ମହିଳା ଅଧିକାରୀଙ୍କୁ ଆକ୍ରମଣ ଉଦ୍ୟମ ଘଟଣା: ୩ ଅଭିଯୁକ୍ତଙ୍କୁ ଗିରଫ କଲା ପୋଲିସ
ଭୁବନେଶ୍ୱର: ରାଜଧାନୀ ଭୁବନେଶ୍ୱରରେ ମହିଳା ପୋଲିସଙ୍କୁ ଆକ୍ରମଣ ଉଦ୍ୟମରେ ୩ ଅଭିଯୁକ୍ତଙ୍କୁ ଗିରଫ କରିଛି କମିଶନରେଟ ପୋଲିସ । ଅଭିଯୁକ୍ତ ବ୍ୟବହାର କରିଥିବା କାର୍କୁ ମଧ୍ୟ ପୋଲିସ ଜବତ କରିଛି । ତିନି ଦିନ ତଳେ ଆଚାର୍ଯ୍ୟ ବିହାର ସାଇନ୍ସ ପାର୍କ ନିକଟଠୁ ରିଜର୍ଭ ପୋଲିସ ଗଳିରେ ଅଭିଯୁକ୍ତମାନେ ମହିଳା ଅଧିକାରୀଙ୍କ ଗାଡ଼ିକୁ ଆକ୍ରମଣ ଉଦ୍ୟମ କରିଥିଲେ ।
ସୂଚନା ଅନୁସାରେ ମହିଳା ଅଧିକାରୀ ଜଣକ ଯେତେବେଳେ ଡ୍ୟୁଟି ସାରି ଫେରୁଥିଲେ, ସେହି ସମୟରେ ଏହି ଘଟଣା ଘଟିଥିଲା । କିଛି ଅସାମାଜିକ ଯୁବକ ପ୍ରଥମେ ଅଧିକାରୀଙ୍କ କାର୍ ଆଡ଼କୁ ମାଡ଼ି ଆସିଥିଲେ । ପରେ ସେମାନେ ତାଙ୍କର ପିଛା ମଧ୍ୟ କରିଥିଲେ । ପ୍ରାଣ ବିକଳରେ ମହିଳା ଅଧିକାରୀ ଜଣକ ଯାଇ ରିଜର୍ଭ ପୋଲିସ ଗ୍ରାଉଣ୍ଡରେ ପସି ଯାଇଥିଲେ । ଅଭିଯୁକ୍ତମାନେ ସେଠାରେ ମଧ୍ୟ ପ୍ରବେଶ କରିବାକୁ ଚେଷ୍ଟା କରିଥିଲେ ।
ତେବେ ଏହି ଘଟଣା ବିଷୟରେ ମହିଳା ଅଧିକାରୀ ଜଣକ ସହିଦ ନଗର ଥାନାରେ ଲିଖିତ ଭାବେ ଅଭିଯୋଗ କରିଥିଲେ । ଏବେ ପୋଲିସ ଏହି ମାମଲାରେ କାର୍ଯ୍ୟାନୁଷ୍ଠାନ ଗ୍ରହଣ କରି ଅଭିଯୁକ୍ତ ବ୍ୟବହାର କରିଥିବା ଇନୋଭା କାର୍ ଜବତ କରିବା ସହିତ ସେମାନଙ୍କୁ ଗିରଫ କରିବାରେ ସଫଳ ହୋଇଛି । ସୂଚନା ମୁତାବକ ତିନି ଯୁବକ ପେଶାରେ ଡ୍ରାଇଭର ଅଟନ୍ତି । ତିନି ଜଣଙ୍କ ମଧ୍ୟରୁ ଜଣେ ରିଜର୍ଭ ପୋଲିସ ଗ୍ରାଉଣ୍ଡ ନିକଟରେ ଥିବା ବସ୍ତିରେ ରହୁଥିବା ବେଳେ ଆଉ ଦୁଇଜଣ ଆନନ୍ଦ ବଜାର ନିକଟ ବସ୍ତିରେ ରୁହନ୍ତି। ରାତି ଅଧରେ ନିଶାଗ୍ରସ୍ଥ ଅବସ୍ଥାରେ ଭିଆଇଥିବା କୁହାଯାଉଛି।