ରାତି ଅଧରେ ଭୁବନେଶ୍ବରରେ ଛାତିଥରା ଘଟଣା, ପେଟ୍ରୋଲ୍‌ ଢାଳି ନିଜ ଦେହରେ ନିଆଁ ଲଗାଇଦେଲେ ଆଇନଜୀବୀ

ଭୁବନେଶ୍ବର: ପାଣ୍ଡରା ଅଞ୍ଚଳରେ ଅଭାବନୀୟ ଘଟଣା । ଏଠାରେ ଜଣେ ଆଇନଜୀବୀ ଜୀବନ ଦଗ୍ଧ ହୋଇ ପ୍ରାଣ ହରାଇଛନ୍ତି ।

ସେ ନିଜ ଉପରେ ପେଟ୍ରୋଲ ଢାଳି ଆତ୍ମହୁତି ଦେଇଥିବା ଜଣାପଡିଛି । ମୃତକ ହେଲେ ଦୀପକ କୁମାର ସାହୁ ଏବଂ ସେ ଜଣେ ଆଇନଜୀବୀ ବୋଲି ଜଣାପଡିଛି । ଖବର ପାଇ ମଞ୍ଚେଶ୍ବର ଥାନା ପୋଲିସ ଏବଂ ସାଇଣ୍ଟିଫିକ ଟିମ୍ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି ।

ନିଜ ଘର ଛାତରୁ ତାଙ୍କର ମୃତଦେହ ଉଦ୍ଧାର କରାଯାଇଛି । ଛାତ ଉପରେ ଜଳିଯାଇଥିବା ନେଇ ପୋଲିସ ସୂଚନା ଦେଇଛି ।

ତେବେ ଆତ୍ମହୁତିର କାରଣ କଣ ତାହା ବର୍ତ୍ତମାନ ସୁଦ୍ଧା ଜଣାପଡି ନାହିଁ । ପାରିପାର୍ଶ୍ବିକ ସ୍ଥିତିକୁ ଦେଖିଲେ ଏହା ହତ୍ୟା ବୋଲି ମଧ୍ୟ ସନ୍ଦେହ ହେଉଥିବା ଚର୍ଚ୍ଚା ହେଉଛି । ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରିଛି ।

ଖବର ଅନୁସାରେ, ମୃତ ଦୀପକଙ୍କ ଘର ପାଣ୍ଡରା ଛକ ଜଗନ୍ନାଥ ମନ୍ଦିର ନିକଟରେ ରହିଛି । ତାଙ୍କର 4 ମହଲା ଘର ରହିଥିବା ବେଳେ ସେ ଉପରେ ଏକ ଚାମ୍ବର କରି ନିଜ କାମ କରୁଥିଲେ ।

ତେବେ ସେ ଗତ କିଛି ଦିନ ହେବ କୌଣସି ଘଟଣାକୁ ନେଇ ମାନସିକ ଅବସାଦରେ ରହିଥିବା ବେଳେ ପରିବାର ଲୋକେ ତାଙ୍କୁ ଡାକ୍ତରଙ୍କୁ ମଧ୍ୟ ଦେଖାଇଖିଲେ । ଏହାରି ଭିତରେ ଆଇନଜୀବୀଙ୍କ ଆତ୍ମହୁତି ଖବର ସାମ୍ନାକୁ ଆସିଛି ।