ଟେନିସ ଖେଳାଳିଙ୍କ ହତ୍ୟା! 25 ବର୍ଷ ପାଳିଲା ପରେ ଝିଅକୁ ମାରିଦେଲା ବାପା
ସ୍ତ୍ରୀର ଜନ୍ମଦିନରେ ଝିଅର ହତ୍ୟା
ଗୁରୁଗ୍ରାମ: ବାପା ହାତରେ ଗଲା ଝିଅର ଜୀବନ, ସେ ପୁଣି ସ୍ତ୍ରୀର ଜନ୍ମଦିନ ଦିନ। ଏଭଳି ଏକ ଘଟଣା ଦେଖିବାକୁ ମିଳିଛି ଗୁରୁଗ୍ରାମର ସେକ୍ଟର 57 ରେ। 10 ଜୁଲାଇରେ ରାଧିକାଙ୍କ ମା ମଞ୍ଜୁଙ୍କ ଜନ୍ମଦିନ ଥିଲା। ଇଏ ସେହି ରାଧିକା ଯିଏ ଟେନିସ୍ ଟୁର୍ଣ୍ଣାମେଣ୍ଟରେ ପଦକ ଜିତି ତାଙ୍କ ବାପା ଦୀପକ ଯାଦବଙ୍କୁ ଗର୍ବିତ କରିଥିଲେ।
କିନ୍ତୁ ସେ ହୁଏ ତ କଳ୍ପନା କରିନଥିବେ ଯେ ଯିଏ ତାଙ୍କୁ 25 ବର୍ଷ ଧରି ଲାଳନ ପାଳନ କରି ଏତେ ବଡ କରିଛନ୍ତି ସେ ହିଁ ତାଙ୍କ ଜୀବନ ନେଇଯିବେ। ଗୁରୁଗ୍ରାମର ସେକ୍ଟର 57 ରେ ସେହି ଦିନ ସମସ୍ତଙ୍କ ପାଇଁ ଖୁସିର ଦିନ ଥିଲା।
ରାଧିକା ସକାଳୁ ଉଠି ମାଆଙ୍କ ଯତ୍ନ ନେବା ସହିତ ତାଙ୍କ ଜନ୍ମଦିନ ରୋଷେଇ ଘରେ ଯାଇ ଖାଦ୍ୟ ପାଇଁ ପ୍ରସ୍ତୁତି କରୁଥିଲେ। କିନ୍ତୁ ଦ୍ବିପହରେ ହଠାତ ସବୁକିଛି ବଦଳି ଗଲା। ଯେତେବେଳେ ବାପା ଦୀପକ ନିଜ ଲାଇସେନ୍ସ ପ୍ରାପ୍ତ ବନ୍ଧୁକ ବାହାର କରି ନିଜ ଝିଅକୁ 3 ଟା ଗୁଳି ମାରିଥିଲେ, ଯାହାଦ୍ୱାରା ରାଧିକାଙ୍କର ମୃତ୍ୟୁ ହୋଇଥିଲା।
25 ବର୍ଷୀୟ ରାଧିକା ଯାଦବ କେବଳ ଗୁରୁଗ୍ରାମର ନୁହେଁ ବରଂ ହରିୟାଣାର ଜଣେ ଜଣାଶୁଣା ଟେନିସ୍ ଖେଳାଳି ଥିଲେ। ସେ ରାଜ୍ୟ ସ୍ତରରେ ଅନେକ ଥର ଜିତିଥିଲେ ଏବଂ ତାଙ୍କ ପିତାଙ୍କ ସମର୍ଥନରେ ସେ ସେକ୍ଟର 57 ସ୍ଥିତ ଏକ ଟେନିସ୍ ଏକାଡେମୀରେ ଖେଳିବା ଆରମ୍ଭ କରିଥିଲେ।
କ୍ରୀଡାରେ ତାଙ୍କର ସଫଳତା ସୋସିଆଲ ମିଡିଆରେ ମଧ୍ୟ ପ୍ରତିଫଳିତ ହୋଇଥିଲା। ସେ ଜଣେ ଉଦୀୟମାନ ସୋସିଆଲ ମିଡିଆ ପ୍ରଭାବଶାଳୀ ହେବାକୁ ଚାହୁଁଥିଲେ।
ରାଧିକାଙ୍କ ନିକଟତର ଲୋକଙ୍କ କହିବା ଅନୁସାରେ, ସେ ଆଘାତ ପାଇବା ଯୋଗୁଁ ବୃତ୍ତିଗତ ଟେନିସ୍ରୁ ବିରତି ନେଇଥିଲେ ଏବଂ ତା’ପରେ ସେ ଏକ ଏକାଡେମୀ ଖୋଲି ତାଙ୍କ ପରି ପିଲାମାନଙ୍କୁ ତାଲିମ ଦେବା ଆରମ୍ଭ କଲେ। କିନ୍ତୁ ଏସବୁ ଧୀରେ ଧୀରେ ତାଙ୍କ ବାପା ଦୀପକ ଯାଦବଙ୍କ ପାଇଁ ଗ୍ରହଣୀୟ ହୋଇଗଲା।
ହତ୍ୟା ପଛରେ ପ୍ରକୃତ କାରଣ କ’ଣ?
