ଜଣାଶୁଣା ଟିଭି ଅଭିନେତ୍ରୀ ବୈଶାଲୀ ଟକ୍କରଙ୍କ ଆତ୍ମହତ୍ୟା

ନୂଆଦିଲ୍ଲୀ: ଟେଲିଭିଜନ ଇଣ୍ଡଷ୍ଟ୍ରିରୁ ଏକ ଦୁଃଖଦ ଖବର ଆସିଛି । ଟେଲିଭିଜନ ଜଗତର ଜଣାଶୁଣା ଅଭିନେତ୍ରୀ ବୈଶାଲୀ ଟକ୍କରଙ୍କର ମୃତ୍ୟୁ ଘଟିଛି । ବୈଶାଲୀ ଇନ୍ଦୋରରେ ଆତ୍ମହତ୍ୟା କରିଥିବା ଜଣାପଡ଼ିଛି । ଅଭିନେତ୍ରୀଙ୍କ ଏକ ସୁଇସାଇଡ୍ ନୋଟ୍ ପୋଲିସ ଜବତ କରିବା ସହ ଏହି ମାମଲାର ଯାଞ୍ଚ ଚଳାଇଛି । ଅଭିନେତ୍ରୀଙ୍କ ଅଚାନକ ମୃତ୍ୟୁ ଖବର ମନୋରଞ୍ଜନ ଦୁନିଆରେ ଶୋକର ଲହରୀ ଖେଳାଇ ଦେଇଛି ।

ଗତ ଏକ ବର୍ଷ ହେଲା ବୈଶାଲୀ ଇନ୍ଦୋରରେ ରହି ଆସୁଥିଲେ । ଅଭିନେତ୍ରୀଙ୍କ ମୃତ୍ୟୁ ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ଶବ ସହିତ ଏକ ସୁଇସାଇଡ୍ ନୋଟ୍ ଜବତ କରିଥିଲା । ଆତ୍ମହତ୍ୟା ପଛର କାରଣ କ’ଣ ସେନେଇ ପୋଲିସ ତଦନ୍ତ ଜାରି ରଖିଛି । ବୈଶାଲୀ ଟିଭି ଜଗତର ଜଣେ ଜଣାଶୁଣା ଚେହେରା ଥିଲେ । ସେ ଅନେକ ଏକାଧିକ ପପୁଲାର ଶୋ’ରେ କାମ କରିଥିଲେ ।

ବୈଶାଲୀ ଗତ ୨୦୧୫ ମସିହାରେ ନିଜର ଅଭିନୟ କ୍ୟାରିୟର ଶୁଭାରମ୍ଭ କରିଥିଲେ । ସେ ଟେଲିଭିଜନ ଇଣ୍ଡଷ୍ଟ୍ରିର ପପୁଲାର ଶୋ’ ‘ୟେ ରିଶତା କ୍ୟା କହଲତା’ରୁ ନିଜର ଅଭିନୟ ଜୀବନ ଆରମ୍ଭ କରିଥିଲେ । ଏହି ଶୋ’ରେ ସେ ସଞ୍ଜନା ଭୂମିକାରେ ଆସିଥିଲେ । ଏହାପରେ ବୈଶାଲୀ ‘ଆଶିକୀ’ ଶୋ’ରେ ଅଭିନୟ କରିଥିଲେ । ସେ ‘ସସୁରାଲ ସିମର କା’ ଶୋ’ର ଅଞ୍ଜଲି ଭରଦ୍ୱାଜ ପାଇଁ ପରିଚିତି ଲାଭ କରିଥିଲେ । ଏହାଛଡ଼ା ସେ ‘ସୁପର ସିଷ୍ଟର’ ‘ମନମୋହିନୀ ସିଜନ ୨’ରେ ଅଭିନୟର ଯାଦୁ ଦେଖାଇଥିଲେ ।