ଆଶା ଭୋଁସଲେଙ୍କ ପ୍ରଥମ ବିବାହ ନର୍କ ଠାରୁ ଅଧିକ ଯନ୍ତ୍ରଣାଦାୟକ, ଯେତେବେଳେ ସେ ୪ ମାସର ଗର୍ଭବତୀ ଥିଲେ…

ନୂଆଦିଲ୍ଲୀ: ‘ଓ ହସିନା ଜୁଲଫନ୍ ୱାଲି ଜାନେ ଜହାଁ…’, ‘ଚୁରା ଲିୟା ହେ ତୁମନେ ଜୋ ଦିଲ୍ କୋ…’ ଭଳି ସୁପରହିଟ୍ ଗୀତରେ କଣ୍ଠଦାନ କରିଥିବା ଆଶା ଭୋଁସଲେ ଭାରତୀୟ ସଙ୍ଗୀତ ଜଗତର ସବୁଠାରୁ ପ୍ରସିଦ୍ଧ ଗାୟିକାମାନଙ୍କ ମଧ୍ୟରୁ ଜଣେ।

ସେ ତାଙ୍କ କ୍ୟାରିଅରରେ ୧୨ ହଜାରରୁ ଅଧିକ ଗୀତରେ କଣ୍ଠଦାନ କରିଛନ୍ତି ଏବଂ ଅନେକ ବଡ଼ ଏବଂ ପ୍ରସିଦ୍ଧ ଗାୟକଙ୍କ ସହ ମଧ୍ୟ କାମ କରିଛନ୍ତି। ତେବେ ଆଶା ଭୋଁସଲେ ତାଙ୍କ ବୃତ୍ତିଗତ ଜୀବନ ପାଇଁ ଯେତେ ଖବରରେ ଥିଲେ, ସେ ତାଙ୍କ ବ୍ୟକ୍ତିଗତ ଜୀବନ ପାଇଁ ମଧ୍ୟ ସେତିକି ଶିରୋନାମାରେ ଥିଲେ।

୧୬ ବର୍ଷ ବୟସରେ ସେ ଏପରି ଏକ ପଦକ୍ଷେପ ନେଇଥିଲେ, ଯାହା ଯୋଗୁଁ ତାଙ୍କ ବଡ଼ ଭଉଣୀ ତଥା ସ୍ୱର୍ଗତ ଗାୟିକା ଲତା ମଙ୍ଗେସକର, ଯିଏ ସ୍ୱର କୋକିଲା ଭାବରେ ପ୍ରସିଦ୍ଧ, ତାଙ୍କୁ ପରିତ୍ୟାଗ କରିଥିଲେ।

ଆଶା ତାଙ୍କ ପରିବାରର ଇଚ୍ଛା ବିରୁଦ୍ଧରେ ଲତା ମଙ୍ଗେସକରଙ୍କ ସଚିବ ଗଣପତରାଓ ଭୋଁସଲେଙ୍କୁ ବିବାହ କରିଥିଲେ। ଯାହା ପରେ ଲତା ମଙ୍ଗେସକର ତାଙ୍କୁ ପରିତ୍ୟାଗ କରିଥିଲେ ଏବଂ ତାଙ୍କ ସହିତ ସବୁ ସମ୍ପର୍କ ଶେଷ କରିଥିଲେ।

ଏବେ ଆଶା ଭୋଁସଲେ ତାଙ୍କ ଜୀବନୀ ‘ଆଶା ଭୋଁସଲେ: ଏ ଲାଇଫ୍ ଇନ୍ ମ୍ୟୁଜିକ୍’ରେ ତାଙ୍କ ବ୍ୟକ୍ତିଗତ ଜୀବନ ସହିତ ଜଡିତ ଅନେକ ବଡ଼ ଏବଂ ଆଶ୍ଚର୍ଯ୍ୟଜନକ ଖୁଲାସା କରିଛନ୍ତି।

