ENG vs AFG: 8ରନରେ ଇଂଲଣ୍ଡକୁ ହରାଇଲା ଆଫଗାନିସ୍ତାନ, ତୃତୀୟ ଟିମ୍ ଭାବେ ଟୁର୍ଣ୍ଣାମେଣ୍ଟରୁ ବିଦା
ଚାମ୍ପିଅନ୍ସ ଟ୍ରଫିରେ ବଡ଼ ବିପର୍ଯ୍ୟୟ । ବାଜି ମାରିଲା ଆଫଗାନିସ୍ତାନ ।
ନୂଆଦିଲ୍ଲୀ: ଆଫଗାନିସ୍ତାନ ପୁଣିଥରେ କ୍ରିକେଟ ଜଗତରେ ଏକ ଚହଳ ସୃଷ୍ଟି କରିଛି । ଇଂଲଣ୍ଡ ଭଳି ଶକ୍ତିଶାଳୀ ଦଳକୁ ପରାସ୍ତ କରି ଆଫଗାନିସ୍ତାନ ଏକ ବଡ଼ ବିପର୍ଯ୍ୟୟ ସୃଷ୍ଟି କରିଛି । ଆଫଗାନିସ୍ତାନ ଚାମ୍ପିଅନ୍ସ ଟ୍ରଫି 2025ରେ ପ୍ରଥମ ବିଜୟ ସହିତ ସେମିଫାଇନାଲ ଦୌଡ଼ରେ ନିଜକୁ ବଜାୟ ରଖିଛି ।
ପ୍ରଥମେ ବ୍ୟାଟିଂ କରି ଆଫଗାନିସ୍ତାନ ଓପନର ଇବ୍ରାହିମ ଜାଦ୍ରାନଙ୍କ ୧୭୭ ରନ ସହାୟତାରେ ୫୦ ଓଭରରେ ୭ ୱିକେଟ ହରାଇ ୩୨୫ ରନ କରିଥିଲା। ଜବାବରେ ଇଂଲଣ୍ଡ ୫୦ ଓଭରରେ ୪୯.୫ ଓଭରରେ ୩୧୭ ରନ କରି ଅଲଆଉଟ୍ ହୋଇଯାଇଥିଲା । ଫଳରେ ଆଫଗାନିସ୍ତାନ ୮ ରନରେ ମ୍ୟାଚ୍ ଜିତିଥିଲା।
ଇଂଲଣ୍ଡ ପକ୍ଷରୁ ଜୋ ରୁଟ୍ ସର୍ବାଧିକ ୧୨୦ ରନ୍ କରିଥିଲେ। ଆଫଗାନିସ୍ତାନ ପକ୍ଷରୁ ଆଜମାତୁଲ୍ଲା ଉମରଜାଇ 5 ୱିକେଟ୍ ନେଇଥିଲେ । ସେହିପରି ମହମ୍ମଦ ନବି ୨ ଜଣ ବ୍ୟାଟସମ୍ୟାନଙ୍କ ୱିକେଟ ନେଇଥିଲେ। ଆଫଗାନିସ୍ତାନ ଦଳ ODI କ୍ରିକେଟରେ ଲଗାତାର ଦ୍ୱିତୀୟ ଥର ପାଇଁ ଇଂଲଣ୍ଡକୁ ପରାସ୍ତ କରିଛି । ଏହା ପୂର୍ବରୁ ଆଫଗାନିସ୍ତାନ ଟିମ୍୨୦୨୩ ବିଶ୍ୱକପରେ ଦିଲ୍ଲୀରେ ଖେଳାଯାଇଥିବା ମ୍ୟାଚ୍ରେ ଇଂଲଣ୍ଡକୁ ୬୯ ରନ୍ରେ ପରାସ୍ତ କରିଥିଲା।
ଚାମ୍ପିଅନ ଟ୍ରଫିରୁ ବାହାରିଲା ଇଂଲଣ୍ଡ- ଇଂଲଣ୍ଡ ଏବଂ ଆଫଗାନିସ୍ତାନ ମଧ୍ୟରେ ଖେଳାଯାଇଥିବା ଏହି ରୋମାଞ୍ଚକର ମ୍ୟାଚ୍ ଏକ କର ବା ମର ମୁକାବିଲା ଥିଲା। ଏପରି ପରିସ୍ଥିତିରେ, ଆଫଗାନିସ୍ତାନ ବିଜୟୀ ହୋଇ ଚାମ୍ପିଅନ୍ସ ଟ୍ରଫିର ସେମିଫାଇନାଲ ଦୌଡ଼ରେ ନିଜକୁ ବଜାୟ ରଖିଛି । ଇଂଲଣ୍ଡ ପରାଜୟ ପରେ ଟୁର୍ଣ୍ଣାମେଣ୍ଟରୁ ବାଦ ପଡ଼ିଛି । ଇଂଲଣ୍ଡ ହେଉଛି ତୃତୀୟ ଦଳ ଯିଏକି ୨୦୨୫ ଚାମ୍ପିଅନ୍ସ ଟ୍ରଫିରୁ ବାଦ ପଡ଼ିଛି । ପୂର୍ବରୁ, ଆୟୋଜକ ପାକିସ୍ତାନ ଏବଂ ବାଂଲାଦେଶ ସେମିଫାଇନାଲ ଦୌଡ଼ରୁ ବାଦ ପଡ଼ିଛନ୍ତି ।