ଭୁବନେଶ୍ୱରରେ ଆୟୋଜିତ ହେଲା ୫ଟି ପୂର୍ବାଞ୍ଚଳ ରାଜ୍ୟର ପ୍ରାଣୀପାଳନ ଓ ଦୁଗ୍ଧ ଉତ୍ପାଦନ ସମ୍ବନ୍ଧୀୟ ଆଞ୍ଚଳିକ ସମୀକ୍ଷା ବୈଠକ
ଭୁବନେଶ୍ୱର(ଓଡ଼ିଶା ଭାସ୍କର): ଅଗଷ୍ଟ ୨୫ ତାରିଖ ଦିନ ଓଡ଼ିଶା ସରକାରଙ୍କ ମତ୍ସ୍ୟ ଓ ପ୍ରାଣୀ ସମ୍ପଦ ବିକାଶ ବିଭାଗ ସହଯୋଗରେ ଭାରତ ସରକାରଙ୍କ ପ୍ରାଣୀପାଳନ ଓ ଦୁଗ୍ଧ ଉତ୍ପାଦନ ବିଭାଗ ଦ୍ୱାରା ରାଜଧାନୀ ଭୁବନେଶ୍ୱରର ହୋଟେଲ ତାଜ୍ ଭିଭାନ୍ତାଠାରେ ଏକ ଆଞ୍ଚଳିକ ସମୀକ୍ଷା ବୈଠକ ଅନୁଷ୍ଠିତ ହୋଇଯାଇଛି । ଏହି ଅବସରରେ ଓଡ଼ିଶା, ପଶ୍ଚିମବଙ୍ଗ, ବିହାର, ଝାଡ଼ଖଣ୍ଡ ଓ ଛତିଶଗଡ଼ ଆଦି ୫ଟି ପୂର୍ବାଞ୍ଚଳ ରାଜ୍ୟର ପ୍ରାଣୀପାଳନ ଓ ଓ ଦୁଗ୍ଧ ଉତ୍ପାଦନ ସମ୍ବନ୍ଧରେ ସମୀକ୍ଷା କରାଯାଇଥିଲା ।
କେନ୍ଦ୍ର ସରକାରଙ୍କ ପ୍ରାଣୀପାଳନ ଓ ଦୁଗ୍ଧ ଉତ୍ପାଦନ ବିଭାଗର ସଚିବ ଅଳକା ଉପାଧ୍ୟାୟ ଏଥିରେ ସଭାପତିତ୍ୱ କରିଥିଲେ । ପୂର୍ବାଞ୍ଚଳର ଏହି ସମସ୍ତ ରାଜ୍ୟରେ ପ୍ରାଣୀ ସ୍ୱାସ୍ଥ୍ୟ ଏବଂ ରୋଗ ନିୟନ୍ତ୍ରଣ କାର୍ଯ୍ୟକ୍ରମ (ଏଲଏଚଡିସିପି), ଜାତୀୟ ପ୍ରାଣୀଧନ ମିଶନ (ଏନଏଲଏମ), ରାଷ୍ଟ୍ରୀୟ ଗୋକୁଳ ମିଶନ୍ (ଆରଜିଏମ), ପ୍ରାଣୀପାଳନ ଭିତ୍ତିଭୂମି ବିକାଶ ପାଣ୍ଠି (ଏଏଚଆଇଡିଏଫ) ଏବଂ କିଷାନ କ୍ରେଡିଟ୍ କାର୍ଡ (କେସିସି) ଆଦି କେନ୍ଦ୍ରୀୟ ତଥା କେନ୍ଦ୍ର ପ୍ରାୟୋଜିତ ଯୋଜନାର ଅଗ୍ରଗତି ଉପରେ ସଚିବ ପୁଙ୍ଖାନୁପୁଙ୍ଖ ଭାବେ ସମୀକ୍ଷା କରିଥିଲେ ।
ବୈଠକରେ ଜାତୀୟ ପ୍ରାଣୀ ରୋଗ ନିୟନ୍ତ୍ରଣ କାର୍ଯ୍ୟକ୍ରମ ଅଧୀନରେ ପଶୁମାନଙ୍କୁ ଟୀକାକରଣ, ସାରା ଦେଶରେ କୃତ୍ରିମ ପ୍ରଜନନ କାର୍ଯ୍ୟକ୍ରମ ଅନ୍ତର୍ଗତ କୃତ୍ରିମ ପ୍ରଜନନ, ଜାତୀୟ ପଶୁ ସମ୍ପଦ ମିଶନର ସ୍କିମାଟିକ୍ ପ୍ରଗତି ଯଥା: ଛେଳି ଫାର୍ମ ୟୁନିଟ୍, ଗୋପାଳନ ୟୁନିଟ୍, ଘାସ ଚାଷ ୟୁନିଟ୍ ଏବଂ ତାଲିମ କାର୍ଯ୍ୟକ୍ରମ ବିଷୟରେ ବିସ୍ତୃତ ଭାବରେ ଆଲୋଚନା କରାଯାଇଥିଲା । ଏଥିସହିତ ଏହି