ଗୁରୁଗ୍ରାମ ପୋଲିସର ପ୍ରାରମ୍ଭିକ ତଦନ୍ତରେ ଯେଉଁ କଥା ସାମ୍ନାକୁ ଆସିଥିଲା ତାହା ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଥିଲା। ଦୀପକ ଯାଦବ ନିଜେ ପୋଲିସ ଆଗରେ ସ୍ୱୀକାର କରି କହିଲେ ଯେ ସେ ହିଁ ତାଙ୍କ ଝିଅକୁ ନିଜ ହାତରେ ମାରିଛନ୍ତି।
ସେ କହିଛନ୍ତି ଯେ, ରାଧିକାଙ୍କ ଟେନିସ୍ ଏକାଡେମୀ ଖୋଲିବା ନିଷ୍ପତ୍ତିରେ ସେ ରାଜି ନଥିଲେ ଏବଂ ଏହାକୁ ସେ ବନ୍ଦ କରିବା ପାଇଁ ତାଙ୍କୁ ଅନେକ ଥର ବୁଝାଇଥିଲେ, କିନ୍ତୁ ରାଧିକା ରାଜି ହୋଇନଥିଲେ। ଦୀପକ ଏହା ମଧ୍ୟ କହିଥିଲେ ଯେ ଲୋକମାନେ ତାଙ୍କୁ ଗାଳି ଦେଉଥିଲେ ଯେ ସେ ତାଙ୍କ ଝିଅର ରୋଜଗାରରେ ବଞ୍ଚୁଛନ୍ତି।
ରାଧିକାଙ୍କ ସୋସିଆଲ ମିଡିଆ କାର୍ଯ୍ୟକଳାପ ଏବଂ ଜଣେ ଇନଫ୍ଲୁଏନସର ହେବାର ଇଚ୍ଛା ତାଙ୍କ ବାପାଙ୍କ ଚିନ୍ତାଧାରାକୁ ମଧ୍ୟ ପ୍ରଭାବିତ କରିଥିଲା।
ଏସବୁ କିନ୍ତୁ ତାଙ୍କ ବାପାଙ୍କୁ ଭଲ ଲାଗୁନଥିଲା। ସେ ଭାବୁଥିଲେ ଏଥିପାଇଁ ତାଙ୍କ ଘରର ମର୍ଯ୍ୟାଦା ହାନି ହେଉଛି। ତେଣୁ ସେ ସ୍ତ୍ରୀର ଜନ୍ମଦିନ ଦିନ ସୁଯୋଗ ପାଇ ଝିଅକୁ ନିଜ ବନ୍ଧୁକରେ ଗୁଳି ମାରି ହତ୍ୟା କରିଥିଲେ।
ଘଟଣା ସମ୍ବନ୍ଧରେ ଜାଣି ପୋଲିସ ହତ୍ୟା ମାମଲା ରୁଜୁ କରି ଦୀପକ ଯାଦବଙ୍କୁ ଗିରଫ କରିଛି। ହତ୍ୟାରେ ବ୍ୟବହୃତ ଲାଇସେନ୍ସପ୍ରାପ୍ତ ବନ୍ଧୁକ ମଧ୍ୟ ଜବତ କରାଯାଇଛି।