ଅମରାବତୀରେ ନୂଆ ଆରମ୍ଭ: ୬ ବର୍ଷ ପରେ ପୁଣି କ୍ୟାପିଟାଲ ପ୍ରୋଜେକ୍ଟ ଶୁଭାରମ୍ଭ କଲେ ପ୍ରଧାନମନ୍ତ୍ରୀ ମୋଦୀ

ଅମରାବତୀ: ଆନ୍ଧ୍ରପ୍ରଦେଶର ନୂଆ ରାଜଧାନୀ ଅମରାବତୀ ପୁଣି ଥରେ ଚର୍ଚ୍ଚାରେ। ପ୍ରାୟ ୬ ବର୍ଷର ବିରାମ ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶୁକ୍ରବାର ଦିନ ଏହି ଗ୍ରୀନଫିଲ୍ଡ ରାଜଧାନୀ ସହରରେ ୫୮,୦୦୦ କୋଟି ଟଙ୍କାରୁ ଅଧିକ ମୂଲ୍ୟର ବିଭିନ୍ନ ପ୍ରକଳ୍ପର ପୁନଃ ଶୁଭାରମ୍ଭ ଓ ଉଦ୍‌ଘାଟନ କରିଛନ୍ତି। ଏହି ପ୍ରକଳ୍ପଗୁଡ଼ିକ ମଧ୍ୟରେ ଅମରାବତୀର ନିର୍ମାଣ କାର୍ଯ୍ୟ ମୁଖ୍ୟ ଆକର୍ଷଣ ଥିଲା, ଯାହାକୁ ମୁଖ୍ୟମନ୍ତ୍ରୀ ଏନ୍‌. ଚନ୍ଦ୍ରବାବୁ ନାଇଡୁଙ୍କର ‘ସ୍ୱପ୍ନ ପ୍ରକଳ୍ପ’ ବୋଲି ବିବେଚନା କରାଯାଏ।

ଅମରାବତୀର ପୁନର୍ଜନ୍ମ
୨୦୧୪ରେ ଆନ୍ଧ୍ରପ୍ରଦେଶ ବିଭାଜନ ପରେ ଅମରାବତୀକୁ ରାଜ୍ୟର ନୂଆ ରାଜଧାନୀ ଭାବେ ଚୟନ କରାଯାଇଥିଲା। ୨୦୧୫ ଅକ୍ଟୋବରରେ ପ୍ରଧାନମନ୍ତ୍ରୀ ମୋଦୀ ଏହାର ପ୍ରଥମ ପାଦପତାଳି ରଖିଥିଲେ। ମାତ୍ର, ୨୦୧୯ରେ ଜଗନ ମୋହନ ରେଡ୍ଡୀଙ୍କ ନେତୃତ୍.ରେ ଓ୍ୱାଇଏସଆରସିପି ସରକାର ଗଠନ ହେବା ପରେ ଏହି ପ୍ରକଳ୍ପରେ ବାଧା ସୃଷ୍ଟି ହୋଇଥିଲା। ‘ତିନି ରାଜଧାନୀ’ ନୀତି ଓ ଆଇନଗତ ଜଟିଳତା ଯୋଗୁଁ ଅମରାବତୀର ନିର୍ମାଣ କାର୍ଯ୍ୟ ପ୍ରାୟ ସ୍ଥଗିତ ହୋଇପଡ଼ିଥିଲା।

୨୦୨୪ରେ ଚନ୍ଦ୍ରବାବୁ ନାଇଡୁଙ୍କ ନେତୃତ୍ବାଧୀନ ଟିଡିପି-ଏନଡିଏ ମେଣ୍ଟ ସରକାର ଗଠନ ପରେ ଅମରାବତୀ ପୁନର୍ଜନ୍ମ ଲାଭ କରିଛି। ନୂଆ ପୁଞ୍ଜି, ବିଶ୍ୱବ୍ୟାଙ୍କରୁ ପ୍ରାପ୍ତ ୪,୨୦୦ କୋଟି ଟଙ୍କାରୁ ଅଧିକ ଅର୍ଥ ଓ ଏସୀୟ ବିକାଶ ବ୍ୟାଙ୍କ (ଏଡିବି)ର ସମର୍ଥନ ସହିତ ଏହି ପ୍ରକଳ୍ପ ନୂଆ ଗତି ପାଇଛି।