କାର୍ଯ୍ୟକ୍ରମଗୁଡିକ କାର୍ଯ୍ୟକାରୀ କରିବାରେ ରାଜ୍ୟମାନେ ସମ୍ମୁଖୀନ ହେଉଥିବା ସମସ୍ୟା ଉପରେ ଧ୍ୟାନ ଦିଆଯାଇଥିଲା । ଉପରୋକ୍ତ କେନ୍ଦ୍ରୀୟ ଯୋଜନାର ଲକ୍ଷ୍ୟ ହାସଲ ପାଇଁ ସମସ୍ତ ରାଜ୍ୟକୁ କଠିନ ପରିଶ୍ରମର ସହ କରିବାକୁ ସଚିବ ଅନୁରୋଧ କରିଥିଲେ । ।
ଏହାଛଡ଼ା ରାଜ୍ୟଗୁଡିକ ଦ୍ୱାରା କାର୍ଯ୍ୟକାରୀ ହେଉଥିବା ସମସ୍ତ ଯୋଜନାର ଭୌତିକ ଏବଂ ଆର୍ଥିକ ଅଗ୍ରଗତିର ସମୀକ୍ଷା, ପିଏଫଏମଏସରେ ପୁରୁଣା ତଥ୍ୟ ଏଣ୍ଟ୍ରି, ରାଜ୍ୟ ଲିଙ୍କ୍ ହୋଇଥିବା ଯୋଜନାଗୁଡିକର ମ୍ୟାପିଂ, ଭାରତ କୋଶ ମାଧ୍ୟମରେ ସୁଧ ଦେୟ, ଟ୍ରେଜେରୀରୁ ଏସଏନଏ ଆକାଉଣ୍ଟକୁ ପାଣ୍ଠି ସ୍ଥାନାନ୍ତରିତ, ଅସନ୍ତୁଳିତ ବାଲାନ୍ସ ବାତିଲ, ନୂତନ ପ୍ରସ୍ତାବ ଦାଖଲ ଏବଂ ୨୦୨୩-୨୪ ପାଇଁ ନୂତନ ପ୍ରସ୍ତାବର ସମୀକ୍ଷା, ବିଭାଗର ଉଦ୍ୟୋଗ ବିକାଶ କାର୍ଯ୍ୟକ୍ରମ, ରାଜ୍ୟଗୁଡିକ ଦ୍ୱାରା ପିଏମ୍ ଗତି ଶକ୍ତି କାର୍ଯ୍ୟ ଯୋଜନା, ଭ୍ରାମ୍ୟମାଣ ପ୍ରାଣୀ ଚିକିତ୍ସା ୟୁନିଟ କାର୍ଯ୍ୟାନ୍ୱୟନରେ ସମସ୍ୟା, ଟିକାକରଣ କାର୍ଯ୍ୟକ୍ରମ ସହ ଜଡିତ ସମସ୍ୟା, ଏଏଚଡିଏଫ ଓ କେସିସିର କାର୍ଯ୍ୟକାରିତା ଉପରେ ଆଲୋଚନା କରାଯାଇଛି ।
ବୈଠକ ପୂର୍ବରୁ, ପ୍ରାଣୀରୋଗ ସମ୍ବନ୍ଧୀୟ ପ୍ରାରମ୍ଭିକ ଚେତାବନୀ ପ୍ରଣାଳୀ ଏବଂ ରୋଗର ପୂର୍ବାନୁମାନ ପାଇଁ ଜିନୋମିକ୍ ସର୍ଭିଲାନ୍ସ ସହିତ ପ୍ରାଣିରୋଗ ଉପରେ ନଜର ରଖିବା ଉପରେ ଏକ କର୍ମଶାଳା ଅନୁଷ୍ଠିତ ହୋଇଥିଲା । ଏଥିରେ ଅଂଶଗ୍ରହଣକାରୀ ରାଜ୍ୟମାନଙ୍କ ସହିତ ଏକ ବ୍ରେନ ଷ୍ଟରମିଂ ଅଧିବେଶନ ଅନୁଷ୍ଠିତ ହୋଇଯାଇଛି । ଏହି କାର୍ଯକ୍ରମରେ କେନ୍ଦ୍ର ସରକାରଙ୍କ ବରିଷ୍ଠ ଅଧିକାରୀଙ୍କ ସମେତ ଅଂଶଗ୍ରହଣକାରୀ ରାଜ୍ୟର ବରିଷ୍ଠ ଅଧିକାରୀମାନେ ଯୋଗ ଦେଇଥିଲେ । ରାଜ୍ୟ ମତ୍ସ୍ୟ ଓ ପ୍ରାଣୀସମ୍ପଦ ବିକାଶ ବିଭାଗ ପ୍ରମୁଖ ଶାସନ ସଚିବ ସୁରେଶ କୁମାର ବଶିଷ୍ଠ ବୈଠକରେ ସ୍ୱାଗତ ଭାଷଣ ପ୍ରଦାନ କରିଥିଲେ ।