ସ୍ୱାମୀଙ୍କୁ ବିନା କାରଣରେ ବୈବାହିକ ସୁଖରୁ ବଞ୍ଚିତ ରଖିବା ଓ ନପୁଂସକ କହିବା କ୍ରୁରତା: ହାଇକୋର୍ଟ
ନୂଆଦିଲ୍ଲୀ: ଦିଲ୍ଲୀ ହାଇକୋର୍ଟ ଜଣେ ପୁରୁଷଙ୍କ ଛାଡପତ୍ର ଆବେଦନକୁ ଅନୁମତି ଦେଇଥିବାବେଳେ କହିଛନ୍ତି ଯେ ବିନା କାରଣରେ ପତ୍ନୀ ସ୍ୱାମୀଙ୍କୁ ବୈବାହିକ ସୁଖରୁ ବଞ୍ଚିତ କରିବା ଅତ୍ୟନ୍ତ କ୍ରୁରତା । ଏକ ଦଶନ୍ଧି ଧରି ସ୍ୱାମୀଙ୍କଠାରୁ ଅଲଗା ରହିବାର କାରଣ ବର୍ଣ୍ଣନା କରିବାରେ ବିଫଳ ହୋଇଛନ୍ତି ।
ଯୌତୁକ ନିର୍ଯ୍ୟାତନା ଅଭିଯୋଗ ମଧ୍ୟ ପ୍ରମାଣିତ ହୋଇନାହିଁ । ଆଇନ ଦୃଷ୍ଟିରୁ ଏହା ହେଉଛି ସ୍ୱାମୀଙ୍କ ସହ ମାନସିକ ନିର୍ଯାତନା ।
ଜଷ୍ଟିସ ସୁରେଶ କୁମାର କୈତ ଏବଂ ଜଷ୍ଟିସ ନୀନା ବନସଲ କୃଷ୍ଣଙ୍କ ବେଞ୍ଚ ମଧ୍ୟ ସ୍ୱାମୀଙ୍କୁ ସର୍ବସାଧାରଣରେ ନପୁଂସକ କହିବାକୁ କ୍ରୁରତା କହିଛି । ବେଞ୍ଚ କହିବା ମୁତାବକ, ଦମ୍ପତିଙ୍କ ଡାକ୍ତରୀ ରିପୋର୍ଟରୁ ଏହା ସ୍ପଷ୍ଟ ହୋଇଛି ଯେ ଉଭୟ ଯୌନ ସମ୍ପର୍କ ରଖିବାକୁ ସକ୍ଷମ । ଏଠାରେ ମାମଲା ହେଉଛି ବିବାହ ବନ୍ଧନରେ ଆବଦ୍ଧ ହେବା ପରେ ସନ୍ତାନ ନହେବା । ଯଦି କୌଣସି କାରଣରୁ ପତ୍ନୀ ଗର୍ଭଧାରଣ କରିବାକୁ ସକ୍ଷମ ନୁହଁନ୍ତି ତେବେ ଏହାକୁ ନପୁଂସକତା କୁହାଯାଇପାରିବ ନାହିଁ । ଏହିପରି ସ୍ୱାମୀଙ୍କୁ ବଦନାମ କରିବା ତାଙ୍କ ମାନସିକ ସ୍ୱାସ୍ଥ୍ୟ ସହିତ ଖେଳିବା, ଯାହା କ୍ରୁରତା ବର୍ଗରେ ରହିଛି ।
ଦୁଇଥର ଆଇଭିଏଫ୍ କରାଯାଇଥିଲା, ବିଫଳ ହେଲା: ଶୁଣାଣି ସମୟରେ ବେଞ୍ଚ ଜାଣିବାକୁ ପାଇଲା ଯେ ଏହି ଦମ୍ପତି ଦୁଇଥର ଭିଟ୍ରୋ ଫର୍ଟିଲାଇଜେସନ୍ (ଆଇଭିଏଫ୍) ଚିକିତ୍ସା କରିଛନ୍ତି, କିନ୍ତୁ ଏହା ବିଫଳ ହୋଇଛି । ବେଞ୍ଚ କହିଛନ୍ତି ଯେ, ବିବାହ ପରେ ଏହି ଦମ୍ପତି କେବଳ ଦୁଇ ବର୍ଷ ତିନି ମାସ ଏକାଠି ରହିଥିଲେ । ଏହି ସମୟରେ ସେ ଦୁଇଥର ଆଇଭିଏଫ ପ୍ରକ୍ରିୟା ଦେଇ ଗତି କରିଥିଲେ । ଏହା ସ୍ପଷ୍ଟ ଯେ ଦମ୍ପତି ଶୀଘ୍ର ଏକ ସନ୍ତାନ ପାଇବାକୁ ଚାହୁଁଥିଲେ, କିନ୍ତୁ ଏହାର ଅର୍ଥ ନୁହେଁ ଯେ ସେମାନଙ୍କ ମଧ୍ୟରୁ ଜଣେ ସନ୍ତାନ ପ୍ରସବ କରିବାକୁ ସକ୍ଷମ ନଥିଲେ । ଡାକ୍ତରଙ୍କ ରିପୋର୍ଟ ଅନୁଯାୟୀ, କିଛି ତ୍ରୁଟି ରହିଥିଲା, କିନ୍ତୁ ସ୍ୱାମୀଙ୍କ ନପୁଂସକତା ଭଳି କିଛି ନଥିଲା ।
ଛାଡପତ୍ର ଆବେଦନ ଅନୁମୋଦନ ହୋଇଛି :-
ଏହି ଦମ୍ପତି ୩ ଜୁଲାଇ ୨୦୧୧ ରେ ବିବାହ କରିଥିଲେ । ଦୁଇ ବର୍ଷ ତିନି ମାସ ଏକାଠି ରହିବା ପରେ ପତ୍ନୀ ଶାଶୁଘର ଛାଡି ୧୬ ଅକ୍ଟୋବର ୨୦୧୩ ରେ ତାଙ୍କ ବାପଘରକୁ ଯାଇଥିଲେ । ଏହା ପରେ ସେ ଆଉ ଫେରି ନଥିଲେ । ବେଞ୍ଚ ସ୍ୱୀକାର କରିଛନ୍ତି ଯେ ସ୍ୱାମୀଙ୍କଠାରୁ ଅଲଗା ରହିବା ପାଇଁ ପତ୍ନୀଙ୍କର କୌଣସି ଦୃଢ଼ କାରଣ ନାହିଁ । ପତ୍ନୀଙ୍କ ଏହି ଆଚରଣ ହେତୁ ସ୍ୱାମୀଙ୍କୁ ଦଶ ବର୍ଷ ପର୍ଯ୍ୟନ୍ତ ବୈବାହିକ ସୁଖରୁ ବଞ୍ଚିତ ହେବାକୁ ପଡିଲା । ତେବେ ୨୦୨୧ ମସିହାରେ ସ୍ୱାମୀଙ୍କ ଛାଡପତ୍ର ଆବେଦନକୁ ଫ୍ୟାମିଲି କୋର୍ଟ ଖାରଜ କରିଥିଲେ । ବର୍ତ୍ତମାନ ହାଇକୋର୍ଟର ଡିଭିଜନ ବେଞ୍ଚ ଫ୍ୟାମିଲି କୋର୍ଟର ନିଷ୍ପତ୍ତିକୁ ବାତିଲ କରି ସ୍ୱାମୀଙ୍କ ଆବେଦନକୁ ଗ୍ରହଣ କରିଛନ୍ତି ।
