ଇଂଲଣ୍ଡ ଗସ୍ତ ପାଇଁ ମୁମ୍ବାଇ ଅଭିମୁଖେ ଭାରତୀୟ କ୍ରିକେଟ୍ ଖେଳାଳି, କିଏ ସଡକ ପଥରେ ତ କିଏ ବିମାନରେ

ନୂଆଦିଲ୍ଲୀ ୨୧ ।୦୫: ଭାରତୀୟ ପୁରୁଷ ଓ ମହିଳା କ୍ରିକେଟ୍ ଦଳର ସଦସ୍ୟଙ୍କ ଇଂଲଣ୍ଡ ଗସ୍ତ ପାଇଁ ମୁମ୍ବାଇ ପହଂଚିବା ଆରମ୍ଭ ହୋଇ ଯାଇଛି । ଭାରତୀୟ ଦଳ ଜୁନ ୨ରେ ଇଂଲଣ୍ଡ ଅଭିମୁଖେ ଯାତ୍ରା କରିପାରେ । ଏହା ପୂର୍ବରୁ ସମସ୍ତ ଖେଳାଳି ବିସିଆଇ ଦ୍ୱାରା ପ୍ରସ୍ତୁତ ଜୈବ ନିରାପତା ବଳୟରେ ରହିବେ ।

ଭାରତୀୟ ଦଳକୁ ମୁମ୍ବାଇ ବ୍ୟତୀତ ଇଂଲଣ୍ଡରେ ପହଂଚିବା ପରେ ୧୦ ଦିନ ପୃଥକବାସରେ ରହିବାକୁ ପଡିବ । ବିସିସିଆଇର ଚାର୍ଟର୍ଡ ବିମାନ ଚେନ୍ନାଇ, ହାଇଦ୍ରାବାଦ ଓ ଦିଲ୍ଲୀରୁ ଖେଳାଳି ନେଇ ମୁମ୍ବାଇ ଅଭିମୁଖେ ଯାତ୍ରା କରିଛି । କିଏ ସଡକ ପଥରେ ମୁମ୍ବାଇ ପହଂଚୁଛନ୍ତି ତ କିଏ ବିମାନରେ ।

ଭାରତୀୟ ପୁରୁଷ ଦଳ ଜୁନ ୧୮ରୁ ନ୍ୟୁଜିଲାଣ୍ଡ ବିପକ୍ଷ ବିଶ୍ୱ ଟେଷ୍ଟ ଚମ୍ପିଆନସିପର ଫାଇନାଲ୍ ମୁକାବିଲା ପାଇଁ ସାଉଥମ୍ପଟନ ଯାତ୍ରା କରିବ । ସେପଟେ ମହିଳା ଦଳ ଜୁନ ୧୬ରୁ ଇଂଲଣ୍ଡ ବିପକ୍ଷ ଏକ ମାତ୍ର ଟେଷ୍ଟ ପାଇଁ ବ୍ରିଷ୍ଟଲ ଯାତ୍ରା କରିବ । ଋଷଭ ପନ୍ତ ଓ ଶୁବମାନ ଗିଲ୍ ମୁମ୍ବାଇ ପହଂଚି ସାରିଛନ୍ତି । ଅନ୍ୟପଟେ ମହିଳା କ୍ରିକେଟ୍ ଦଳ ସାତ ବର୍ଷ ପରେ ଇଂଲଣ୍ଡ ଟେଷ୍ଟ ଖେଳିବାକୁ ଯାଉଛି ।