Breaking: ଚୋରି ପାଇଁ ଆସିଲେ, ହେଲେ ବୃଦ୍ଧାଙ୍କୁ ଠେଙ୍ଗାରେ ପିଟିପିଟି ମାରିଦେଲେ

ଯାଜପୁର: ଦିନକୁ ଦିନ ବଢ଼ି ବଢି଼ ଚାଲିଛି ଲୁଟ୍ ଓ ଲୁଟ୍ ବେଳେ ହତ୍ୟା। ଠିକ୍ ସେହିପରି ପୁଣି ଏକ ଘଟଣା ସାମ୍ନାକୁ ଆସିଛି। ଲୁଟ୍ ପାଇଁ ଘରେ ପଶିଥିଲେ। ଆଉ ଘରର ବୃଦ୍ଧା ଉଠି ପଡିବାରୁ ତାଙ୍କୁ ଠେଙ୍ଗାରେ ପିଟିପିଟି ମାରିଦେଲେ ଦୁର୍ବୃତ୍ତ।

ଏପରି ଏକ ଜଘନ୍ୟ ହତ୍ୟାକାଣ୍ଡ ଘଟିଛି ଯାଜପୁର ଜିଲ୍ଲା ବାଲିଚନ୍ଦ୍ରପୁର ଥାନା ଟିଗିରିଆ ଗାଁରେ। ଗତକାଲି ବିଳମ୍ୱିତ ରାତିରେ ଲୁଟ୍ ପାଇଁ ଘରେ ପଶିଥିଲେ ୨ ଦୁର୍ବୃତ୍ତ। ହେଲେ ଲୁଟ୍ ବେଳେ ଉଠି ପଡିଥିଲେ ବୃଦ୍ଧା ଜଣଙ୍କ।

ଆଉ ଲୁଟ୍ ହେବା ଦେଖି ସେ ପାଟି କରିବାରୁ ତାଙ୍କ ଉପରେ ଆକ୍ରମଣ କରିଥିଲେ ଲୁଟେରା। ବୃଦ୍ଧାଙ୍କ ସହ ତାଙ୍କ ଝିଅ ମଧ୍ୟ ସେହି ଘରେ ଥିଲେ। ମୃତା ବୃଦ୍ଧା ଜଣଙ୍କ ବିଧବା। ଆଉ ତାଙ୍କ ଝିଅ ଆଶାକର୍ମୀ ଅଛନ୍ତି। ବିବାହିତା ହୋଇଥିଲେ ମଧ୍ୟ ଝିଅ ମା’ଙ୍କ ପାଖରେ ରହୁଥିଲେ।

ଆଉ ଯେତେବେଳେ ଗତକାଲି ବିଳମ୍ୱିତ ରାତିରେ ବୃଦ୍ଧାଙ୍କ ଉପରେ ଲୁଟେରାମାନେ ଆକ୍ରମଣ କରିଥିଲେ, ସେତେବେଳେ ଘରେ ଥିବା ତାଙ୍କ ଝିଅ ଜୋରେ ଚିତ୍କାର କରିବାକୁ ଲାଗିଥିଲେ। ଫଳରେ ପଡ଼ୋଶୀ ଉଠି ଆସିବାରୁ ଫେରାର ହୋଇଗଲେ ଚୋର।

ହେଲେ ସେତେବେଳକୁ ବୃଦ୍ଧାଙ୍କୁ ଠେଙ୍ଗାରେ ପିଟିପିଟି ଲହୁ ଲୁହାଣ କରିସାରିଥିଲେ ଦୁର୍ବୃତ୍ତ। ତାଙ୍କୁ ସଙ୍ଗେ ସଙ୍ଗେ ହସ୍ପିଟାଲ ନିଆଯାଇଥିଲା। ହେଲେ ବଡ଼ଚଣା ମେଡିକାଲରେ ଡାକ୍ତର ବୃଦ୍ଧାଙ୍କୁ ମୃତ ଘୋଷଣା କରିଥିଲେ।

ସୂଚନା ଅନୁସାରେ,ଗତକାଲି ବ୍ୟାଙ୍କରୁ କିଛି ଟଙ୍କା ଉଠାଇଥିଲେ ବୃଦ୍ଧା ଜଣଙ୍କ। ଆଉ ସେହି ଟଙ୍କା ଚୋରି ଉଦ୍ଧେଶ୍ୟରେ ବୃଦ୍ଧାଙ୍କ ଘରେ ଲୁଟେରା ପଶିଥିଲେ ବୋଲି ଅନୁମାନ କରାଯାଉଛି। ପୋଲିସ ଏହାର ତଦନ୍ତ ଚଳାଇଛି।