ଆସିଲା ବଡ଼ ଖୁସି ଖବର, ଚନ୍ଦ୍ରୟାନ -୩ ର ସଫଳ ଲ୍ୟାଣ୍ଡିଂର ସାତ ମାସ ପରେ ଆସିଲା ଏହି ଅପଡେଟ
ନୂଆଦିଲ୍ଲୀ: ଇସ୍ରୋ ଗତ ବର୍ଷ ଅଗଷ୍ଟ ୨୩ ରେ ଚନ୍ଦ୍ରର ଦକ୍ଷିଣ ଧ୍ରୁବରେ ଚନ୍ଦ୍ରୟାନ -୩ କୁ ସଫଳତାର ସହ ଲ୍ୟାଣ୍ଡିଂ କରି ଇତିହାସ ସୃଷ୍ଟି କରିଥିଲା । ଭାରତ ବିଶ୍ୱର ପ୍ରଥମ ଦେଶ ହେଲା, ଯେକି ଚନ୍ଦ୍ରର ଦକ୍ଷିଣ ଧ୍ରୁବରେ ପହଞ୍ଚିଛି ।
ଏହା ପରେ ଭାରତୀୟ ବୈଜ୍ଞାନିକମାନେ ସମଗ୍ର ବିଶ୍ୱରୁ ଅଭିନନ୍ଦନ ବାର୍ତ୍ତା ଗ୍ରହଣ କରିଥିଲେ । ପ୍ରଧାନମନ୍ତ୍ରୀ ମୋଦୀ ମଧ୍ୟ ଇସ୍ରୋ କେନ୍ଦ୍ରକୁ ଯାଇ ଚନ୍ଦ୍ରୟାନ -୩ ପ୍ରକଳ୍ପରେ ଜଡିତ ବୈଜ୍ଞାନିକମାନଙ୍କୁ ଭେଟିଥିଲେ । ଏଥିସହିତ ଚନ୍ଦ୍ରାୟନ -୩ ଅବତରଣ କରିଥିବା ସ୍ଥାନର ନାମ ଶିବ ଶକ୍ତି ପଏଣ୍ଟ ରଖାଯାଇଥିଲା । ବର୍ତ୍ତମାନ ଏହି ବିଷୟରେ ଏକ ବଡ଼ ଖୁସି ଖବର ଆସିଛି । ଆନ୍ତର୍ଜାତୀୟ ଜ୍ୟୋତିର୍ବିଜ୍ଞାନ ୟୁନିଅନ୍ (ଆଇଏୟୁ) ଶିବ ଶକ୍ତି ନାମକୁ ୧୯ ମାର୍ଚ୍ଚରେ ଅନୁମୋଦନ କରିଛି । ଏହାର ଅର୍ଥ ବର୍ତ୍ତମାନ ଆନୁଷ୍ଠାନିକ ଭାବରେ ଯେଉଁଠାରେ ଚନ୍ଦ୍ରାୟଣ -୩ ଅବତରଣ କରିଛି, ତାହା ସମଗ୍ର ବିଶ୍ୱରେ ଶିବ ଶକ୍ତି ପଏଣ୍ଟ ଭାବରେ ମାନ୍ୟତା ପାଇବ ।
ଗେଜେଟର ଅଫ୍ ପ୍ଲାନେଟାରୀ ନାମକରଣ ଅନୁଯାୟୀ, ପ୍ଲାନେଟାରୀ ସିଷ୍ଟମ ନାମକରଣ ପାଇଁ ଆଇଏୟୁ ୱାର୍କିଂ ଗ୍ରୁପ୍ ଚନ୍ଦ୍ରୟାନ -୩ ର ବିକ୍ରମ ଲ୍ୟାଣ୍ଡର ଅବତରଣ ସ୍ଥାନ ପାଇଁ ଶିବ ଶକ୍ତି ନାମକୁ ଅନୁମୋଦନ କରିଛି । ଯେକୌଣସି ନିର୍ଦ୍ଦିଷ୍ଟ ସ୍ଥାନର ନାମକରଣ କରିବା ପରି ଗ୍ରହର ଏକ ସ୍ଥାନକୁ ନିର୍ଦ୍ଦିଷ୍ଟ ଭାବରେ ଚିହ୍ନିବା ପାଇଁ ନାମକରଣ କରାଯାଏ । ଏହା ସହିତ ଭବିଷ୍ୟତରେ ସେହି ସ୍ଥାନ ସହଜରେ ଚିହ୍ନିତ ହୋଇପାରିବ ଏବଂ ଲୋକମାନେ ଏହା ବିଷୟରେ ଆଲୋଚନା କରିପାରିବେ । ୨୩ ଅଗଷ୍ଟ ୨୦୨୩ ରେ ଚନ୍ଦ୍ରରେ ସଫଳ ଅବତରଣ କରିବାର ତିନି ଦିନ ପରେ ବେଙ୍ଗାଲୁରୁର ଇସ୍ରୋ ସେଣ୍ଟରରେ ପିଏମ ମୋଦୀ ଏହି ନାମ ଘୋଷଣା କରିଥିଲେ ।