ସ୍ୱାମୀ ଥିଲେ ୨୦ ବର୍ଷ ବଡ଼: ‘ଆଶା ଭୋଁସଲେ ଏ ଲାଇଫ୍ ଇନ୍ ମ୍ୟୁଜିକ୍’ ପୁସ୍ତକଟି ରମ୍ୟା ଶର୍ମା ଲେଖିଛନ୍ତି। ଏହି ପୁସ୍ତକରେ ଆଶା ଭୋଁସଲେ ଗଣପତରାଓ ଭୋଁସଲେଙ୍କ ସହିତ ତାଙ୍କର ପ୍ରଥମ ବିବାହର ଯନ୍ତ୍ରଣାଦାୟକ ଅନୁଭୂତି ବାଣ୍ଟିଛନ୍ତି।

ଆଶା ଭୋଁସଲେଙ୍କ ପ୍ରଥମ ସ୍ୱାମୀ ତାଙ୍କଠାରୁ ବହୁତ ବଡ଼ ଥିଲେ ଏବଂ ତାଙ୍କର ସ୍ୱଭାବ ବହୁତ କରାପ ଥିଲା। ଯାହା ଫଳରେ ଆଶାଙ୍କୁ ତାଙ୍କ ସହିତ ରହିବା କଷ୍ଟକର ହୋଇପଡ଼ୁଥିଲା।

ଶ୍ୱଶୁର ଘରେ ନିର୍ଯ୍ୟାତନା: ଆଶା ଭୋଁସଲେ ତାଙ୍କ ଜୀବନୀରେ ତାଙ୍କ ଶ୍ୱଶୁର ଘରେ ତାଙ୍କୁ ମିଳୁଥିବା ବ୍ୟବହାର ବିଷୟରେ ପ୍ରକାଶ କରିଛନ୍ତି। ସେ କହିଛନ୍ତି, ‘ଆମର ପରିବାର ବହୁତ ରକ୍ଷଣଶୀଳ ଥିଲା।

ସେମାନେ ଜଣେ ଗାୟିକା ବୋହୂଙ୍କୁ ସମ୍ଭାଳି ପାରୁନଥିଲେ। ମୋ ସ୍ୱାମୀ ବହୁତ ଖରାପ ସ୍ୱଭାବର ଥିଲେ। ହୁଏତ ସେ ଅନ୍ୟମାନଙ୍କୁ ଯନ୍ତ୍ରଣା ଏବଂ କଷ୍ଟ ଦେବାକୁ ଭଲ ପାଉଥିଲେ।

କିନ୍ତୁ, ମୁଁ କେବେ ଅନ୍ୟ କାହାକୁ ଏସବୁ ବିଷୟରେ ଜଣାଇ ନଥିଲି। ମୁଁ ସବୁବେଳେ ତାଙ୍କୁ ସମ୍ମାନ କରୁଥିଲି, କେବେ ତାଙ୍କୁ ପ୍ରଶ୍ନ କରିନଥିଲି। ମୁଁ ସବୁବେଳେ ହିନ୍ଦୁ ଧର୍ମ ଅନୁସାରେ ମୋର କର୍ତ୍ତବ୍ୟ ପାଳନ କରୁଥିଲି।

 ଡିପ୍ରେସନରେ ରହୁଥିଲେ: ଆଶା ଭୋଁସଲେ ପ୍ରକାଶ କରିଛନ୍ତି ଯେ ଗୋଟିଏ ସମୟରେ ସେ ଏତେ ଚିନ୍ତାରେ ଥିଲେ ଯେ, ସେ ତାଙ୍କ ଜୀବନ ଶେଷ କରିବାକୁ ନିଷ୍ପତ୍ତି ନେଇଥିଲେ। ସେ କହିଛନ୍ତି, ‘ଗୋଟିଏ ସମୟରେ ମୁଁ ବହୁତ ଦୁଃଖିତ ଥିଲି। ଏତେ ବିବ୍ରତ ଯେ ମୁଁ ମରିବାକୁ ଇଚ୍ଛା କରୁଥିଲି।