ପ୍ରଧାନମନ୍ତ୍ରୀଙ୍କ ଦ୍ୱାରା ଶୁଭାରମ୍ଭ
ପ୍ରଧାନମନ୍ତ୍ରୀ ମୋଦୀ ଅମରାବତୀରେ ୯୪ଟି ପ୍ରକଳ୍ପର ଉଦ୍‌ଘାଟନ ଓ ପାଦପତାଳି କରିଛନ୍ତି, ଯାହାର ମୋଟ ମୂଲ୍ୟ ୫୭,୯୬୨ କୋଟି ଟଙ୍କା। ଏହା ମଧ୍ୟରେ ୪୯,୦୦୦ କୋଟି ଟଙ୍କାର ୭୪ଟି ପ୍ରକଳ୍ପ ଅମରାବତୀ ନିର୍ମାଣ ସହ ଜଡ଼ିତ। ଏହି ପ୍ରକଳ୍ପଗୁଡ଼ିକରେ ବିଧାନସଭା, ସଚିବାଳୟ, ଉଚ୍ଚ ନ୍ୟାୟାଳୟ, ବିଚାରପତିଙ୍କ ଆବାସ ଓ ୫,୨୦୦ ପରିବାର ପାଇଁ ଆବାସ ନିର୍ମାଣ ଅନ୍ତର୍ଭୁକ୍ତ।

ଏହା ସହିତ, ୧,୨୮୧ କିଲୋମିଟର ରାସ୍ତା ନିର୍ମାଣ ପାଇଁ ଲ୍ୟାଣ୍ଡ ପୁଲିଂ ଯୋଜନା ଅଧୀନରେ ୨୦,୪୦୦ କୋଟି ଟଙ୍କାର ପ୍ରକଳ୍ପ ଓ ୧୭,୪୦୦ କୋଟି ଟଙ୍କାର ବନ୍ୟା ନିୟନ୍ତ୍ରଣ ଓ ଅତ୍ୟାଧୁନିକ ଟ୍ରାନ୍ସପୋର୍ଟ ନେଟୱାର୍କ ପାଇଁ ପାଦପତାଳି କରାଯାଇଛି। ଏହି ରାସ୍ତାଗୁଡ଼ିକରେ ସେଣ୍ଟ୍ରାଲ ମେଡିଆନ, ସାଇକେଲ ଟ୍ରାକ ଓ ଇଣ୍ଟିଗ୍ରେଟେଡ ଉଟିଲିଟି ସୁବିଧା ରହିବ – ସହିତ ୩୨୦ କିଲୋମିଟର ଅତ୍ୟାଧୁନିକ ଟ୍ରଙ୍କ ଇନଫ୍ରାଷ୍ଟ୍ରକଚର ନେଟୱାର୍କ ମଧ୍ୟ ଅନ୍ତର୍ଭୁକ୍ତ।

ଅନ୍ୟାନ୍ୟ ପ୍ରକଳ୍ପ
ଅମରାବତୀ ନିର୍ମାଣ ସହିତ ପ୍ରଧାନମନ୍ତ୍ରୀ ରାଷ୍ଟ୍ରୀୟ ରାଜମାର୍ଗ, ରେଳବାଇ ଓ ପ୍ରତିରକ୍ଷା ସମ୍ବନ୍ଧୀୟ ପ୍ରକଳ୍ପଗୁଡ଼ିକର ମଧ୍ୟ ଶୁଭାରମ୍ଭ କରିଛନ୍ତି। ନାଗାୟାଲଙ୍କାରେ ୧,୫୦୦ କୋଟି ଟଙ୍କାର ମିସାଇଲ ଟେଷ୍ଟ ରେଞ୍ଜ, ବିଶାଖାପତ୍ତନମରେ ଏକ ଏକୀକୃତ ବଜାର ଓ ଗୁଣ୍ଟାକାଲ ଓ୍ୱେଷ୍ଟରୁ ମାଲାପ୍ପା ଗେଟ ପର୍ଯ୍ୟନ୍ତ ୨୯୩ କୋଟି ଟଙ୍କାର ରେଳପଥ ପ୍ରକଳ୍ପ ଏହାର ଅଂଶ।