କଂଗ୍ରେସ ଛାଡିବାର ଇଶାରା ଦେଲେ ଶଶୀ ଥରୁର, ଦଳରେ ନିଜ ଗୁରୁତ୍ୱକୁ ନେଇ କିଛି ଏମିତି କହିଲେ…

ଥିରୁଭାନନ୍ତପୁରମ: ଦେଶରେ କଂଗ୍ରେସ ସ୍ଥିତି ଦିନକୁ ଦିନ ବିଗିଡ଼ିବାରେ ଲାଗିଛି । ପ୍ରାୟ ସବୁ ରାଜ୍ୟରେ ମଧ୍ୟ କଂଗ୍ରେସ ଡଙ୍ଗା ବୁଡିବା ଉପରେ। ଦିଲ୍ଲୀରେ ଶୋଚନୀୟ ପରାଜୟରୁ ସବୁ ପାଦରେ ପଡିଯାଇଛି । ଦଳରେ ଲାଗିରହିଥିବା କନ୍ଦଳ ପାଇଁ ଏହି ଜାତୀୟ ଦଳ ବେଶୀ ଦୁର୍ବଳ ହେବାରେ ଲାଗିଛି ।

ରାଗିଯାଇଛନ୍ତି: କେରଳରେ ୨୦୨୬ ଏପ୍ରିଲରେ ବିଧାନସଭା ନିର୍ବାଚନ ହେବାକୁ ଅଛି । ଏ ସମୟରେ କେରଳରେ କଂଗ୍ରେସର ଅନ୍ତଃ କନ୍ଦଳ ପଦାରେ ପଡିଛି । ନିଜକୁ କେରଳର ମୁଖ୍ୟମନ୍ତ୍ରୀ ପ୍ରାର୍ଥୀ ଘୋଷଣା କରିଛନ୍ତି ବରିଷ୍ଠ କଂଗ୍ରେସ ନେତା ତଥା ସାଂସଦ ଶଶୀ ଥରୁର । କେରଳରେ ବାମପନ୍ଥୀ ସରକାରକୁ ପ୍ରଶଂସା କରିବା ନେଇ ବିବାଦ ଚାଲିଛି । ଏହାରି ମଧ୍ୟରେ ଥରୁର କଂଗ୍ରେସକୁ ସମାଲୋଚନା କରିଛନ୍ତି।

ଇଶାରା : କହିଛନ୍ତି ଯେ, କେରଳର କଂଗ୍ରେସରେ ଜଣେ ନେତାଙ୍କ ଅନୁପସ୍ଥିତି ରହିଛି । ଦଳ ଏହାକୁ ହୃଦୟଙ୍ଗମ କରୁନାହିଁ । ଯଦି କଂଗ୍ରେସ ଦଳ ମୋତେ ଆବଶ୍ୟକ ମଣୁନାହିଁ ତା’ହେଲେ ମୋ ପାଖରେ ଅନ୍ୟ ବିକଳ୍ପ ରହିଛି । କେରଳରେ ମୁଖ୍ୟମନ୍ତ୍ରୀ ପଦ ପାଇଁ ନିଜର ଦାବିକୁ ଦୋହରାଇ ଥରୁର କହିଛନ୍ତି, ଜନମତ ସର୍ବେକ୍ଷଣରୁ ଜଣାପଡିଛି ଯେ ସେ କେରଳରେ ନେତୃତ୍ୱ କ୍ଷେତ୍ରରେ ଅନ୍ୟମାନଙ୍କ ଠାରୁ ଆଗରେ ଅଛନ୍ତି ।

ଏମିତି କହିଲେ: ଯଦି ଦଳ ମୋର ଲୋକପ୍ରିୟତାକୁ ବ୍ୟବହାର କରିବାକୁ ଚାହୁଛି, ତେବେ ମୁଁ ଦଳ ପାଇଁ ରହିବି । ଯଦି ନୁହେଁ, ତା’ହେଲେ ମୋର ନିଜର କିଛି ପଦକ୍ଷେପ ନେବାର ଅଛି । ମୋର ସଂସଦୀୟ କ୍ଷେତ୍ରରେ କଂଗ୍ରେସକୁ ଚାହୁନଥିବା ଲୋକେ ମଧ୍ୟ ମୋତେ ଭୋଟ୍‌ ଦେଇ ନିର୍ବାଚିତ କରିଛନ୍ତି ବୋଲି ଥରୁର କହିଛନ୍ତି ।