କାଲିମେଳାରୁ ଅପହୃତ ହୋଇଥିବା ଡାକ୍ତରଙ୍କ ମିଳିଲା ପତ୍ତା, କର୍ଣାଟକରୁ ଠାବ କରିଲା ପୋଲିସ
ଓଡ଼ିଶା ଭାସ୍କର: ନିକଟରେ ମାଲକାନଗିରି ଜିଲ୍ଲା କାଲିମେଳାରୁ ଅପହୃତ ହୋଇଥିବା ଡାକ୍ତରଙ୍କ ପତ୍ତା ମିଳିଛି । ଡାକ୍ତର ଅମ୍ଳାନ ଭୋଇଙ୍କୁ କର୍ଣ୍ଣାଟକରୁ ପୋଲିସ ଠାବ କରିଥିବା ସୂଚନା ଦେଇଛନ୍ତି ମାଲକାନଗିରି ଏସପି ନୀତୀଶ ୱାଧୱାନୀ । ଏବେ ଡାକ୍ତର ଅମ୍ଳାନଙ୍କୁ ମାଲକାନଗିରିକୁ ଅଣାଯିବ ନେଇ ପ୍ରକ୍ରିୟା ଚାଲିଛି । ତେବେ ଏକ ଶବ ବ୍ୟବଚ୍ଛେଦକୁ କେନ୍ଦ୍ର କରି ଡାକ୍ତର ଅମ୍ଳାନଙ୍କୁ ଅପହରଣ କରି ନିଆଯାଇଥିଲା ।
ସୂଚନାରୁ ପ୍ରକାଶ ଶନିବାର ବିଳମ୍ବିତ ରାତିରୁ ଡାକ୍ତର ଭୋଇ ନିଖୋଜ ଥିଲେ । ସେ ମାଓବାଦୀଙ୍କ ଦ୍ୱାରା ଅପହୃତ ହୋଇଥିବା କ୍ୱାର୍ଟର୍ସ ସମ୍ମୁଖରୁ ମିଳିଥିବା ଚିଠିରୁ ଅନୁମାନ କରାଯାଉଥିଲା । କିନ୍ତୁ ଉକ୍ତ ଚିଠିକୁ ଯାଞ୍ଚ ପରେ ତାହା ନକଲି ବୋଲି ଜଣାପଡ଼ିଛି । ସେହିପରି ମାଓବାଦୀ କାହାକୁ ଅପହରଣ କଲେ ୨୪ଘଣ୍ଟା ମଧ୍ୟରେ ତାହାର ସୂଚନା ଗଣମାଧ୍ୟମକୁ ଦେଇଥାନ୍ତି । କିନ୍ତୁ ୩୬ଘଣ୍ଟାରୁ ଅଧିକ ସମୟ ବିତିଯାଇଥିଲେ ସୁଦ୍ଧା ମାଓବାଦୀ କୌଣସି ସୂଚନା ଦେଇନଥିଲେ । ଶୁକ୍ରବାର ଦିନ ଜଣେ ମହିଳାଙ୍କ ଶବ ବ୍ୟବଚ୍ଛେଦକୁ କେନ୍ଦ୍ର କରି ଡାକ୍ତରଖାନାରେ ପାଟିତୁଣ୍ଡ ହୋଇଥିଲା । ତେଣୁ ସେହି ଘଟଣା ସହ ଡାକ୍ତରଙ୍କ ଅପହରଣକୁ ବି ଯୋଡ଼ିବାରୁ ନୂଆ ତଥ୍ୟ ସାମ୍ନାକୁ ଆସିଛି । ଯେଉଁମାନଙ୍କ ସହ ଡାକ୍ତରଙ୍କ ପାଟିତୁଣ୍ଡ ହୋଇଥିଲା ସେମାନଙ୍କୁ ଆଜି ଥାନାକୁ ଡକାଯାଇଥିଲା । ପଚରାଉଚରା ସମୟରେ ଶୁକ୍ରବାର ଡାକ୍ତରଖାନାରେ ସେମିତି କିଛି ହୋଇନଥିବା ପୁଲିସକୁ ବୟାନ ଦେଇଛନ୍ତି । ପରେ ଶନିବାର ବିଳମ୍ବିତ ରାତିରେ ଡାକ୍ତର ଏଟିଏମ୍ରୁ ୪୮ହଜାର ଟଙ୍କା ଉଠାଇଥିବା ଜଣାପଡିଥିଲା । ଏହା ସହ ସେ ଦୁଇଟି ମୋବାଇଲ ଫୋନ୍ ବ୍ୟବହାର କରୁଥିବା ମଧ୍ୟ ଜଣାପଡ଼ିଥିଲା । ତଥାପି ସମ୍ବେଦନଶୀଳ ଘଟଣା ହୋଇଥିବାରୁ ପୋଲିସ ଏକାଧିକ ଟିମ୍ ଗଠନ କରି ତଦନ୍ତ ଜାରି ରଖିଥିଲା ।
ଅପରପକ୍ଷରେ ପରିବାରବର୍ଗ ମଧ୍ୟ ଜିଲ୍ଲାପାଳଙ୍କ ନିକଟରେ ନିଖୋଜ ଡାକ୍ତର ଭୋଇଙ୍କୁ ଖୋଜିବା ପାଇଁ ନିବେଦନ କରିଥିବା ଜଣାପଡିଛି । ତେବେ ସେ କିପରି ଓ କେଉଁ କାରଣରୁ କାହାକୁ ନ କହି ମାଲକାନଗିରିରୁ କର୍ଣ୍ଣାଟକା ଚାଲି ଯାଇଥିଲେ ତାହା ଏବେ ସସ୍ପେନ୍ସ ଘେରରେ ଥିବା ବେଳେ ସେ ଫେରିବା ପରେ ସବୁ ରହସ୍ୟ ଉପରୁ ପରଦା ଉଠିବ ବୋଲି ମାଲକାନଗିରି ଏସ୍ପି ସୂଚନା ଦେଇଛନ୍ତି।