ଏକ ଲକ୍ଷ ନୂଆ ସରକାରୀ ପଦବୀରେ ମିଳିବ ନିଯୁକ୍ତି: ନିର୍ବାଚନ ପୂର୍ବରୁ ମୁଖ୍ୟମନ୍ତ୍ରୀଙ୍କ ବଡ଼ ଘୋଷଣା
ନୂଆଦିଲ୍ଲୀ: ରାଜସ୍ଥାନ ବିଧାନସଭାରେ ବଜେଟ୍ ଉପସ୍ଥାପନ ପରେ ହୋଇଥିବା ବିତର୍କ ଉପରେ ସରକାରଙ୍କ ତରଫରୁ ମୁଖ୍ୟମନ୍ତ୍ରୀ ଅଶୋକ ଗେହଲଟ୍ ଗୁରୁବାର ଜବାବ ଦେଇଛନ୍ତି । ବିତର୍କର ଉତ୍ତରରେ ଗେହଲଟ୍ ରାଜ୍ୟର ଯୁବକମାନଙ୍କୁ ଏକ ବଡ଼ ଉପହାର ଦେଇଛନ୍ତି । ରାଜ୍ୟରେ ଏକ ଲକ୍ଷ ନୂଆ ସରକାରୀ ପଦବୀରେ ନିଯୁକ୍ତି କରାଯିବ ବୋଲି ଗେହଲଟ୍ ଘୋଷଣା କରିଛନ୍ତି ।
ଏହା ସହ ଚିରଞ୍ଜୀବୀ ଯୋଜନାର ପରିସର ବୃଦ୍ଧି କରିବାକୁ ମୁଖ୍ୟମନ୍ତ୍ରୀ ଘୋଷଣା କରିଛନ୍ତି, ଯାହା ଅଧୀନରେ ବର୍ତ୍ତମାନ ଅଙ୍ଗ ପ୍ରତିରୋପଣ ମଧ୍ୟ କରାଯାଇପାରିବ । ସିଏମ୍ କହିଛନ୍ତି ଯେ ବର୍ତ୍ତମାନ ଏହି ସୁବିଧା ରାଜ୍ୟ ବାହାରେ ଥିବା ଡାକ୍ତରଖାନାଗୁଡ଼ିକରେ ମଧ୍ୟ ଉପଲବ୍ଧ ହେବ । ଏହାପୂର୍ବରୁ ବିରୋଧୀଙ୍କ ଅଭିଯୋଗର ଜବାବ ଦେବାବେଳେ ସିଏମ୍ କେନ୍ଦ୍ର ସରକାରଙ୍କୁ ଘେରିଥିଲେ ଏବଂ କହିଥିଲେ ଯେ ରାଜସ୍ଥାନର ବଜେଟରେ ୨୧ ହଜାର କୋଟି ଟଙ୍କା କଟ୍ କରାଯାଇଛି, କିନ୍ତୁ ଆମର ୨୫ ସାଂସଦଙ୍କ ମଧ୍ୟରୁ କେହି ସ୍ୱର ଉତ୍ତୋଳନ କରି ନାହାଁନ୍ତି ।
କେନ୍ଦ୍ର ସରକାର ଉପରେ ରାଜ୍ୟକୁ ଭେଦଭାବ କରୁଥିବା ଅଭିଯୋଗ କରି ଗେହଲଟ୍ ଆହୁରି ମଧ୍ୟ କହିଛନ୍ତି ଯେ, ବଜେଟରେ ରାଜ୍ୟଗୁଡିକ ପାଇଁ ଚାଲିଥିବା ଅନେକ ଯୋଜନାରେ କେନ୍ଦ୍ର ସରକାର ଅର୍ଥ ହ୍ରାସ କରିଛନ୍ତି । ଗେହଲଟ୍ କହିଛନ୍ତି ଯେ କେନ୍ଦ୍ର ସରକାର ମନରେଗା, ମିଡ୍ ଡେ ମିଲ୍, ଏନଏଫଏସଏ, ଇଲେକ୍ଟ୍ରୋନିକ୍ସ ଏବଂ ଆତ୍ମା ନିର୍ଭର ଭାରତ ନିର୍ମାଣ ଯୋଜନାକୁ ହ୍ରାସ କରିଛନ୍ତି ।
