ଭକ୍ତ ହେବେ ନିରାଶ! ଅନିର୍ଦ୍ଦିଷ୍ଟ କାଳ ପାଇଁ ବନ୍ଦ ହେଲା ଧବଳେଶ୍ୱର ଝୁଲାପୋଲ

ଆଠଗଡ଼(ଓଡ଼ିଶା ଭାସ୍କର): ଗୁଜରାଟ ଝୁଲାପୋଲ ଛିଡ଼ିବା ପରେ ଆକ୍ସନ ମୋଡକୁ ଆସିଛି ପ୍ରଶାସନ । ଆଗକୁ ବଡ଼ ଓଷା ଥିବା ବେଳେ ଧବଳେଶ୍ୱର ଝୁଲାପୋଲକୁ ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ବନ୍ଦ କରି ରଖାଯାଇଛି । ସ୍ଥିତି ଅନୁଧ୍ୟାନ ପରେ କଟକ ଜିଲ୍ଲାପାଳ ଏନେଇ ସୂଚନା ଦେଇଛନ୍ତି ।

କଟକ ଜିଲ୍ଲାପାଳଙ୍କ କହିବା ମୁତାବକ, ‘ଧବଳେଶ୍ୱର ଝୁଲାପୋଲର ସ୍ଥିତି ସମ୍ପୂର୍ଣ୍ଣ ଖରାପ ରହିଛିି । ଭକ୍ତଙ୍କ ଯାତାୟତ ପାଇଁ ଆଦୌ ସୁରକ୍ଷିତ ନୁହେଁ । ଝୁଲାପୋଲ ପାଇଁ ୧୪୪ ଧାରା ବଳବତ୍ତର ରହିବ ।’

ତେବେ ଆଗକୁ ଆସୁଛି ପବିତ୍ର କାର୍ତ୍ତିକ ପୂର୍ଣ୍ଣିମା । ଏଥିପାଇଁ ଆଠଗଡର ବାବା ଧବଳେଶ୍ୱର ପୀଠ ଖୁବ ଚଳଚଞ୍ଚଳ ହୋଇଥାଏ । ରାଜ୍ୟ ତଥା ରାଜ୍ୟ ବାହାରୁ ଅନେକ ଶ୍ରଦ୍ଧାଳୁ ଏଠାକୁ ବୁଲିବାକୁ ଆସିଥାନ୍ତି । କିନ୍ତୁ ଚଳିତବର୍ଷ ପୂର୍ଣ୍ଣମୀ ପୂର୍ବରୁ ଏଠାରେ ୧୪୪ ଧାରା ଲାଗୁ କରିଛି ପ୍ରଶାସନ । ଗୁଜୁରାଟର ଝୁଲାପୋଲ ଛିଡିବା ଘଟଣା ପରେ ଓଡିଶା ପ୍ରଶାସନର ଚେତା ପଶିଛି । ଏଥିପାଇଁ ଧବଳେଶ୍ୱରର ଝୁଲାପୋଲ ମରାମତି ନେଇ ଏଠାରେ ୧୪୪ ଧାରା ଜାରି ହୋଇଛି । ଝୁଲା ପୋଲର କ୍ଷମତା ଦିନକୁ ଦିନ କମିବାରେ ଲାଗୁଥିବାବେଳେ ଏହାର କିଛି ସ୍ଥାନରେ ଫାଟ ସୃଷ୍ଟି ହୋଇଛି। ଆଉ ଏସବୁକୁ ଦୃଷ୍ଟିରେ ରଖି ଧବଳେଶ୍ବର ପୀଠରେ ଅନିର୍ଦ୍ଧିଷ୍ଟକାଳ ପାଇଁ ୧୪୪ ଧାରା ଜାରି ସମେତ ଶ୍ରଦ୍ଧାଳୁଙ୍କୁ ବାରଣ କରାଯାଇଛି।