ଆମେରିକାକୁ ଆଖି ଦେଖାଇବା ପଡିଲା ଭାରୀ! ଚୀନ ଉପରେ ଟ୍ରମ୍ପଙ୍କ 104% ଟାରିଫ
ଅଲ୍ଟିମେଟମ ପରେ ଆକ୍ସନ ମୋଡରେ ଡୋନାଲ୍ଡ ଟ୍ରମ୍ପ । ଚୀନ ଉପରେ ନୂଆ ଟାରିଫ ।
ନୂଆଦିଲ୍ଲୀ: ଚୀନରୁ ଆସୁଥିବା ସାମଗ୍ରୀ ଉପରେ ଆମେରିକା ଅଧିକ ଟିକସ ଲଗାଇବାକୁ ନିଷ୍ପତ୍ତି ନେଇଛି । ହ୍ୱାଇଟ୍ ହାଉସ୍ ପକ୍ଷରୁ କୁହାଯାଇଛି ଯେ, ଏବେ ଚୀନ୍ରୁ ଆସୁଥିବା ଇଲେକ୍ଟ୍ରିକ୍ ଯାନ ଉପରେ ୧୦୪ ପ୍ରତିଶତ ଟିକସ ଲାଗୁ ହେବ । ଏହି ନୂତନ ଟାରିଫ ୯ ଏପ୍ରିଲରୁ କାର୍ଯ୍ୟକାରୀ ହୋଇଛି ।
ଆମେରିକା ଏବଂ ଚୀନ୍ ମଧ୍ୟରେ ଚାଲିଥିବା ବାଣିଜ୍ୟ ବିବାଦ (ଟ୍ରେଡ ୱାର)ରେ ଏହି ପଦକ୍ଷେପକୁ ଏପର୍ଯ୍ୟନ୍ତ ସବୁଠାରୁ ବଡ଼ ଏବଂ କଠିନ ନିଷ୍ପତ୍ତି ବୋଲି ବିବେଚନା କରାଯାଉଛି । ବିଜନେସ୍ ରିପୋର୍ଟ ଅନୁଯାୟୀ, ହ୍ୱାଇଟ୍ ହାଉସ୍ ପ୍ରେସ୍ ସଚିବ କାରୋଲିନ୍ ଲେଭିଟ୍ କହିଛନ୍ତି ଯେ, ଚୀନ୍ ଏପର୍ଯ୍ୟନ୍ତ ଆମେରିକା ଉପରେ ଲାଗୁ ହୋଇଥିବା ଟିକସକୁ ହଟାଇ ନାହିଁ । ଏହି କାରଣରୁ, ଆମେରିକା ଏବେ ୯ ଏପ୍ରିଲରୁ ଚୀନରୁ ଆସୁଥିବା ସାମଗ୍ରୀ ଉପରେ ମୋଟ ୧୦୪ ପ୍ରତିଶତ ଟିକସ ଲାଗୁ କରିବାକୁ ନିଷ୍ପତ୍ତି ନେଇଛି ।
ପୂର୍ବରୁ ଧମକ ଦେଇଥିଲେ ଟ୍ରମ୍ପ- ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ସୋମବାର କହିଛନ୍ତି ଯେ, ସେ ଚୀନ ଉପରେ ୫୦ ପ୍ରତିଶତ ଶୁଳ୍କ ଲଗାଇପାରିବେ । ଆମେରିକାରୁ ଆସୁଥିବା ସାମଗ୍ରୀ ଉପରେ ଚୀନ୍ 34 ପ୍ରତିଶତ ପ୍ରତିଶୋଧମୂଳକ ଟିକସ ଲଗାଇବା ସମୟରେ ସେ ଏହା କହିଥିଲେ ।
ଟ୍ରମ୍ପ ଚେତାବନୀ ଦେଇଥିଲେ ଯେ ଯଦି ଚୀନ୍ ୮ ଏପ୍ରିଲ ସୁଦ୍ଧା ଏହାର ୩୪ ପ୍ରତିଶତ ଟିକସ ହଟାଏ ନାହିଁ, ତେବେ ଆମେରିକା ମଧ୍ୟ ଚୀନ୍ରୁ ଆସୁଥିବା ସାମଗ୍ରୀ ଉପରେ ଆଉ ୫୦ ପ୍ରତିଶତ ଟିକସ ଲଗାଇବ । ଚୀନ୍ ଟ୍ରମ୍ପଙ୍କ ଧମକକୁ ଅଣଦେଖା କରି କହିଛି ଯେ ସେ ଆମେରିକା ସହିତ ଦୃଢ଼ ଲଢ଼ିବ । ଏହା ପରେ ହ୍ୱାଇଟ୍ ହାଉସ୍ ଚୀନ୍ ଉପରେ ଏକ ନୂତନ ଶୁଳ୍କ ଘୋଷଣା କରିଛି ।
ଆମେରିକା ଏବେ ଚୀନରୁ ଆସୁଥିବା ସାମଗ୍ରୀ ଉପରେ ମୋଟ ୧୦୪ ପ୍ରତିଶତ ଟିକସ ଲାଗୁ କରିଛି ।
ପ୍ରଥମତଃ, ଆମେରିକା ଏହି ବର୍ଷ ଆରମ୍ଭରେ 20 ପ୍ରତିଶତ ଟିକସ ଲାଗୁ କରିଥିଲା।
ତା’ପରେ ଏପ୍ରିଲ ୨ରେ, ୩୪ ପ୍ରତିଶତର ରେସିପ୍ରୋକଲ ତାରିଫ ଲାଗୁ କରାଯାଇଥିଲା।
ଏବେ ଡୋନାଲ୍ଡ ଟ୍ରମ୍ପ ୫୦ ପ୍ରତିଶତର ଏକ ନୂତନ ଟିକସ ଯୋଡିଛନ୍ତିମ।
ଏହି ତିନୋଟିକୁ ମିଶାଇଲେ, ମୋଟ ଟିକସ ଏବେ 104 ପ୍ରତିଶତରେ ପହଞ୍ଚିଛି।
ଟ୍ରମ୍ପ ପ୍ରଶାସନ କହିଛି ଯେ ଆମେରିକାର ଆର୍ଥିକ ସ୍ୱାର୍ଥକୁ ସୁରକ୍ଷା ଦେବା ପାଇଁ ଏହି ପଦକ୍ଷେପ ନିଆଯାଇଛି । ଟ୍ରମ୍ପ ବିଶ୍ୱାସ କରନ୍ତି ଯେ ଅନେକ ଦେଶ, ବିଶେଷକରି ଚୀନ୍, ବାଣିଜ୍ୟ କ୍ଷେତ୍ରରେ ଆମେରିକା ସହିତ ଭଲ ବ୍ୟବହାର କରୁନାହାଁନ୍ତି । ସେଥିପାଇଁ ସେ ଚୀନକୁ ଏହାର ବାଣିଜ୍ୟ ଏବଂ ଟିକସ ନୀତି ପରିବର୍ତ୍ତନ କରିବାକୁ କହୁଛନ୍ତି । ଏହି କାରଣରୁ, ଆମେରିକା ଏବଂ ଚୀନ୍ ମଧ୍ୟରେ ବାଣିଜ୍ୟିକ ସମ୍ପର୍କ ଆହୁରି ଖରାପ ହେଉଛି ।