ସେତେବେଳେ ମୁଁ ଚାରି ମାସର ଗର୍ଭବତୀ ଥିଲି ଏବଂ ଅସୁସ୍ଥ ମଧ୍ୟ ଥିଲି। ଏହି ସମୟ ମଧ୍ୟରେ, ଯେଉଁ ହସ୍ପିଟାଲରେ ମୋତେ ଭର୍ତ୍ତି କରାଯାଇଥିଲା ତାହାର ଅବସ୍ଥା ଏତେ ଖରାପ ଥିଲା ଯେ ମୁଁ ନର୍କକୁ ଆସିଯାଇଥିବା ପରି ଲାଗୁଥିଲା।

ମୁଁ ସମ୍ପୂର୍ଣ୍ଣ ମାନସିକ ଭାବରେ ଭାଙ୍ଗି ପଡ଼ିଥିଲି। ମୁଁ ଏତେ ବିବ୍ରତ ହୋଇଥିଲି ଯେ ନିଦ ମେଡିସିନର ପୂରା ବୋତଲ ଖାଲି କରିଦେଇଥିଲି। କିନ୍ତୁ ମୋ ଗର୍ଭରେ ବଢ଼ୁଥିବା ପିଲା ପ୍ରତି ମୋର ପ୍ରେମ ଏତେ ଗଭୀର ଥିଲା ଯେ ଏତେ ବଟିକା ଖାଇବା ପରେ ମଧ୍ୟ ମୁଁ ମରି ନଥିଲି। ମୁଁ ମୋ ଜୀବନ ଫେରି ପାଇଲି।’

ଲତାଙ୍କ ପାଇଁ କାନ୍ଦିଲେ: ଆଶା ଭୋଁସଲେ ୨୦୨୩ ମସିହାରେ ଏକ ପ୍ରୋଗ୍ରାମରେ ଲତା ମଙ୍ଗେଶକରଙ୍କୁ ମନେ ପକାଇ କହିଥିଲେ, ‘ଛୋଟ ବେଳୁ ଆମ ଦୁହିଁଙ୍କ ସ୍ୱର ପ୍ରାୟ ସମାନ ଥିଲା। ତେଣୁ ଯଦି ମୁଁ ଦିଦିଙ୍କ ଶୈଳୀ ଅନୁସରଣ କରିଥାଆନ୍ତି, ତେବେ କେହି ମୋତେ ସୁଯୋଗ ଦେଇନଥାନ୍ତେ।

ଏହି କାରଣରୁ ମୁଁ କେବେ ଲତା ଦିଦିଙ୍କୁ ଅନୁକରଣ କରିନଥିଲି।’ ଆପଣଙ୍କୁ କହି ରଖୁଛୁ ଯେ ଆଶା ଭୋଁସଲେ ପ୍ରଥମ ଥର ପାଇଁ ୧୬ ବର୍ଷ ବୟସରେ ଗଣପତରାଓ ଭୋଁସଲେଙ୍କୁ ବିବାହ କରିଥିଲେ। ଦୁହିଁଙ୍କ ମଧ୍ୟରେ ବୟସର ବହୁତ ବ୍ୟବଧାନ ଥିଲା।

ସେ ପରିବାରର ଇଚ୍ଛା ବିରୁଦ୍ଧରେ ବିବାହ କରିଥିଲେ। ୧୧ ବର୍ଷ ବିବାହ ପରେ ଉଭୟ ଅଲଗା ହୋଇଯାଇଥିଲେ। ଯାହା ପରେ ଆଶା ଭୋଁସଲେ ୧୯୮୦ ମସିହାରେ ଆରଡି ବର୍ମନଙ୍କୁ ଦ୍ୱିତୀୟ ବିବାହ କରିଥିଲେ।