ଆଡ଼ପମଣ୍ଡପ ବିଜେ, ଆଜି ଗୁଣ୍ଡିଚା ଘରେ ଶ୍ରୀଜୀଉଙ୍କୁ କରାଯିବ ଅନ୍ନଭୋଗ
ପୁରୀ: ପୁରୀର ଶରଧାବାଲିଠାରେ ଥିବା ତିନିରଥ ଉପରୁ ଶ୍ରୀଜୀଉମାନଙ୍କୁ ଗୋଟି ପହଣ୍ଡିରେ ନିଆଯାଇ ଗତକାଲି ବିଳମ୍ବିତ ରାତି ସୁଦ୍ଧା ଗୁଣ୍ଡିଚା ଘର ପରିସରରେ ଥିବା ଆଡପମଣ୍ଡପ ଉପରେ ବିଜେ କରାଯାଇଛି । ଆଜିଠାରୁ ଶ୍ରୀମନ୍ଦିର ଭଳି ଗୁଣ୍ଡିଚା ମନ୍ଦିରରେ ଶ୍ରୀଜୀଉଙ୍କର ଦୈନନ୍ଦିନ ନୀତି ଅନୁଷ୍ଠିତ ହେବ । ଆଜି ପୂର୍ବାହ୍ନରେ ଶ୍ରୀଜୀଉମାନଙ୍କ ମଙ୍ଗଳ ଆଳତୀ, ମଇଲମ ଓ ଅବକାଶ ଆଦି କେତେକ ନୀତି ସମ୍ପନ୍ନ ହୋଇଛି ।
ପୂର୍ବାହ୍ନ ସାଢେ ୭ଟା ଠାରୁ ସାଢେ ୮ଟା ପର୍ଯ୍ୟନ୍ତ ସର୍ବସାଧାରଣ ଭକ୍ତଙ୍କ ଲାଗି ଗୁଣ୍ଡିଚା ମନ୍ଦିରରେ ସାହାଣମେଳା ଦର୍ଶନ ବ୍ୟବସ୍ଥା କରାଯାଇଛି । ଆଜି ଗୁଣ୍ଡିଚା ଘରେ ଶ୍ରୀଜୀଉଙ୍କୁ ଅନ୍ନଭୋଗ କରାଯିବ । ଆସନ୍ତା ୨୮ ତାରିଖରେ ବାହୁଡା ଓ ୨୯ରେ ସୁନାବେଶ ପରେ ଜୁଲାଇ ପହିଲାରେ ଶ୍ରୀଜୀଉମାନଙ୍କର ନୀଳାଦ୍ରି ବିଜେ ନୀତି ଅନୁଷ୍ଠିତ ହେବ ବୋଲି ଶ୍ରୀମନ୍ଦିର ପ୍ରଶାସନ ସୂତ୍ରରୁ ସୂଚନା ମିଳିଛି ।
ତେବେ ଶ୍ରୀମନ୍ଦିର ଛାଡି ଜନ୍ମବେଦୀକୁ ବାହୁଡିଛନ୍ତି ତିନି ଠାକୁର । ଦଇତା ପତି ସେବକମାନେ ତିନି ରଥରୁ ଶ୍ରୀଜିଉମାନଙ୍କୁ ରଥରୁ ପହଣ୍ଡି କରି ଶ୍ରୀ ଗୁଣ୍ଡିଚା ମନ୍ଦିରର ଆଡ଼ପ ମଣ୍ଡପରେ ବିଜେ କରାଇଛନ୍ତି। ଗୁରୁବାର ରିତିନିତି ଅନୁସାରେ,ସଂନ୍ଧ୍ୟା ଧୂପ ପରେ ରଥରୁ ଘୋଡା ଖୋଲାଯାଇ ଚାରମାଳ ବନ୍ଧାଯାଇଥିଲା । ଏହାପରେ ପୁଷ୍ପାଞ୍ଜଳି ବନ୍ଦାପନା ଅନୁଷ୍ଠିତ ହୋଇ ଆରମ୍ଭ ହୋଇଥିଲା ପହଣ୍ଡି ନୀତି ।
ପ୍ରଥମେ ଚଳନ୍ତି ପ୍ରତିମା ମଦନମୋହନ, ରାମ କୃଷ୍ଣ ଶ୍ରୀଗୁଣ୍ଡିଚାକୁ ବିଜେ କରିବା ପରେ ଗୋଟି ପହଣ୍ଡିରେ ଯାଇଥିଲେ ଚକ୍ରରାଜ ସୁଦର୍ଶନ । ପରେ ଶ୍ରୀଗୁଣ୍ତିଚା ମନ୍ଦିରକୁ (Gundicha Temple) ବିଜେ କରିଥିଲେ ପ୍ରଥମେ ବଡ ଭାଇ ବଳଭଦ୍ର ତା ପରେ ଭଉଣୀ ସୁଭଦ୍ରା ଏବଂ କାଳିଆ ସାଆନ୍ତ । ମହାପ୍ରଭୁଙ୍କ ଆଡ଼ପ ମଣ୍ଡପ ବିଜେ ନୀତି ଦେଖିବା ପାଇଁ ଶ୍ରୀଗୁଣ୍ଡିଚା ମନ୍ଦିର ନିକଟରେ ହଜାର ହଜାର ଭକ୍ତଙ୍କ ଭିଡ ଜମିଥିଲା। ହରିବୋଲ, ହୁଳହୁଳି ଧ୍ବନିରେ ସମଗ୍ର ଅଞ୍ଚଳ ପ୍ରକମ୍ପିତ ହୋଇଥଲା।
