର ଭଲ ପାଇବା ଏବଂ ପ୍ରଶଂସା ମିଳିବ ବୋଲି ପ୍ରଯୋଜନା ସଂସ୍ଥା ଆଶା ରଖିଛି । ପ୍ରଯୋଜନା ସଂସ୍ଥା ତରଫରୁ ପୂର୍ବରୁ ଦେବଦାସ, ବ୍ୟାଡଗାର୍ଲ, ଧର୍ମ, ଭୈରବ ଭଳି ଅନେକ ସୁପରହିଟ୍ ଚଳଚ୍ଚିତ୍ର ଓଡ଼ିଆ ଦର୍ଶକମାନଙ୍କୁ ଦେଇସାରିଛନ୍ତି । ଏବେ ଅପେକ୍ଷା ରହିଛି ନଭେମ୍ବର 15 ତାରିଖକୁ ।